އެލްޖީއޭގެ ބޯޑަށް މެންބަރުން އިންތިޚާބު ކުރުމަށް ކުރިމަތިލުމުގެ ފުރުސަތު ހުޅުވާލައިފި

ލޯކަލް ގަވަރމަންޓް އޮތޯރިޓީ (އެލްޖީއޭ) ގެ ބޯޑަށް ކައުންސިލްތަކާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކުން އިންތިޚާބުކުރާ މެންބަރުން ހޮވުމަށް ބާއްވާ އިންތިޚާބަށް ކުރިމަތިލުމުގެ ފުރުސަތު ހުޅުވާލައިފިއެވެ.

އެލްޖީއޭއިން އިއްޔެ ކުރި އިޢުލާނެއްގައި ބުނެފައިވަނީ، އަންނަ އޮގަސްޓް މަހުގެ 8 ވަނަ ދުވަހު ބޭއްވުމަށް ހަމަޖެހިފައިވާ މި އިންތިޚާބުގައި ބޯޑަށް ތިން މެންބަރަކު އިންތިޚާބު ކުރާނެ ކަމަށެވެ. އެއީ ސިޓީ ކައުންސިލްތަކުން އިންތިޚާބުކުރާ މެންބަރަކާއި، ރަށު ކައުންސިލްތަކުން އިންތިޚާބުކުރާ މެންބަރެއްގެ އިތުރުން އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކުގެ ރައީސުންގެ ތެރެއިން އިންތިޚާބުކުރާ މެންބަރެކެވެ.

މި މަޤާމުތަކަށް ކުރިމަތިލުމުގެ ސުންގަޑިއަކީ ޖުލައި 16 ވާ ބުރާސްފަތި ދުވަހުގެ މެންދުރު 12:00 އެވެ. ކުރިމަތިލާން އެދޭ ފަރާތްތަކުން ކަނޑައެޅިފައިވާ ފޯމާއި އެހެނިހެން ލިޔެކިޔުންތައް އީމެއިލް މެދުވެރިކޮށް ނުވަތަ އެލްޖީއޭގެ އޮފީހަށް ހުށަހެޅޭނެ ކަމަށް އެ އޮތޯރިޓީން ބުނެއެވެ. މި އިންތިޚާބުގެ ދާއިމީ ނަތީޖާ އިޢުލާން ކުރުމަށް ހަމަޖެހިފައިވަނީ އޮގަސްޓް މަހުގެ 11 ވަނަ ދުވަހުއެވެ.

ލާމަރުކަޒީ ޤާނޫނުގައިވާ ގޮތުން އެލްޖީއޭގެ ބޯޑު އެކުލެވިގެންވަނީ ޖުމްލަ 9 މެންބަރުންގެ މައްޗަށެވެ. އިންތިޚާބުކުރާ 3 މެންބަރުންގެ އިތުރުން ދެން ބޯޑުގައި ހިމެނެނީ ރައީސުލްޖުމްހޫރިއްޔާ އައްޔަންކުރައްވާ ސީއީއޯ އާއި، ވަޒީރުންގެ މަޖިލީހުގެ މެންބަރަކާއި، ފިނޭންސް މިނިސްޓްރީގެ އޮފިޝަލަކާއި، ޖެންޑަރ އިކުއަލިޓީ ދާއިރާގެ ތަޖުރިބާކާރު އަންހެން މެންބަރަކާއި، ގަވަރނަންސް ނުވަތަ ޕަބްލިކް އެޑްމިނިސްޓްރޭޝަން ދާއިރާގެ ތަޖުރިބާކާރަކާއި، މަދަނީ ޖަމްޢިއްޔާތަކުގެ މަންދޫބެކެވެ.

ލޯކަލް ގަވަރމަންޓް އޮތޯރިޓީއަކީ ރާއްޖޭގެ ލާމަރުކަޒީ ނިޒާމު ހިންގުމާއި، ކައުންސިލްތައް ސުޕަވައިޒްކޮށް ރެގިއުލޭޓް ކުރުމުގެ ޒިންމާ މަތިކޮށްފައިވާ އިދާރާއެވެ. މީގެ އިތުރުން ކައުންސިލަރުން ކުރާ ގޯސް ކަންކަމާއި، މަޤާމުގެ ނުފޫޒު ބޭނުންކުރުން ފަދަ މައްސަލަތަކުގައި ފިޔަވަޅު އެޅުމުގެ ބާރުވެސް އެ އޮތޯރިޓީއަށް ލިބިގެންވެއެވެ.