ދައުލަތަށް ގިނަ ދުވަހު ޚިދުމަތްކުރެއްވި އިބްރާހީމް ޙަލީމް އަވަހާރަވުމާ ގުޅިގެން ރައީސުލްޖުމްހޫރިއްޔާ ތަޢުޒިޔާ ފޮނުއްވައިފި

ދިވެހި ދައުލަތަށް ބައި ގަރުނަށްވުރެ ދިގު މުއްދަތަކަށް ޚިދުމަތްކުރެއްވި، މ. ފަތްކޯނި އިބްރާހީމް ޙަލީމް އަވަހާރަވުމާ ގުޅިގެން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ތަޢުޒިޔާ ވިދާޅުވެއްޖެއެވެ.

ރައީސުލްޖުމްހޫރިއްޔާ މިއަދު އެކްސްގައި ކުރެއްވި ޕޯސްޓެއްގައި ވަނީ، އިބްރާހީމް ޙަލީމް އަވަހާރަވުމުގެ ހިތާމައިގައި ބައިވެރިވެވަޑައިގެން، މަރްޙޫމްގެ އާއިލާއަށް ކެތްތެރިކަން މިންވަރުކޮށްދެއްވުން އެދި ދުޢާކުރައްވާފައެވެ.

އިބްރާހީމް ޙަލީމަކީ ދިވެހި ދައުލަތަށް ޚިދުމަތްކުރުމުގެ އިނާމުވެސް ޙާޞިލުކުރައްވާފައިވާ ބޭފުޅެކެވެ. އެމަނިކުފާނު ދައުލަތަށް ޚިދުމަތްކުރެއްވި 50 އަށްވުރެ ގިނަ އަހަރުގެ ތެރެއިން ބޮޑުބައެއް ހޭދަކުރެއްވީ ރައީސުލްޖުމްހޫރިއްޔާގެ ރަސްމީގެ، މުލީއާގޭގައެވެ. އެގޮތުން ރާއްޖޭގެ ކުރީގެ 6 ރައީސުންގެ އަރިހުގައި، ނުހަނު އިޚުލާޞްތެރިކަމާއި، ކަމޭހިތުމާއި އަދި ފަރުވާތެރިކަމާއެކު އޭނާ ވަނީ މަސައްކަތްކޮށްދެއްވާފައެވެ.

ރައީސުލްޖުމްހޫރިއްޔާގެ މެސެޖު ނިންމަވާލައްވާފައިވަނީ މާތްﷲގެ ތަނަވަސް ރަޙްމަތުގައި، ސުވަރުގޭގެ ދާއިމީ ނިޢުމަތުގައި މަރްޙޫމް ލެހެއްޓެވުމަށް އެދި ދުޢާކުރައްވަމުންނެވެ.

ދައުލަތަށް ގިނަ ދުވަހު ޚިދުމަތްކުރައްވާފައިވާ އިބްރާހީމް ޙަލީމަކީ މުލީއާގޭގެ މަސައްކަތްތަކުގައި ނަމޫނާ ދެއްކެވި، ގިނަ ބައެއްގެ އިޙްތިރާމް ލިބިވަޑައިގެންފައިވާ ބޭފުޅެކެވެ.