ދީނީ އަގުތަކާއި ގައުމިއްޔަތު ދިފާއުކުރުމަށް ރައީސް މުޢިއްޒު ގޮވާލައްވައިފި

ގައުމުގެ ކަންކަން އިޚްލާސްތެރިކަމާއެކު ކުރިއަށްގެންދާއިރު އެންމެ ފުރަތަމަ އިސްކުރަންޖެހޭނީ މާތްވެގެންވާ އިސްލާމްދީން ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ. އެމަނިކުފާނު މިހެން ވިދާޅުވީ، ވެރިކަން ކުރާ ޕީޕަލްސް ނޭޝަނަލް ކޮންގްރެސް (ޕީއެންސީ) ގެ ކޮންގްރެސް ނިންމުމުގެ ގޮތުން މިރޭ ބޭއްވި ޚާއްސަ ޖަލްސާގައި ވާހަކަފުޅު ދައްކަވަމުންނެވެ.

ރައީސް މުޢިއްޒު ވިދާޅުވި ގޮތުގައި، މި ޕާޓީ އުފެދުނީއްސުރެ އެންމެ ބޮޑު އިސްކަމެއް ދީފައިވަނީ ރާއްޖޭގައި އިސްލާމީ ކަންކަން ވަރުގަދަކޮށް، އަންނަން އޮތް ޖީލުތަކަށް މި ގައުމަކީ ފުރިހަމަ އިސްލާމީ ގައުމެއްގެ ގޮތުގައި ވާސިލްކޮށްދިނުމަށެވެ. އަދި މިއީ މިއަދު ދިވެހި ކޮންމެ ރައްޔިތަކުވެސް ފުންކޮށް ވިސްނަންޖެހޭ ސީރިއަސް މައްސަލައެއްކަން އެމަނިކުފާނު ފާހަގަކުރެއްވިއެވެ.

ޖަލްސާގައި ވާހަކަފުޅު ކުރިއަށް ގެންދަވަމުން ރައީސް ވިދާޅުވީ، މާޒީގައި ސިޔާސީ އޮއިވަރުގައި ޖެހިގެން ރައްޔިތުން ނިންމި ބައެއް ނިންމުންތަކުގެ ސަބަބުން މި މުހިންމު އަސާސްތަކަށް ހިޔަނި އެޅި، ހުރަސްތަކެއް ކުރިމަތިވި ކަމަށެވެ. އެހެންކަމުން، މިއަދު ކޮންމެ ރައްޔިތަކުވެސް ޒިންމާދާރުކަމާއެކު ގައުމު އިސްކުރަންޖެހޭ ކަމަށާއި، ގައުމު އެންމެ ފުރަތަމައަށް އިސްކުރާނަމަ ޕީއެންސީން ގެންގުޅޭ ސިޔާސަތުތަކާ މެދު އެއްވެސް މީހަކު ދެބަސްނުވާނެ ކަމަށް ވިދާޅުވިއެވެ. އެމަނިކުފާނު ބަޔާންކުރެއްވި ގޮތުގައި، ޕީއެންސީގެ ފަރާތުން ރައްޔިތުންނަށް ކަންކަން ކޮށްދިނުމުގައި ގެންގުޅޭ ފަލްސަފާއަކީވެސް މިއީއެވެ.

މީގެ އިތުރުން، ރާއްޖޭގެ ވެރިކަން ހިންގުމަށް މީގެ ކުރިން ބައެއް ފަރާތްތަކުން ފަނާކުރަނިވި ފިކުރުތަކެއް ތައާރަފްކުރަން މަސައްކަތްކުރިކަން ހަނދާންކޮށްދެއްވަމުން ރައީސް ވިދާޅުވީ، 23 ޑިސެމްބަރު 2011 ގައި ދީނުގެ ދިފާއުގައި ދިވެހި ރައްޔިތުން ނުކުމެ ކުރި މުޒާހަރާ އަކީ ދުވަހަކުވެސް ހަނދާނުން ފޮހެވިގެންދާނެ ކަމެއް ނޫން ކަމަށެވެ. އޭރުގެ ސިޔާސީ ވެރިން މަސްތުވުމާއި ރަލުގެ ހުއްދަތަކަށް ބާރުއަޅައި، "ހުރިހާ އެންމެން އަބަދަކު ހަމަބުއްދީގައި ތިބޭކަށް ނުޖެހޭ" ކަމަށް ބުނެ ވަކާލާތު ކުރިކަން ރައީސް ފާހަގަކުރެއްވިއެވެ.

ރައީސް މުޢިއްޒުގެ ވާހަކަފުޅު ނިންމަވާލެއްވީ، މިއަދުގެ ޒުވާނުން ބިނާކުރުމުގައިވެސް ސަރުކާރުން އެންމެ ބޮޑު އިސްކަމެއް ދޭނީ އިސްލާމީ ރާސްތާއާ އެއްގޮތަށް، ދީނީ އަގުތަކުގެ މަތީގައި ޒުވާނުން ތަރުބިއްޔަތު ކުރުމަށް ކަމުގެ ޔަގީންކަން ދެއްވަމުންނެވެ.