ސަފީރު ޝަހީބު ބެންގަލޫރަށް ކުރެއްވި ދަތުރުފުޅު ނިންމަވާލައްވައިފި

ދިވެހިރާއްޖެއިން އިންޑިއާއަށް ކަނޑައަޅުއްވާފައި ހުންނަވާ ސަފީރު އަލްފާޟިލް އިބްރާހީމް ޝަހީބު ބެންގަލޫރަށް ކުރެއްވި ދަތުރުފުޅު ނިންމަވާލައްވައިފިއެވެ.

ސަފީރު ބެންގަލޫރަށް ކުރެއްވި މިދަތުރުފުޅަކީ ކޮންސިއުލަރ ކަންކަމުގައި ދިވެހިން އާންމުކޮން، ހިދުމަތް ހޯދުމަށް ދާންޖެހޭ ބެންގަލޫރުގެ އިދާރާތަކާއި އަދި އެހެނިހެން ކަންކަމުގައި މުއާމަލާތް ކުރަން ޖެހޭ، މުއައްސަސާތަކުގެ އިސްބޭފުޅުންނާ ބައްދަލުކުރެއްވުމަށްޓަކައި ކުރެއްވި ދަތުރުފުޅެކެވެ.

މިގޮތުން މި ދަތުރުފުޅުގައި ސަފީރުވަނީ ބެންގަލޫރުގެ ކޮމިޝަނަރ އޮފް ޕޮލިސް، ކަރްނަޓާކާ ސްޓޭޓްގެ ފޮރިނަރސް ރީޖަނަލް ރެޖިސްޓްރޭޝަން އޮފިސަރާއި ޕްރިންސިޕަލް ކޮމިޝަނަރ އޮފް ކަސްޓަމްސް އަދި އައުޤާފު ބޯޑުގެ ސީއީއޯ އާއި ބައްދަލުކުރައްވާފައެވެ.

މީގެއިތުރުން ދިވެހިން ގިނައަދަދަކަށް ހިދުމަތް ހޯއްދަވާ ބެންގަލޫރުގެ ދެ ހޮސްޕިޓަލެއްކަމުގައިވާ އެން.ޔޫ ހޮސްޕިޓަލާއި އެޗް.ސީ.ޖީ. ހޮސްޕިޓަލްގެ އިސްބޭފުޅުއްނާވެސް ސަފީރުވަނީ ބައްދަލުކުރައްވާފައެވެ.

މިބައްދަލުކުރެއްވުންތަކުގައި ސަފީރު ވަނީ ބެންގަލޫރުގައި ދިރިއުޅުއްވާ އަދި ޒިޔާރަތް ކުރައްވާ ދިވެހިންނަށް ދިމާވާ ދަތިތައް ހައްލުކުރެއްވުމަށްޓަކައި ދިވެހިރާއްޖޭގެ ހައިކޮމިޝަން އާއި މި މުއައްސަސާތަކާއި ގުޅިގެން މަސައްކަތް ކުރުމާ ގުޅޭގޮތުން މަޝްވަރާ ކުރައްވާފައެވެ. މީގެއިތުރުން ބެންގަލޫރުގައި ދިރިއުޅުއްވާ ދިވެހިންގެ ތެރެއިން ބައެއް ރައްޔިތުންނާވެސް ސަފީރުވަނީ މި ދަތުރުފުޅުގައި ބައްދަލުކުރައްވާފައެވެ.