ޢިލްމު ބަޔަކަށް ފޯރުވައިދިނުމުގައި ތިމާގެ ދުލާއި ގަލަން ހިންގަން ޖެހޭ ޙާލަތާއި ހިންގަން ނުޖެހޭ ޙާލަތު ހުންނާނެ - ރައީސް

ޢިލްމު ބަޔަކަށް ފޯރުވައިދިނުމުގައި ތިމާގެ ދުލާއި ގަލަން ހިންގަން ޖެހޭ ޙާލަތާއި ހިންގަން ނުޖެހޭ ޙާލަތު ހުންނާނެ ކަމަށް ރައީސް ޑރ. މުޙައްމަދު މުޢިއްޒު ވިދާޅުވެއްޖެއެވެ.

އެމަނިކުފާނު މިފަދައިން ވިދާޅުވީ، ދިވެހިރާއްޖެ އިސްލާމްވިތާ 900 އަހަރު ފުރުމުގެ ތާރީޚީ މުނާސަބު މި ވަގުތުގައި ކުރިއަށްގެންދިޔަ "ޒުވާން ޚަޠީބުންގެ ޤައުމީ މަހާސިންތާ" ނިންމުމުގެ ޖަލްސާ ޝަރަފުވެރިކޮށްދެއްވާ ވާހަކަފުޅު ދައްކަވަމުންނެވެ.

ރައީސް ވިދާޅުވީ ޢިލްމުވެރިކަމަކީ، ޙިކްމަތްތެރިކަމާ ގުޅިފައިވާ ކަމެއް ކަމަށެވެ. ފޮތަކުން ދަސްވާ އެއްޗެއް އެ ދަސްވަނީ އޭގެ އެންމެ ފުން މިނުގައިކަމަށް ނުވެދާނެ ކަމަށެވެ. އަދި އެ ކަމަށް އެ ނޫން އެތައް ޢިލްމެއްގެ އެހީ ބޭނުންވެދާނެ ކަމަށެވެ. ރައީސް ވިދާޅުވީ އުމުރުން ދޮށީވުމާއި، އެތައް ތަޖުރިބާއެއް ބޭނުންވެދާނެ ކަމަށާއި، އަދި އެ ޢިލްމު ބަޔަކަށް ފޯރުވައިދިނުމުގައި ތިމާގެ ދުލާއި ގަލަން ހިންގަން ޖެހޭ ޙާލަތާއި ހިންގަން ނުޖެހޭ ޙާލަތު ހުންނާނެ ކަމަށެވެ. ތިމާގެ ދުލާއި ގަލަން ހިންގަން ޖެހޭ ގޮތާއި ހިންގަން ނުޖެހޭ ގޮތްވެސް ހުންނާނެ ކަމަށް ރައީސް ވިދާޅުވިއެވެ.

މިކަންކަން އަންނަނީ ޙިކްމަތުގެ ތެރެއިން ޙިކްމަތްތެރިކަމާއެކު. ދީނަކީ މަޞްލަޙަތު. ދީން އައީ އިންސާނީ ކަރާމާތް ނަގަހައްޓާން. އިންސާނާ ހެޔޮގޮތުގައި ބަލަހައްޓާން. އިންސާނީ މުޖުތަމަޢުގެ ހަމަޖެހުމާއި އެއްބައިވަންތަކަން ހިފަހައްޓާން. ސުލްޙަވެރިކަމާއި އަމާންކަން ދަމަހައްޓާން. އެހެންވީމާ، ޒުވާން ޚަޠީބުން މި ކަންކަމަށް ފަރުވާތެރިވާނެކަމުގެ ޔަޤީންކަން އަޅުގަނޑު ހިތުގައި ވަރަށް ބޮޑަށް އާކުރަން.

ރައީސް ވިދާޅުވީ ޚަޠީބުންނަކީ މީހުންނަށް މަގުދައްކައިދޭބައެއް ކަމަށެވެ. އެހެންވީމާ، އެމަނިކުފާނުގެ އުންމީދަކީ، މިއަދު މި ފެންނަ ޒުވާން ޚަޠީބުންގެ ސަފުތައް މުސްތަޤުބަލުގައި ރާއްޖޭގެ ޢިލްމުވެރީންނަށްވުން ކަމަށް ރައީސް ވިދާޅުވިއެވެ. އަދި އެމަނިކުފާނު އެދެނީ، ޒުވާން ޚަޠީބުންނަކީ، މާދަމާ ރާއްޖޭގެ ވިސްނުންތެރީންނަށްވެ ޒުވާން ޚަޠީބުންނަކީ، މާދަމާ ރާއްޖޭގެ ޙިކްމަތްތެރީންނަށްވެ އަދި ކުޅަދާނަ ބަސްމޮށުންތެރީންނަށްވުން ކަމަށެވެ. އަދި މުޖުތަމަޢުގެ ސިކުނޑި އީމާންކަމުގެ ނޫރުން އުޖާލާކުރުމުގައި ތިޔަކުދީންގެ ޒުވާންކަމުގެ އުޖާލާ ދޯދިތައް އިންތިހާއަށް މުހިންމުވާނެ ކަމަށް ރައީސް ވިދާޅުވިއެވެ.