"އީފާސް"އާ ގުޅޭ ޚާއްސަ ޕްރޮގްރާމެއް ދ. ކުޑަހުވަދޫގައި ބާއްވަން ނިންމައިފި

ރާއްޖޭގެ ޤައުމީ ޑިޖިޓަލް އައިޑެންޓިޓީ "އީފާސް" އާ ގުޅޭގޮތުން ހޭލުންތެރިކަން އިތުރުކުރުމަށް ހިންގާ ޚާއްސަ ޕްރޮގްރާމެއް ދ. ކުޑަހުވަދޫގައި ބޭއްވުމަށް ނިންމައިފިއެވެ.

މި ޕްރޮގްރާމަކީ ދާޚިލީ ސަލާމަތާއި ފަންނިއްޔާތާ ބެހޭ ވުޒާރާއިން ވޯލްޑް ބޭންކުގެ އެހީގައި ހިންގާ "ޑިޖިޓަލް މޯލްޑިވްސް ފޮރ އެޑަޕްޓޭޝަން، ޑީސެންޓްރަލައިޒޭޝަން އެންޑް ޑައިވަރސިފިކޭޝަން" (ޑީމެޑް) ޕްރޮޖެކްޓާއި މޯލްޑިވްސް ޑިޖިޓަލް ސަރވިސް ގުޅިގެން ކުރިއަށްގެންދާ ހަރަކާތެކެވެ. މި މަހުގެ 9 ވަނަ ދުވަހު ކުޑަހުވަދޫ މަލްޓި ޕާޕަސް ބިލްޑިންގގެ ލައިބްރަރީ ހޯލްގައި ބޭއްވުމަށް ހަމަޖެހިފައިވާ މި ޕްރޮގްރާމް ޚާއްސަކޮށްފައިވަނީ ފ. އަދި ދ. އަތޮޅުގެ ރަށްތަކަށެވެ.

އީފާސްއަކީ ދިވެހި ރައްޔިތެއްކަން އަންގައިދޭ ކާޑާ ގުޅިފައިވާ، ސަރުކާރުގެ ޚިދުމަތްތަކާއި، ޓާޝަރީ ހޮސްޕިޓަލްތަކާއި، އާސަންދަ، ޕެންޝަން އަދި ބޭންކިންގ ފަދަ މާލީ ޚިދުމަތްތައް އޮންލައިންކޮށް ހޯދުމަށް ބޭނުންކުރާ ރައްކާތެރި ޤައުމީ ނިޒާމެކެވެ. މި މަސައްކަތު ބައްދަލުވުމުގައި ދެ އަތޮޅުގެ ރަށު ކައުންސިލްތަކުގެ ޓެކްނިކަލް މުވައްޒަފުންނާއި، އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކުގެ މެންބަރުންގެ އިތުރުން، ކުޑަހުވަދޫގެ މުއައްސަސާތަކާއި ވިޔަފާރިތަކާއި ޖަމްޢިއްޔާތަކުން ބައިވެރިވާނެއެވެ.

ޑީމެޑް ޕްރޮޖެކްޓުން މަޢުލޫމާތު ދިން ގޮތުގައި، މި ވޯކްޝޮޕްގެ މައިގަނޑު މަޤްޞަދަކީ ޑިޖިޓަލް ސްޕޭސްގައި އަމިއްލަ އައިޑެންޓިޓީގެ ސަލާމަތާއި ރައްކާތެރިކަން ކަށަވަރުކުރުމަށް ހޭލުންތެރިކުރުމެވެ. އަދި އީފާސް ބޭނުންކުރުމުގައި ދިމާވާ މައްސަލަތަކާއި އޭގެ ޙައްލުތައް އޮޅުންފިލުވައިދީ، ރަށްރަށުގައި މަޢުލޫމާތު ފޯރުކޮށްދޭނެ ފަރާތްތައް ބިނާކުރުމެވެ.

މީގެއިތުރުން، ކުޑަހުވަދޫ ބަނދަރު ސަރަޙައްދުގައި ހުންނަ މެހެމާން ސަރާގައި އީފާސްގެ މޯބައިލް ހެލްޕްޑެސްކެއް ޤާއިމުކުރުމަށް ވަނީ ހަމަޖެހިފައެވެ. މި ހެލްޕްޑެސްކް މެދުވެރިކޮށް، އެކައުންޓް ލޮކްވުމާއި، ފޯނު ނަންބަރު ނުވަތަ އީމެއިލް ބަދަލުވުން ފަދަ މައްސަލަތައް، ވެރިފަރާތުގެ މުއްދަތު ހަމަނުވާ އައިޑީކާޑު ގެނައުމުން ކަށަވަރުކުރުމަށްފަހު ވަގުތުން ޙައްލުކޮށްދޭނެއެވެ.

"އަތޮޅު ދަތުރު" ގެ ނަމުގައި ކުރިއަށްގެންދާ މި ޕްރޮގްރާމުގެ ފުރަތަމަ ހަރަކާތް ކާމިޔާބުކަމާއެކު މިދިޔަ އޯގަސްޓް މަހުގެ 19 ގައި ކުޅުދުއްފުށި ސިޓީގައި ވަނީ ބާއްވާފައެވެ. އެ ހަރަކާތުގައި ހދ. އަތޮޅުގެ 20 މުއައްސަސާއަކުން 44 ފަރާތަކުން ބައިވެރިވެފައިވާއިރު، އާންމުންނަށް ޚިދުމަތް ދިނުމުގެ އިތުރުން ލަކީ ޑްރޯއެއްވެސް ވަނީ ކުރިއަށް ގެންގޮސްފައެވެ.