ވިހެއުމާ ގުޅިގެން ދޭ ޗުއްޓީ ނެގުމުން ޕްރޮމޯޝަން ނުލިބި ލަސްވާ މައްސަލައަށް ހައްލެއް ގެނެސްފި

ދައުލަތުގެ ޕޭ ފްރޭމްވަރކަށް ބަދަލުވެފައިވާ ސިވިލް ސަރވިސްގެ މުވައްޒަފުން، ވިހެއުމާ ގުޅިގެން ދޭ ޗުއްޓީ ނެގުމުން މުސާރައިގެ ކުރިއެރުން (ޕްރޮމޯޝަން) ލިބުން ލަސްވާ މައްސަލައަށް ހައްލެއް ގެނައުމުގެ ގޮތުން، މުސާރައިގެ ކުރިއެރުން ދިނުމުގައި ޢަމަލުކުރާ އުޞޫލަށް މުހިންމު ބަދަލުތަކެއް ގެނެސްފިއެވެ.

ސިވިލް ސަރވިސް ކޮމިޝަނުން މި އުޞޫލަށް ގެނައި އިޞްލާޙުތަކުގެ ތެރޭގައި، މުވައްޒަފުންގެ މަސައްކަތުގެ ފެންވަރު ބެލުމުގެ ނިޒާމު (ޕީއޭ) އާއި، އެއް އިދާރާއިން އަނެއް އިދާރާއަށް ބަދަލުވާ މުވައްޒަފުންނަށް ކުރިއެރުން ދިނުމުގައި ބަލާނެ މިންގަނޑުތައް ވަނީ ހިމަނާފައެވެ.

އަލަށް ގެނައި އިޞްލާޙުގައިވާ ގޮތުން، ދައުލަތުގެ ޕޭ ފްރޭމްވަރކުގައި ހިމެނޭ މަޤާމާއި، ރޭންކާއި މުސާރައިގެ ފިޔަވަޅުގައި ވިދިވިދިގެން 2 އަހަރު މަސައްކަތްކޮށް، މަސައްކަތު ފެންވަރު ބެލުމުގެ ނިޒާމުން %85 މާކްސް ލިބުމުން މުސާރައިގެ ކުރިއެރުން ދެވޭނެއެވެ. އަދި އަހަރުގެ ޕީއޭގެ ގޮތުގައި ބަލާނީ އެ އަހަރު ދުވަހުގެ ތެރޭގައި މަދުވެގެން 90 ދުވަހު މަސައްކަތްކޮށްފައިވާނަމައެވެ.

މީގެއިތުރުން، ވިހެއުމުގެ ޗުއްޓީ ނުވަތަ ސަސްޕެންޝަން ފަދަ ސަބަބަކާ ހުރެ ދިގު މުއްދަތަކަށް ވަޒީފާއަށް ނުނިކުމެވިގެން، އަހަރެއްގެ ތެރޭގައި މަސައްކަތު 90 ދުވަސް ހަމަނުވާ ޙާލަތްތަކުގައި ޢަމަލުކުރާނެ ލުއި ގޮތްތަކެއް މިހާރު ވަނީ ހަމަޖައްސާފައެވެ. އެގޮތުން، 90 ދުވަސް ހަމަނުވާ އަހަރު ނުހިމަނައި، އޭގެ ކުރީ އަހަރާއި ޖެހިގެން އަންނަ އަހަރުގެ ޕީއޭއިން %85 އަށް ވުރެ މަތިން މާކްސް ލިބިފައިވާނަމަ ކުރިއެރުން ދިނުމަށް ބަލައިގަނެވޭނެއެވެ. ނަމަވެސް، މުސާރައިގެ ކުރިއެރުމަށް އެއްފަހަރު ބޭނުންކޮށްފައިވާ ޕީއޭއެއް ދެވަނަ ފަހަރަށް ބޭނުމެއް ނުކުރެވޭނެއެވެ.

އެއް އިދާރާއިން އަނެއް އިދާރާއަށް ވަޒީފާ ބަދަލުވާ މުވައްޒަފުންގެ ޙައްޤުތައް ކަށަވަރުކުރުމަށްޓަކައި ވެސް އުޞޫލަށް ވަނީ ބަދަލުތަކެއް ގެނެސްފައެވެ. އެގޮތުން:

• އެއް އިދާރާއިން އަނެއް އިދާރާއަށް ބަދަލުވާއިރު، އެއްވެސް އިދާރާއެއްގައި 90 ދުވަސް ހަމަނުވި ނަމަވެސް، ދެ އިދާރާގެ ޖުމްލަ މަސައްކަތު ދުވަސް 90 އަށް އަރާނަމަ އަދި ޕީއޭތަކުން ނުވަތަ އެވްރެޖުން %85 ލިބިފައިވާނަމަ ކުރިއެރުން ލިބޭނެއެވެ.

• އެއް އިދާރާއެއްގައި 30 ދުވަހަށް ވުރެ ކުރު މުއްދަތެއް ހޭދަވުމުން ޕީއޭ ފުރިހަމަނުވި ނަމަވެސް، އަނެއް އިދާރާގެ ޕީއޭއިން %85 މާކްސް ލިބި، ޖުމްލަ 90 ދުވަސް ހަމަވާނަމަ ކުރިއެރުން ދެވޭނެއެވެ.

• ދެ އިދާރާގައި މަސައްކަތްކޮށް 90 ދުވަސް ހަމަވެ، ދެ އިދާރާއިން ވެސް ޕީއޭ ހަދާފައިވާނަމަ، ކުރިއެރުން ދޭނީ ދެ ޕީއޭގެ އެވްރެޖުން %85 ނުވަތަ އެއަށްވުރެ މަތިން މާކްސް ލިބުމުންނެވެ.

މި އުޞޫލުގެ ދަށުން "މަޤާމުގެ އެލަވަންސް" ގެ ހަރުފަތްތަކަށް މުސާރައިގެ ކުރިއެރުން ދިނުމުގައި ދިވެހި ސިވިލް ސަރވިސްގެ ގަވާއިދު 2014 ގެ 88 އަދި 89 ވަނަ މާއްދާއަށް ރިޢާޔަތްކުރަންޖެހޭނެ ކަމަށް ވެސް އެ ކޮމިޝަނުން ކަނޑައަޅާފައިވެއެވެ.

މި ގެނެވުނު އިޞްލާޙުތަކުގެ ސަބަބުން، ވިހެއުމާ ގުޅިގެން ޗުއްޓީ ނަގާ އަންހެން މުވައްޒަފުންނަށާއި ދިގު ޗުއްޓީ ނަގަންޖެހޭ މުވައްޒަފުންނަށް ކުރިމަތިވަމުން ދިޔަ ދަތިތަކަށް ބޮޑު ހައްލެއް ލިބިގެންދާނެއެވެ.