ނަފްސާނީ ދުޅަހެޔޮކަމާމެދު ދެކޭ ނުރަނގަޅު ވިސްނުންތައް ދޫކޮށްލުމަށް މެޑަމް ސާޖިދާ ގޮވާލައްވައިފި

ދުނިޔޭގެ ނަފްސާނީ ދުޅަހެޔޮކަމުގެ ދުވަހުގެ މުނާސަބަތުގައި، ނަފްސާނީ ބަލިތަކާއި ދަތިތައް ތަހައްމަލުކުރަމުންދާ ފަރާތްތަކާމެދު މުޖުތަމައުގައި އޮންނަ ނޭދެވޭ ވިސްނުންތައް ނައްތާލައި، އެފަދަ ފަރާތްތަކަށް އަޅާލުމާއި އެއްބާރުލުން އިތުރުކުރުމަށް ރައީސުލްޖުމްހޫރިއްޔާގެ އަނބިކަނބަލުން މެޑަމް ސާޖިދާ މުޙައްމަދު ގޮވާލައްވައިފިއެވެ.

މިއަދު ފާހަގަކުރަމުންދާ ދުނިޔޭގެ ނަފްސާނީ ދުޅަހެޔޮކަމުގެ ދުވަހާ ގުޅިގެން ސޯޝަލް މީޑިއާ ޕްލެޓްފޯމް 'އެކްސް' ގައި ކުރެއްވި ޕޯސްޓެއްގައި އެކަމަނާ ވިދާޅުވީ، ކޮންމެ މީހެއްގެ ވެސް ނަފްސާނީ ދުޅަހެޔޮކަމަކީ އެމީހަކަށް ލިބޭ އަޅާލުމާއި، ދިރިއުޅޭ މާހައުލާއި، އަދި އެހެން މީހުންނާ އޮންނަ ގުޅުންތަކުގެ މައްޗަށް ބިނާވެފައިވާ ކަމެއް ކަމަށެވެ. އަދި އާއިލާގެ ތެރެއިންނާއި، ސްކޫލްތަކާއި މަސައްކަތުގެ މާހައުލުގެ އިތުރުން މުޅި މުޖުތަމައުގެ ތެރޭގައި ކުރެވޭ ތަޖުރިބާތަކަކީ ނަފްސާނީ ދުޅަހެޔޮކަމަށް ވަރަށް ބޮޑަށް އަސަރުކުރާ ކަންކަން ކަމުގައި އެކަމަނާ ފާހަގަކުރެއްވިއެވެ.

މީގެއިތުރުން، އެކަކު އަނެކަކަށް ހެޔޮހިތުން އަޑުއަހައި، ދޭ އެއްބާރުލުމަކީ ނަފްސާނީ ދުޅަހެޔޮކަން ރަނގަޅުކުރުމަށް ވަރަށް ބޮޑު ބަދަލެއް ގެނެސްދޭނެ ކަމެއް ކަމަށް މެޑަމް ސާޖިދާ ވިދާޅުވިއެވެ. އަދި މިފަދަ ދަތިތައް ތަހައްމަލުކުރަމުންދާ ފަރާތްތަކުގެ ތަޖުރިބާތައް ބަލައިގަތުމަކީ މުހިންމު ކަމެއް ކަމަށާއި، އެ ފަރާތްތަކަށް ބޭނުންވާ ހަގީގީ އެހީތެރިކަން ދެނެގަނެވޭނީ އެމީހުންގެ އިހުސާސްތައް ދެނެގަނެވިގެން ކަމަށްވެސް އެކަމަނާ ވިދާޅުވިއެވެ.

ރައީސުލްޖުމްހޫރިއްޔާގެ އަނބިކަނބަލުން ވަނީ ނަފްސާނީ މައްސަލަތަކާ ގުޅުވައިގެން ވާހަކަދެއްކުމުގައި ބޭނުންކުރާ ބަސްމަގާއި މީހުންގެ ވިސްނުން ބަދަލުކުރުމަށް ބާރުއަޅުއްވާފައެވެ. އަދި ނަފްސާނީ ދަތިތަކާ ކުރިމަތިލާންޖެހޭ ހިނދު، އެހީތެރިކަން ހޯދުމަށް ފަސްނުޖެހުމަށާއި، ކޮންމެ މީހަކަށްވެސް އެހީތެރިކަން ލިބެންހުރިކަން ދަނެ، ހޭލުންތެރިކަން އިތުރުކުރުމުގެ މުހިންމުކަން އެކަމަނާ ފާހަގަކުރެއްވިއެވެ.

މެޑަމް ސާޖިދާ އިލްތިމާސްކުރެއްވީ، އެއްވެސް ޖެހިލުމެއްނެތި، އަދި ފާޑުކިޔުންތަކަށް ބިރުގަތުމެއްނެތި އެމީހުންގެ އުނދަގޫތަކުގެ ވާހަކަ ހިއްސާކުރެވޭނެ ފަދަ އޯގާތެރި މާހައުލެއް ބިނާކުރުމަށް މުޅި މުޖުތަމައު އެކުގައި މަސައްކަތް ކުރުމަށެވެ.

ދުނިޔޭގެ ނަފްސާނީ ދުޅަހެޔޮކަމުގެ ދުވަހުގެ ގޮތުގައި ފާހަގަކުރަނީ ކޮންމެ އަހަރެއްގެ ވެސް އޮކްޓޫބަރު މަހުގެ 10 ވަނަ ދުވަހެވެ. މި ދުވަސް ފާހަގަކުރުމުގެ މައިގަނޑު މަގުސަދަކީ ނަފްސާނީ މައްސަލަތަކާމެދު އާންމުން ހޭލުންތެރިކުރުވައި، ނަފްސާނީ ދުޅަހެޔޮކަން ކުރިއެރުވުމަށް ބައިނަލްއަގުވާމީ ފެންވަރުގައި ކުރެވޭ މަސައްކަތްތައް އިތުރުކުރުމެވެ.