މިނިސްޓަރ ޒަމީރު ސަޢޫދީ ޢަރަބިއްޔާއަށް ކުރެއްވި ރަސްމީ ދަތުރުފުޅު ނިންމަވާލައްވައިފި

ސަޢޫދީ ޢަރަބިއްޔާގެ މިނިސްޓަރ އޮފް ފޮރިން އެފެއާޒް ހިޒް ހައިނެސް ޕްރިންސް ފައިސަލް ބިން ފަރްހާން އަލް ސުއާދުގެ ދަޢުވަތަކަށް ރާއްޖޭގެ ޚާރިޖީ ވަޒީރު މޫސާ ޒަމީރު ސަޢޫދީ ޢަރަބިއްޔާއަށް ކުރެއްވި ރަސްމީ ދަތުރުފުޅަށްފަހު ނިންމަވާލައްވައި ރިޔާދްއިން ފުރާވަޑައިގެންފިއެވެ.

މި ދަތުރުފުޅުގައި މިނިސްޓަރ ޒަމީރު ވަނީ ސައޫދީ އަރަބިއްޔާގެ ޚާރިޖީ ވަޒީރާ ބައްދަލުކުރައްވައި ސަޢޫދީ ޢަރަބިއްޔާގެ ވަލީއަހުދު އަދި ބޮޑުވަޒީރު، ހިޒް ރޯޔަލް ހައިނެސް ޕްރިންސް މުޙައްމަދު ބިން ސަލްމާން ބިން ޢަބްދުލްޢަޒީޒް އަލްސަޢުދަށް ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ފަރާތްޕުޅުން ފޮނުއްވި ސިޓީފުޅެއް އަރުވާފައެވެ.

މިނިސްޓަރ ޒަމީރު ވަނީ ސަޢޫދީ ޢަރަބިއްޔާގެ ޚާރިޖީ ވަޒީރަށް ރާއްޖެއާއި ސައުދިއަރަބިއްޔާ ދެމެދު އޮންނަ ގާތް ގުޅުން އާ އުސްމިންތަކަކަށް ގެންދިއުމަށް ދިވެހި ސަރުކާރުން މަސައްކަތްކުރައްވާނެކަމުގެ ޔަޤީންކަން ދެއްވާފައެވެ. އަދި ސަޢޫދީ ޢަރަބިއްޔާއަކީ ރާއްޖޭގެ ތަރައްޤީގެ މުހިންމު ބައިވެރިއެއްގެ ގޮތުގައި ފާހަގަކުރައްވައި މިނިސްޓަރ ވަނީ ސަޢުދީސަރުކާރަށް ޝުކުރު އަދާކުރައްވާފައެވެ. އަދި ރާއްޖެއާއި ސަޢޫދީ ޢަރަބިއްޔާއާ ދެޤައުމުގެ ދެމެދުގައި އޮތް އެކުވެރިކަމުގެ ގުޅުން އިތުރަށް ބަދަހިކުރުމަށް ދިވެހި ސަރުކާރުން ގުޅިގެން މަސައްކަތްކުރައްވާނެކަމުގެ ޔަޤީންކަންވެސް މިނިސްޓަރ އެރުވިއެވެ.

މިދަތުރުފުޅުގައި މިނިސްޓަރ ޒަމީރުވަނީ ސަޢޫދީ ޢަރަބިއްޔާގެ އެސިސްޓެންޓް މިނިސްޓަރ އޮފް އިންވެސްޓްމަންޓް އަދި ޑެޕިއުޓީ މިނިސްޓަރ އޮފް ފިނޭންސް ފޮރ އިންޓަރނޭޝަނަލް ރިލޭޝަންސްގެ ބައްދަލުކުރެއްވުމުގެ އިތުރުން، ސަޢޫދީ މަރުކަޒީ ބޭންކުގެ ގަވަރުނަރާއި، ، ސަޢޫދީ ފަންޑް ފޮރ ޑިވެލޮޕްމަންޓްގެ ސީއީއޯ އާވެސް ބައްދަލުކުރައްވާފައެވެ. އަދި ރިޔާދުގައި ދިރިއުޅޭ ދިވެހި ރައްޔިތުންނާ ބައްދަލުކުރައްވާފައިވެއެވެ.

މިނިސްޓަރ ޒަމީރު ސަޢޫދީ ޢަރަބިއްޔާއަށް ކުރައްވަމުން ގެންދަވާ ރަސްމީ ދަތުރުފުޅުގައި މިނިސްޓަރ ޒަމީރުގެ އަރިހުގައި މޯލްޑިވްސް މަނިޓަރީ އޮތޯރިޓީގެ ގަވަރުނަރު އަލްފާޟިލް އަޙްމަދު މުނައްވަރު، އެމްބެސެޑަރ އެޓް ލާޖް އަޙްމަދު ނަސީރް، މޯލްޑިވްސް އެއަރޕޯޓްސް ކޮމްޕެނީ ލިމިޓެޑްގެ މެނޭޖިންގ ޑިރެކްޓަރ އަލްފާޟިލް އިބްރާހިމް ޝަރީފް މުޙައްމަދު، ޖޮއިންޓް ސެކްރެޓަރީ އަލްފާޟިލާ ބަދުރާ ސަޢީދު، އަދި ޑިރެކްޓަރ ޖެނެރަލް އަލްފާޟިލާ ޢާއިޝަތު ފަރީނާ ކައުންސެލަރ އަހުމަދު ފަޒީލް އަދި ސެކަންޑް ސެކްރެޓަރީ ނަފްހާ ހަސަން ބައިވެރިވެވަޑައިގެންނެވިއެވެ.