މެލޭޝިޔާގެ ބޮޑުވަޒީރުގެ ދަތުރުފުޅަކީ ދެ ޤައުމުގެ ގުޅުމުގެ އައު ބާބެއް: ރައީސް ޑރ. މުޢިއްޒު

މެލޭޝިޔާގެ ބޮޑުވަޒީރު އަންވަރު އިބްރާހީމް ރާއްޖެއަށް ކުރެއްވި ފުރަމާނަ ދަތުރުފުޅަކީ ދެ ޤައުމުގެ ދެމެދުގައިވާ ޒަމާންވީ އެކުވެރިކަމުގެ ގުޅުމުގައި ހުޅުވިގެންދިޔަ އައު ބާބެއް ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.

ރައީސުލްޖުމްހޫރިއްޔާ މިހެން ވިދާޅުވީ މެލޭޝިޔާގެ ބޮޑުވަޒީރުގެ މި ދަތުރުފުޅާ ގުޅިގެން މީސްމީޑިއާގައި ހިއްސާކުރެއްވި މެސެޖެއްގައެވެ. ރައީސްގެ މެސެޖުގައި، ބޮޑުވަޒީރު އަންވަރު އިބްރާހީމަށް ރާއްޖެއިން މަރުޙަބާ ދެންނެވުމަކީ ލިބިވަޑައިގެންނެވި ވަރަށް ބޮޑު ޝަރަފެއް ކަމަށް ފާހަގަކުރެއްވިއެވެ.

ދެ ޤައުމުގެ ދެމެދުގައި ބޭއްވުނު ރަސްމީ މަޝްވަރާތަކަކީ ވަރަށް ކާމިޔާބު މަޝްވަރާތަކެއްކަން ފާހަގަކުރައްވަމުން ރައީސް ވިދާޅުވީ، މި ބައްދަލުވުންތަކުގެ ސަބަބުން މުސްތަޤްބަލުގައި ދެ ޤައުމުގެ ގުޅުން އިތުރަށް ބަދަހިކުރުމަށް ވަރުގަދަ ބިންގަލެއް އެޅިގެން ގޮސްފައިވާ ކަމަށެވެ. އެގޮތުން ވިޔަފާރިއާއި އިންވެސްޓްމަންޓް، ތަޢުލީމު، ޞިއްޙަތު، ފަތުރުވެރިކަން، ދެމެހެއްޓެނިވި ތަރައްޤީ، އިސްލާމީ ކަންކަން އަދި ދިފާޢީ ދާއިރާއިން އެއްބާރުލުން އިތުރުކުރުމަށް ދެ ޤައުމުން އެއްބަސްވެފައިވާ ކަމަށް ރައީސް ވިދާޅުވިއެވެ.

މީގެއިތުރުން، ދެ ޤައުމުގެ މަރުކަޒީ ބޭންކުތައް މެދުވެރިކޮށް 100 މިލިއަން އެމެރިކާ ޑޮލަރުގެ ކުރު މުއްދަތުގެ ކަރަންސީ ސްވަޕް ފެސިލިޓީއެއް ދިނުމާމެދު ވިސްނަވާނެ ކަމަށް މެލޭޝިޔާގެ ބޮޑުވަޒީރު ނިންމެވި ނިންމެވުމަށް ރައީސް ވަނީ ޚާއްޞަ ޝުކުރެއް އަދާކުރައްވާފައެވެ. އަދި ދެ ޤައުމުގެ ދެމެދުގައި ޕްރިފަރެންޝަލް ޓްރޭޑް އެގްރީމަންޓް (ޕީޓީއޭ) އެއް އެކުލަވާލުމުގެ މަޝްވަރާތައް ފެށުމަށް މެލޭޝިޔާ ސަރުކާރުން އުސޫލެއްގެ ގޮތުން އެއްބަސްވެފައިވާތީ އެކަމަށްވެސް ރައީސް މަރުޙަބާ ވިދާޅުވިއެވެ. މި ފިޔަވަޅުތަކުގެ ސަބަބުން ދެ ޤައުމުގެ އިޤްތިޞާދީ ގުޅުން އިތުރަށް ވަރުގަދަވެ، ވިޔަފާރިތަކަށާއި ރައްޔިތުންނަށް އައު ފުރުޞަތުތަކެއް ފަހިވެގެންދާނެ ކަމަށް ރައީސް ފާހަގަކުރެއްވިއެވެ.

ހަމައެއާއެކު، ޕީއެންސީގެ ޤައުމީ މަހާސިންތާއާ ދިމާކޮށް މެލޭޝިޔާގެ ބޮޑުވަޒީރު ފޮނުއްވެވި ތާއީދާއި ހިތްވަރުގެ މެސެޖަށްވެސް ރައީސުލްޖުމްހޫރިއްޔާ ވަނީ ޝުކުރު އަދާކުރައްވާފައެވެ.

ރައީސް މުޢިއްޒުގެ މެސެޖު ނިންމަވާލައްވަމުން ވިދާޅުވީ، ދެ ޤައުމުގެ ރައްޔިތުންގެ ލާބައާއި މަންފާއަށްޓަކައި ރާއްޖެއާއި މެލޭޝިޔާއާ ދެމެދު އޮތް އަޚުވަންތަ ގުޅުން ކުރިމަގުގައި އައު އުސްމިންތަކަކަށް ވާސިލްވާނެ ކަމުގެ ފުރިހަމަ ޔަޤީންކަން އެބައޮތް ކަމަށާއި، ދެ ޤައުމުގެ ގުޅުން އަހަރުން އަހަރަށް އިތުރަށް ބަދަހިވަމުންދާނެ ކަމަށް އުންމީދު ކުރައްވާ ކަމަށެވެ.