އައްޑޫގައި ކުށްކުރުމަށް ބޭނުންކުރާ ގެއެއް ބަންދުކޮށްފި

އައްޑޫ ސިޓީ ހިތަދޫގައި ވައްކަމާއި، ފޭރުމާއި އަދި މަސްތުވާތަކެތި ބޭނުންކުރުން ފަދަ އެކި ކުށްތަކަށް އަރައިގަތުމަށް ބޭނުންކުރަމުންދިޔަ ގެއެއް، ކޯޓު އަމުރެއްގެ ދަށުން ފުލުހުން ބަންދުކޮށްފިއެވެ.

ފުލުހުން ހާމަކޮށްފައިވާ ގޮތުގައި، ސ. ހިތަދޫ މެޖިސްޓްރޭޓް ކޯޓުން ނެރުނު އަމުރެއްގެ ދަށުން ބަންދުކޮށްފައިވަނީ އެ ރަށު "ލާމިޔާގެ" އެވެ. މި ގެ ބަންދުކޮށްފައިވަނީ މި ޖޫން މަހުގެ 8 ވަނަ ދުވަހުން ފެށިގެން އަންނަ ސެޕްޓެމްބަރު މަހުގެ 6 ވަނަ ދުވަހުގެ ނިޔަލަށް، ޖުމުލަ 90 ދުވަހުގެ މުއްދަތަށެވެ.

މި ފިޔަވަޅާ ގުޅޭގޮތުން ފުލުހުން ބުނީ، ލާމިޔާގެއަކީ ގަވާއިދާ ހިލާފު ކަންކަން ކުރުމަށް ބޭނުންކުރާ ތަނެއްގެ ގޮތުގައި ފާހަގަކުރެވިފައިވާ ތަނެއް ކަމަށެވެ. އަދި އެ ގޭގައި ހިންގާ ނޭދެވޭ އަމަލުތަކުގެ ސަބަބުން އާންމުންނަށް ބޮޑެތި އުނދަގޫތަކެއް ކުރިމަތިވަމުންދާތީ، އެކި ފަހަރުމަތިން ފުލުހުންނަށް ޝަކުވާ ހުށަހަޅާފައިވާ ކަމަށްވެސް ފުލުހުން ބުންޏެވެ. މި ގެ ބަންދުކުރީ އެ ސަރަހައްދުގައި ދިރިއުޅޭ ރައްޔިތުންނަށް ދިމާވެފައިވާ މި މައްސަލައަށް ދާއިމީ ހައްލެއް ހޯދައިދިނުމުގެ މަގުސަދުގައެވެ.

ކޯޓު އަމުރުގެ ދަށުން ބަންދުކޮށްފައިވާ މުއްދަތުގައި، އެއްވެސް ފަރާތަކުން ހުއްދައާ ނުލައި އެ ތަނަށް ވަދެނިކުމެ ހެދުމަކީ ގާނޫނީ ގޮތުން ކުށެކެވެ. ފުލުހުން ވަނީ މިފަދަ ތަންތަނަށް ހުއްދަ ނެތި ވަންނަ މީހުންނާއި، ތަނުގެ ސިލްއަށް ނުވަތަ ތަނަށް ގެއްލުންދޭ ފަރާތްތަކާމެދު ގާނޫނުގެ ދަށުން އެޅޭނެ އެންމެ ހަރުކަށި ފިޔަވަޅު އަޅާނެ ކަމުގެ އިންޒާރު ދީފައެވެ.

މަސްތުވާތަކެއްޗާ ބެހޭ ގާނޫނަށް ގެނައި އިސްލާހާއެކު، މަސްތުވާތަކެތި ބޭނުންކުރާ ތަންތަން 24 ގަޑިއިރަށް ބަންދުކުރުމުގެ ނޯޓިސް ނެރުމުގެ ބާރު ފުލުހުންނަށް ވަނީ ލިބިދީފައެވެ. އަދި މިފަދަ ތަންތަން ގިނަވެގެން ތިން މަސް ދުވަހަށް ބަންދުކުރުމުގެ އަމުރު ނެރުމުގެ ބާރު ކޯޓުތަކަށް ލިބިދީފައިވަނީ މިއަހަރުގެ މާރިޗު މަހުގެ 7 ވަނަ ދުވަހުން ފެށިގެންނެވެ.

މިއީ އައްޑޫ ސިޓީގައި މިގޮތަށް "ޑްރަގް ކެފޭ" އެއް ބަންދުކުރި ފުރަތަމަ ފަހަރެވެ. މީގެކުރިން ފުވައްމުލައް ސިޓީގެ ފުނާޑު އަވަށުގައި ހުންނަ "ގުލިސްތާނުގެ" ވެސް ވަނީ މިފަދަ އަމުރެއްގެ ދަށުން 85 ދުވަހަށް ބަންދުކޮށްފައެވެ.

ފުލުހުން ބުނީ މަސްތުވާތަކެތީގެ ވިޔަފާރި ހުއްޓުވުމަށާއި، އެފަދަ ތަކެތި ބޭނުންކުރާ ތަންތަން ހޯދައި ބަންދުކުރުމަށް ކުރަމުންދާ މަސައްކަތްތައް މުޅި ރާއްޖޭގައިވެސް ހުއްޓުމެއްނެތި ކުރިއަށް ގެންދާނެ ކަމަށެވެ.