ދުނިޔޭގެ ފުޓްބޯޅަ އީދުގެ ޓެކްނޮލޮޖީ ބަލަހައްޓަން ކުޅަދާނަ ދިވެއްސެއް!

އެމެރިކާގައި ދިރިއުޅޭ ދިވެހި އައިޓީ މާހިރެއް ކަމަށްވާ މުޙައްމަދު ޝާހީން، ފީފާ ވޯލްޑް ކަޕްގެ ހޮސްޕިޓަލިޓީ އޮޕަރޭޝަންތަކުގެ އިސް މަޤާމަކަށް އައްޔަންކޮށްފިއެވެ. އޭނާ އައްޔަންކޮށްފައިވަނީ ވޯލްޑް ކަޕްގެ ރަސްމީ ހޮސްޕިޓަލިޓީ ޕާޓްނަރު ކަމަށްވާ "އޮން ލޮކޭޝަން" ގެ ލީޑް ވެނިއު ޓެކްނޮލޮޖީގެ މަޤާމަށެވެ.

"އޮން ލޮކޭޝަން" އަކީ އެމެރިކާ، މެކްސިކޯ އަދި ކެނެޑާގައި ބޭއްވުމަށް ހަމަޖެހިފައިވާ ވޯލްޑް ކަޕްގެ ފީފާ އޮފިޝަލުންނާއި، ސްޕޮންސަރުންނާއި، ކޯޕަރޭޓް ކްލަޔަންޓުންގެ އިތުރުން ޓްރެވަލް ޕްރޮގްރާމްތަކަށް ބޭނުންވާ ހޮސްޕިޓަލިޓީ ޚިދުމަތްތައް ރޭވުމާއި ފޯރުކޮށްދިނުމުގެ މައިގަނޑު ޒިންމާ އުފުލާ ކުންފުންޏެވެ. މީގެ ކުރިން އޮލިމްޕިކް ގޭމްސް އަދި ސުޕަރ ބޯލް ފަދަ ބައިނަލްއަޤްވާމީ ބޮޑެތި ކުޅިވަރު ހަރަކާތްތަކުގައިވެސް މި ކުންފުނިން ވަނީ މިފަދަ ޚިދުމަތްތައް ފޯރުކޮށްދީފައެވެ.

މިދިޔަ އޭޕްރީލް މަހު މި މުހިންމު މަޤާމާ ހަވާލުވި ޝާހީންގެ ޒިންމާތަކުގެ ތެރޭގައި، މުބާރާތް ބާއްވާ ސްޓޭޑިއަމްތަކުގައި ޓެކްނޮލޮޖީގެ ޚިދުމަތްތައް ރޭވުމާއި، މެނޭޖްކުރުމާއި، އަދި ހޮސްޕިޓަލިޓީ ޕްރޮގްރާމްތަކަށް ބޭނުންވާ އައިޓީ ސިސްޓަމްތަކާއި އިންފްރާސްޓްރަކްޗާ އެއްވެސް މައްސަލައެއް ނުޖެހި ހިނގާތޯ ކަށަވަރުކުރުން ހިމެނެއެވެ.

އައިޓީ ދާއިރާގައި 25 އަހަރަށްވުރެ ގިނަ ދުވަހުގެ ތަޖުރިބާ ހުރި ޝާހީން އަކީ ސިސްޓަމް އެޑްމިނިސްޓްރޭޝަނާއި، ނެޓްވޯކް މެނޭޖްމަންޓް އަދި ޓެކްނިކަލް ސަޕޯޓުގެ ދާއިރާއިން ފުންނާބު އުސް މާހިރެކެވެ. އޭނާ ވަނީ މީގެ ކުރިންވެސް އެމެރިކާގެ ފާހަގަކޮށްލެވޭ ގިނަ ކުންފުނިތަކެއްގައި މަސައްކަތް ކުރައްވާފައެވެ.

މިއީ ފީފާ ވޯލްޑް ކަޕެއްގެ މިފަދަ އިސް މަޤާމަކަށް ދިވެއްސަކު އައްޔަންވި ފުރަތަމަ ފަހަރެވެ. މީގެ ކުރިން ދުނިޔޭގެ ފުޓްބޯޅަ މުބާރާތެއްގައި ދިވެއްސަކު އެންމެ އުހުގައި ފާހަގަކުރެވިފައިވަނީ 2002 ވަނަ އަހަރުގެ ވޯލްޑް ކަޕްގައެވެ. އެ މުބާރާތުގެ ބައެއް މެޗުތަކުގައި ދިވެހި ރެފްރީ އެސިސްޓެންޓް މުޙައްމަދު ސައީދު ވަނީ ލައިންސްމަނެއްގެ ގޮތުގައި ހަރަކާތްތެރިވެފައެވެ.