ބަލިތަކުން ރައްކާތެރިވުމަށް އެޗްޕީއޭއިން އިލްތިމާސްކޮށްފި

ރާއްޖޭގެ އެކި ހިސާބުތަކުގައި ޑެންގީ ހުން، އަރިދަފުސް ރޯގާ އަދި އިންފްލުއެންޒާ ފެތުރޭ މިންވަރު އިތުރުވަމުންދާތީ، ރައްކާތެރިކަމުގެ ފިޔަވަޅުތައް އެޅުމަށް ހެލްތު ޕްރޮޓެކްޝަން އެޖެންސީ (އެޗްޕީއޭ) އިން އިލްތިމާސްކޮށްފިއެވެ. އެ އެޖެންސީން ނެރުނު ނޫސްބަޔާނެއްގައިވާ ގޮތުން، މި ބަލިތަކުގެ އިތުރުން މާލެ ސަރަހައްދުގައި ހިމަބިހީގެ ކޭސްތަކެއް ވެސް ވަނީ ފެނިފައެވެ.

އެޗްޕީއޭއިން ހާމަކުރި ގޮތުގައި، ކުރިއަށް އޮތީ އީދު ބަންދުގެ ދުވަސްވަރު ކަމަށްވުމުން، ރާއްޖޭގެ ބޭރަށާއި އަތޮޅުތެރެއަށް ދަތުރުފަތުރުކުރުން އިތުރުވެ، މީހުން އެއްވެ އުޅޭ ތަންތަނަށް ދިއުން ގިނަވާނެތީ ބަލިތައް ފެތުރުމުގެ ފުރުސަތު ބޮޑެވެ. އެހެންކަމުން، ބަލިތަކުން ރައްކާތެރިވުމަށްޓަކައި އަންނަނިވި ކަންކަމަށް ސަމާލުކަން ދިނުމަށް އެޗްޕީއޭއިން ވަނީ އެދިފައެވެ:

ބަލިތަކުން ރައްކާތެރިވުމަށް ކުރެވިދާނެ ކަންތައްތައް:

• ބަލީގެ އަލާމާތް ހުރިނަމަ މަޑުކުރުން: ހުންއައިސް ނުވަތަ ނޭވާލާ ނިޒާމުގެ ބައްޔެއްގެ އަލާމާތެއް ހުރިނަމަ، ގޭގައި މަޑުކުރުމަށާއި އާންމު އެއްވުންތަކަށް ނުދިއުމަށް އިލްތިމާސްކުރެއެވެ.

• ސިއްހީ ފަރުވާ ހޯދުން: ބަލިޖެހި ހާލަތު ގޯސްވާނަމަ ލަސްނުކޮށް ސިއްހީ ފަރުވާ ހޯދަންވާނެއެވެ. އަދި ފަރުވާ ހޯދަންދާއިރު މާސްކު އެޅުމަށް ސަމާލުކަން ދޭންޖެހެއެވެ.

• ހިމަބިހި ޓެސްޓުކުރުން: ހިމަބިހިއަށް ޝައްކުވެގެން ޓެސްޓެއް ހަދާފައިވާނަމަ، ނަތީޖާ ލިބެންދެން ގޭގައި މަޑުކުރަންވާނެއެވެ.

• މާސްކު އެޅުން: އެއާޕޯޓު ޓާމިނަލް، ފެރީ ލައުންޖު އަދި އާންމު ދަތުރުފަތުރުކުރާ އުޅަނދުފަހަރު ފަދަ މީހުން ގިނަ ތަންތަނުގައި މާސްކު އެޅުމަކީ މުހިންމު ކަމެކެވެ.

• އަތްދޮވުން: ސައިބޯނިލައިގެން ގަވާއިދުން އަތްދޮވުން ނުވަތަ ސެނިޓައިޒާ ބޭނުންކުރުން އާދަކުރަންޖެހެއެވެ.

• ވެކްސިން ފުރިހަމަކުރުން: ވެކްސިނުން ރައްކާތެރިވެވޭ ބަލިތަކަށް ވެކްސިންގެ ޑޯޒްތައް ފުރިހަމަކުރުމަށް އެޗްޕީއޭއިން ބާރުއަޅައެވެ.

މަދިރީގެ ޒަރީޢާއިން ޖެހޭ ބަލިތަކުން ރައްކާތެރިވުން:
މަދިރި ހެފުމުން ރައްކާތެރިވުމަށް DEET، IR3535 ނުވަތަ Icaridin އެކުލެވޭ މަދިރި ލޯޝަން ނުވަތަ ސްޕްރޭ ބޭނުންކުރުމަށް ވަނީ އިލްތިމާސްކޮށްފައެވެ. މީގެ އިތުރުން ހަށިގަނޑު ބޮޑަށް ނިވާވާގޮތަށް ހެދުން އެޅުމާއި، ގެއާއި ގޯތިތެރޭގައި މަދިރި އުފެދޭ ތަންތަން ނައްތާލުމަށް ވެސް އެ އެޖެންސީން ވަނީ އެދިފައެވެ.

އެޗްޕީއޭއިން ވަނީ އާންމު ސިއްހަތާ ގުޅުންހުރި މައުލޫމާތު ހޯދުމުގައި ރަސްމީ ވަސީލަތްތަކުން ހިއްސާކުރާ މައުލޫމާތަށް ބަރޯސާވުމަށް މީޑިއާތަކަށާއި އާންމު ރައްޔިތުންނަށް އިލްތިމާސްކޮށްފައެވެ.