2028 ގެ ރިޔާސީ އިންތިހާބުގައި ވާދަކުރެއްވުމަށް ރައީސް މުޢިއްޒަށް ދައުވަތު އެރުވުމަށް ޕީއެންސީން ހާއްސަ ގަރާރެއް ހުށަހަޅައިފި

ރިޔާސީ ދެވަނަ ދައުރަކަށް ވާދަކުރެއްވުމަށް ޕީޕަލްސް ނެޝަނަލް ކޮންގްރެސް (ޕީއެންސީ) ގެ ރައީސް އަދި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒަށް ދައުވަތު އެރުވުމަށް އެދި، އެ ޕާޓީގެ މަތީ މަޖިލީހަށް ހާއްސަ ގަރާރެއް ހުށަހަޅައި ބަހުސް ފަށައިފިއެވެ.

ރައްޔިތުންގެ މަޖިލީހުގެ ރައީސް އަދި ޕީއެންސީގެ ޗެއާޕާސަން ޢަބްދުއްރަޙީމް ޢަބްދުﷲ ރިޔާސަތު ބެލެހެއްޓެވި މަތީ މަޖިލީހުގެ ބައްދަލުވުމުގައި މި ގަރާރު ހުށަހަޅުއްވައިދެއްވީ ޕާޓީގެ މެންބަރު ޢަބްދުﷲ އިބްރާހީމެވެ.

ހުށަހެޅުނު ގަރާރުގައި ފާހަގަކޮށްފައިވާ ގޮތުގައި، 2023 ވަނަ އަހަރު ވެރިކަމާ ހަވާލުވެވަޑައިގަތުމަށްފަހު ރައީސް ޑރ. މުޢިއްޒު ގެންދަވަނީ ދިވެހިރައްޔިތުން ފަޚުރުވެރިވާ ފަދަ ގައުމީ އަދި އަގުހުރި މަސައްކަތްޕުޅުތަކެއް ކުރައްވަމުންނެވެ. އެގޮތުން ދިވެހިރާއްޖޭގެ މިނިވަންކަމާއި ސިޔާދަތު ކަށަވަރުކުރައްވައި، ރާއްޖޭގެ ފަސްގަނޑުގައި ބޭރުގެ އެއްވެސް އަސްކަރިއްޔާއެއް ނެތްކަން ކަށަވަރުކޮށްދެއްވުމާއި، ޒަމާނީ ވަސީލަތްތަކާއެކު ރާއްޖޭގެ ކަނޑުގެ ސަރަހައްދު ބެލެހެއްޓުމުގެ ގާބިލުކަން އަމިއްލައަށް ގާއިމުކުރެއްވިކަން ވަނީ ފާހަގަކޮށްފައެވެ. މީގެއިތުރުން 'ދިވެހިންގެރާއްޖެ' ތަސައްވުރު ހަގީގަތަކަށް ހެއްދެވުމަށްޓަކައި އިގްތިސާދު ހަމަމަގަށް އަޅުއްވަން އެޅުއްވި ހަރުދަނާ މާލީ ފިޔަވަޅުތައް ވެސް ގަރާރުގައި އަލިއަޅުވާލާފައިވެއެވެ.

އަދި ހަމައެހެންމެ، އިގްތިސާދު ސިންދަފާތުކޮށް މަސްވެރިކަމާއި ދަނޑުވެރިކަން ކުރިއެރުވުމާއި، ބޯހިޔާވަހިކަމުގެ ދަތިކަން ހައްލުކުރުމަށް ގެންގުޅުއްވާ ހަރުދަނާ ސިޔާސަތުތަކާއި، ގަވާއިދާ ހިލާފަށް އުޅޭ ބިދޭސީންގެ މައްސަލައާއި މަސްތުވާތަކެތީގެ ވަބާއާ ދެކޮޅަށް ކުރައްވާ މަސައްކަތްތައް ގަރާރުގައި ބަޔާންކޮށްފައިވެއެވެ. ބައިނަލްއަގްވާމީ މައިދާނުގައި އިސްލާމްދީނުގެ ހައްގުގައްޔާއި، ފަލަސްޠީނުގެ އަހުންނާއި އުޚުތުންގެ ހައްގުގައި ރައީސް ވަކާލާތު ކުރައްވަމުން ގެންދަވާ ގޮތަށް ވެސް މި ގަރާރުގައި ތައުރީފުކޮށްފައިވެއެވެ.

ގަރާރުގައި ބަޔާންކޮށްފައިވަނީ ޕީއެންސީގެ އަސާސީ ގަވާއިދުގެ 88 ވަނަ މާއްދާގެ ދަށުން، ރައީސުލްޖުމްހޫރިއްޔާ ކަމުގެ މަގާމުގައި ހުންނެވި ބޭފުޅަކު ދެވަނަ ދައުރަކަށް ކުރިމަތިލައްވަން އެދިވަޑައިގަންނަވާނަމަ، ޕްރައިމަރީއަކާ ނުލައި ޕާޓީގެ ރިޔާސީ ޓިކެޓް ލިބިވަޑައިގަންނަވާނެ ކަމަށެވެ. އެހެންކަމުން، ގައުމަށް ގެންނަވަމުންދާ ހަމަޖެހުމާއި ތަރައްގީގެ ދަތުރު ކުރިއަށް ގެންދިއުމަށްޓަކައި، 2028 ވަނަ އަހަރުގެ ރިޔާސީ އިންތިހާބުގައި ވާދަކުރެއްވުމަށް އެމަނިކުފާނަށް ރަސްމީކޮށް ދައުވަތު އެރުވުމަކީ ގައުމީ ވާޖިބެއް ކަމަށް ގަރާރުގައި ވަނީ ބުނެފައެވެ.

މިއީ 2028 ވަނަ އަހަރުގެ ރިޔާސީ އިންތިހާބުގައި ދެވަނަ ދައުރަކަށް ކުރިމަތިލެއްވުމަށް، ވެރިކަންކުރާ ޕީއެންސީގެ މެންބަރުންގެ ފަރާތުން ރައީސް ޑރ. މުޙައްމަދު މުޢިއްޒުގެ އަރިހުން ރަސްމީ ސިފައެއްގައި އެދުނު ފުރަތަމަ ފަހަރެވެ.