ޗީފް އިންސްޕެކްޓަރ ސާމިހު އަނެއްކާވެސް ހޮމިސައިޑް ޔުނިޓުގެ އިސްވެރިޔަކަށް އައްޔަންކޮށްފި

ފުލުހުންގެ އިދާރީ އޮނިގަނޑަށް ގެނައި ބަދަލުތަކާއެކު، މަރުގެ މައްސަލަތައް ތަހުގީގުކުރާ ހޮމިސައިޑް އެންޑް ޑެތު އިންވެސްޓިގޭޝަން ޔުނިޓުގެ އެންމެ އިސްވެރިޔާގެ މަގާމަށް ޗީފް އިންސްޕެކްޓަރ އޮފް ޕޮލިސް މުޙައްމަދު ސާމިހު އަލުން އައްޔަންކޮށްފިއެވެ.

ފުލުހުންގެ ތަރުޖަމާނު ސުޕްރިންޓެންޑެންޓް އޮފް ޕޮލިސް އަޙްމަދު ބާގިރު ވިދާޅުވި ގޮތުގައި، ސާމިހު މި މަގާމަށް އަލުން އައްޔަންކުރީ ފުލުހުންގެ އިދާރީ އޮނިގަނޑަށް ދާދިފަހުން ގެނައި ބަދަލުތަކާ ގުޅިގެންނެވެ. މިއީ ކުރީގެ ޕޮލިސް ކޮމިޝަނަރު އިސްމާޢީލް ނަވީން ރިޓަޔަރ ކުރެއްވި ފަހުން ފުލުހުންގެ އޮނިގަނޑަށް ގެނައި ފުރަތަމަ ބޮޑު ބަދަލެވެ.

ސާމިހު ކުރިން މި މަގާމުން ވަކިކޮށްފައިވަނީ 2025 އޭޕްރިލް 18 ވަނަ ދުވަހު މާލޭގެ އުސް އިމާރާތަކުން ހައްވާ ޔުމްނު ރަޝީދު ވެއްޓުނު ހާދިސާގެ ތަހުގީގު ފުލުހުން ކުރިއަށްގެންދިޔަ ގޮތާމެދު އާންމުންގެ ބޮޑެތި ފާޑުކިޔުންތަކާއި މުޒާހަރާތަކެއް ކުރިމަތިވުމާ ގުޅިގެންނެވެ. އެ ދުވަސްވަރު އޭނާ ބަދަލުކުރެވުނީ ސެންޓްރަލް އިންވެސްޓިގޭޝަން ކޮމާންޑްގެ ދަށުން ހިންގާ އިންވެސްޓިގޭޝަން ކޮލިޓީ ކޮންޓްރޯލް އެންޑް ކޮމްޕްލަޔަންސް ޔުނިޓަށެވެ.

ނަމަވެސް، އެ މަގާމުން ވަކިކުރިތާ ގާތްގަނޑަކަށް އަހަރެއްހާ ދުވަސް ފަހުން، ސާމިހު މިވަނީ އަނެއްކާވެސް މަރުގެ މައްސަލަތައް ތަހުގީގުކުރާ ޔުނިޓުގެ ހެޑްގެ ގޮތުގައި މަސައްކަތް ފައްޓަވާފައެވެ. ސާމިހަކީ މީގެ ކުރިންވެސް ގިނަ ދުވަސްތަކެއް ވަންދެން ހޮމިސައިޑް ޔުނިޓުގައި އިސް ދައުރެއް އަދާކުރައްވާފައިވާ ތަޖުރިބާކާރު އޮފިސަރެކެވެ.