ޕީއެންސީގެ ވެރިންނަށް ސަރުކާރުގެ އަދާހަމަތައް އެނގުން މުހިންމު: މުންދު

ވެރިކަން ކުރާ ޕީޕަލްސް ނޭޝަނަލް ކޮންގްރެސް (ޕީއެންސީ) ގެ ލީޑަރޝިޕާއި އެކި ދާއިރާތަކުގެ އިސްވެރިންނަށް ސަރުކާރުގެ މަޝްރޫޢުތަކުގެ އަދާހަމަތަކާއި ރައްޔިތުންގެ ކަންބޮޑުވުންތައް އެނގުމަކީ ނުހަނު މުހިންމު ކަމެއް ކަމަށް ރައީސް އޮފީހުގެ ތަރުޖަމާނު މުޙައްމަދު ޙުސައިން ޝަރީފް (މުންދު) ވިދާޅުވެއްޖެއެވެ.

މުންދު މިހެން ވިދާޅުވީ ޕީއެންސީގެ ދާއިރާތަކުގެ މަޤާމުތަކަށް އިންތިޚާބުވި ފަރާތްތަކަށް ޚާއްޞަކޮށްގެން ބޭއްވި ސެޝަންތަކާ ގުޅޭގޮތުން ވާހަކަދައްކަވަމުންނެވެ. އޭނާ ފާހަގަކުރެއްވި ގޮތުގައި، މި ސެޝަންތަކުގައި ބައިވެރިވި 1300 އެއްހާ މީހުންނަކީ ސަރުކާރު ހިންގާ ޕާޓީގެ އަދި ރައްޔިތުންގެ ވެރިންނެވެ. އެހެންކަމުން، ރަށްރަށުގައި ހިނގަމުންދާ ތަރައްޤީގެ މަޝްރޫޢުތަކުގެ އެންމެ ފަހުގެ މަޢުލޫމާތާއި، ރައްޔިތުންނަށް މުހިންމުވާ ކަންކަން ރަށުގެ ޒުވާނުންގެ ގޮފީގެ ރައީސުންނާއި، ސްޓިއަރިންގ ކޮމިޓީގެ ރައީސުންނާއި، ދާއިރާތަކުގެ ރައީސުން އަދި ނައިބު ރައީސުންނާއި މެންބަރުންނަށް އެނގެންޖެހެއެވެ.

މި އިންތިޚާބަކީ ރާއްޖޭގެ ސިޔާސީ ޕާޓީއަކުން ފުރަތަމަ ފަހަރަށް ޑިޖިޓަލްކޮށް ވޯޓުލުން ކުރިއަށްގެންދިޔަ ފަހަރުކަން ފާހަގަކުރައްވައި މުންދު ވިދާޅުވީ، މީގެ ސަބަބުން ވަރަށް ބޮޑަށް ވަގުތު ސަލާމަތްވެގެން ގޮސްފައިވާ ކަމަށެވެ. އަދި 4 ނުވަތަ 5 ދުވަހަށް ދިގުދެމިގެންދާ ގޮތަށް މި މަސައްކަތްތައް ބާއްވަނީ، ސެޕްޓެމްބަރު 2028 ގެ ރިޔާސީ އިންތިޚާބާ ހަމައަށް މި ހުރިހާ ބޭފުޅުން އެއްތަނަކުން ދެން ބައްދަލުވުމުގެ ފުރުޞަތު ކުޑަވާނެތީ، ޕާޓީގެ ވެރިންނަށް ސަރުކާރުގެ މަޢުލޫމާތުތައް ފުރިހަމައަށް އަދާހަމަކޮށްދިނުމަށް ކަމަށްވެސް އޭނާ ވިދާޅުވިއެވެ.

"ޕާޓީއަކީ ސަރުކާރަށް ލިބޭ އިތުރު ބާރަކަށް ވެފައި، ހަމައެއާއެކު ސަރުކާރު ޖަވާބުދާރީ ކުރުވާ ބަޔަކަށް ވާންޖެހޭ. މިއީ ވަރަށް އިންޓަރެކްޓިވް ޕްރޮސެސްއެއް،" މުންދު ވިދާޅުވިއެވެ.

މީގެއިތުރުން، ޕާޓީގެ އަސާސީ ޤަވާއިދަށް މުހިންމު ބަދަލުތަކެއް ގެނެވިފައިވާކަން ފާހަގަކުރައްވަމުން މުންދު ވިދާޅުވީ، ކުރިން 4 ނައިބު ރައީސުން ތިއްބެވި ނަމަވެސް މިހާރު 6 ނައިބު ރައީސުން ތިއްބަވާނެ ކަމަށެވެ. އަދި މިހާރު އެކުލަވާލެވިފައިވާ ޓީމަކީ އެކި ދާއިރާތަކާއި އެކި ފަންތީގެ ތަޖުރިބާކާރު ބޭފުޅުން ހިމެނޭ ވަރުގަދަ ޓީމެއް ކަމަށް ވިދާޅުވިއެވެ.

މުންދު އިތުރަށް ވިދާޅުވީ، ކުރިއަށް އޮތް ދެ އަހަރު ދުވަހުގެ ތެރޭގައި ޕާޓީގެ މަސައްކަތްތައް ތަރުތީބުކުރާނެ ގޮތްތައް ނިންމަންޖެހޭ ކަމަށެވެ. އަދި ކާމިޔާބީ ޙާޞިލުކުރެވޭނީ ވަރަށް ބުރަކޮށް މަސައްކަތް ކޮށްގެން ކަމަށާއި، ކޮންމެ ރައްޔިތަކާ ވާހަކަދައްކައި، އެމީހުންގެ އަޑުއަހައިގެން ކުރިއަށް ދިޔުމަކީ މުހިންމު ކަމެއް ކަމަށް އޭނާ ފާހަގަކުރެއްވިއެވެ.