ރެސިޑެންސީ ޕްރޮގްރާމްގެ އެއްބަސްވުން މަޖިލީހަށް ފޮނުވުމަށް ނަޝީދު ގޮވާލައްވައިފި
ރާއްޖޭގައި ރެސިޑެންސީ ޕްރޮގްރާމެއް ހިންގުމަކީ އުސޫލީ ގޮތުން ރަނގަޅު ކަމެއް ނަމަވެސް، އީގަލް ހިލްސްއާ އެކު ވެފައިވާ އެއްބަސްވުމުގައި ކަންބޮޑުވުންތަކެއް އެބަހުރި ކަމަށާއި އެ އެއްބަސްވުން ރައްޔިތުންގެ މަޖިލީހަށް ފޮނުވުމަށް ކުރީގެ ރައީސް މުޙައްމަދު ނަޝީދު ސަރުކާރަށް ގޮވާލައްވައިފިއެވެ.
ރައީސް ނަޝީދު މިއަދު އެކްސްގައި ކުރެއްވި ޕޯސްޓެއްގައި ވިދާޅުވީ، އުސޫލީ ގޮތުން ރެސިޑެންސީ ޕްރޮގްރާމަކަށް ރާއްޖެ ހުޅުވާލުމަކީ ރަނގަޅު ކަމެއް ކަމަށެވެ. ނަމަވެސް މިހާތަނަށް އައިއިރު އީގަލް ހިލްސްގެ ކޮންޓްރެކްޓް ފެންނަން ނެތް ކަމަށާއި އެ އެއްބަސްވުން ހާމަކޮށްފައި ނުވާކަން އެމަނިކުފާނު ފާހަގަކުރެއްވިއެވެ.
މި މަޝްރޫޢާ ގުޅޭގޮތުން މިހާތަނަށް އިވިފައިވާ ވާހަކަތަކަށް ބަލާއިރު އެމަނިކުފާނުގެ ދެ ކަންބޮޑުވުމެއް ނުވަތަ މައްސަލައެއް އެބައޮތް ކަމަށް ނަޝީދު ވިދާޅުވިއެވެ. އެއީ އެއްބަސްވުމުގެ ދަށުން އެޑްވާންސް ފައިސާ ނުލިބުމާއި، މި މަޝްރޫޢު މާލެ ސަރަޙައްދުގައި ހިންގަން ނިންމާފައި އޮތުމެވެ.
އެހެންކަމުން، އެމަނިކުފާނަށް ފެނިވަޑައިގަންނަވާ ގޮތުގައި ސަރުކާރަށް އެންމެ ރަނގަޅު ގޮތަކަށް ވާނީ އެ ކޮންޓްރެކްޓް ވީހާވެސް އަވަހަކަށް ރައްޔިތުންގެ މަޖިލީހަށް ފޮނުވުން ކަމަށް ނަޝީދު ވިދާޅުވިއެވެ. އަދި މިހާރު މަޖިލީހުގައި އޮތް ސަރުކާރުގެ އަޣުލަބިއްޔަތުން މި މަޝްރޫޢަށް ބޭނުންވާ ޤާނޫނީ އޮނިގަނޑު ފާސްކުރުމަކީ އެންމެ އެކަށީގެންވާ ގޮތް ކަމަށްވެސް އެމަނިކުފާނު ވަނީ ފާހަގަކުރައްވާފައެވެ.
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
