ޕީއެންސީގެ މެންބަރުންގެ އަދަދު 79،000 އިން މައްޗަށް، ކޮންގްރެސް ނިމޭއިރު 80،000 އަށް އަރާނެ: ފަލާޙް

ވެރިކަންކުރާ މައި ޕާޓީ، ޕީޕަލްސް ނޭޝަނަލް ކޮންގްރެސް (ޕީއެންސީ) ގެ މެންބަރުންގެ އަދަދު 79،000 އަށްވުރެ މައްޗަށް އަރާފައިވާ ކަމަށާއި، މިހާރު ކުރިއަށްދާ އެ ޕާޓީގެ ކޮންގްރެސް ނިމޭއިރު މެންބަރުންގެ އަދަދު 80،000 އަށްވުރެ އިތުރުވާނެ ކަމަށް ޕީއެންސީގެ ޕާލިމަންޓަރީ ގްރޫޕުގެ ލީޑަރު އިބްރާހީމް ފަލާޙް ވިދާޅުވެއްޖެއެވެ.

ޕީއެންސީގެ ކޮންގްރެސް ފެށުމުގެ ޖަލްސާގައި ވާހަކަދައްކަވަމުން ފަލާޙް ވިދާޅުވީ، 2008 ވަނަ އަހަރު ރާއްޖެއަށް ތައާރަފުވި ގިނަ ޕާޓީ އެކުލެވޭ ސިޔާސީ ނިޒާމުގެ ތެރެއިން ވެރިކަން ކޮށްފައިވާ ދެ ޕާޓީން ތަމްސީލުކުރަނީ މައިގަނޑު ދެ ސިޔާސީ ފިކުރު ކަމަށެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވެރިކަމާ ހަވާލުވެވަޑައިގެންނެވި އިރު ޕީއެންސީގައި ތިބީ ގާތްގަނޑަކަށް 3،000 އެއްހާ މެންބަރުންކަން ފާހަގަކުރައްވައި ފަލާޙް ވިދާޅުވީ، ވޭތުވެދިޔަ ދެ އަހަރާއި ބައިގެ ތެރޭގައި އެ ޕާޓީގެ މެންބަރުންގެ އަދަދު ވަރަށް ބޮޑަށް އިތުރުވެފައިވާ ކަމަށެވެ.

"ދެ އަހަރު، ދެ އަހަރާއި ބައިވެ، ތިން އަހަރާ ގާތްވަމުންދާއިރު، މި ޕާޓީގެ ކޮންގްރެސް މި ބޭއްވޭ މިއަދުގެ މި ވަގުތާ ހަމައަށް މި ޕާޓީގެ މެންބަރުންގެ އަދަދަކީ 79،364. އިރާދަކުރެއްވިއްޔާ އަޅުގަނޑަށް ޔަގީން، ކުރިއަށް މިއޮތް ތިން ދުވަހުގެ ތެރޭގައި މި ކޮންގްރެސް ނިމިގެންދާއިރު މި ޕާޓީގެ މެންބަރުންގެ އަދަދު 80،000 އިން މައްޗަށް އަރާނެ،" ފަލާޙް ވިދާޅުވިއެވެ.

އާންމު ރައްޔިތުން ސިޔާސީ ޕާޓީތަކާ ގުޅުމަށް ނިންމާ މައިގަނޑު ސަބަބުތަކަށް އަލިއަޅުއްވާލައްވަމުން ފަލާޙް ވިދާޅުވީ، ރައްޔިތުން ޕާޓީތަކާ ގުޅެނީ ލީޑަރުންގެ ތަސައްވުރާއި، ފިކުރާއި، ދެކޭގޮތުގެ އިތުރުން ކުރިއަށް އޮތް ތަނުގައި ގައުމު ގެންދަން ގަސްތުކުރާ މިސްރާބަށް ބަލާފައި ކަމަށެވެ.

މީގެއިތުރުން، ސިޔާސީ ޕާޓީތަކާއި އެ ޕާޓީތަކުގެ ލީޑަރުން ރިޔާސީ އިންތިޚާބުތަކަށް ނުކުންނަނީ މެނިފެސްޓޯއެއް ރައްޔިތުންނަށް ހުށަހަޅައިގެން ކަމަށާއި، އޭގެ ފަހުން ވައުދުވީ ސިޔާސަތުތައް ތަންފީޒުކުރުމަށް އެ ޕާޓީތަކުން ކުރާ މަސައްކަތްތައް ރައްޔިތުން ވަޒަންކުރަމުންދާ ކަމަށްވެސް އޭނާ ވިދާޅުވިއެވެ.

ފަލާޙް ވިދާޅުވި ގޮތުގައި، ސިޔާސީ ޕާޓީތަކުން މަސައްކަތް ކުރަމުންދަނީ ގައުމާއި ރައްޔިތުންގެ އެންމެ މަތީ މަސްލަހަތުގައިތޯ ރައްޔިތުންނަށް ދެނެގަނެވެނީ މި ކަންކަމުގެ އަލީގައެވެ.