އޭލެވެލް އިމްތިޙާނު ފެށުން: ދަރިވަރުންނަށް ރައީސާއި އަނބިކަނބަލުންގެ ހެޔޮއެދުންތައް، ޤައުމު އޮތީ ބޮޑު އުންމީދެއްގައި

މަތީ ސާނަވީ އިމްތިޙާނަކީ ދަރިވަރުންގެ މުސްތަޤްބަލު ބިނާކުރުމުގައްޔާއި، މަތީ ތަޢުލީމާއި ޕްރޮފެޝަނަލް ދާއިރާއެއް ޚިޔާރުކޮށް ކުރިއަށް ދިއުމުގައި ވަރަށް މުހިންމު މަރުޙަލާއެއް ކަމަށް ވިދާޅުވެ، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އިމްތިޙާނުގައި ބައިވެރިވާ ހުރިހާ ދަރިވަރުންނަށާއި ޢާއިލާތަކަށް އަދި ސްކޫލްތަކަށް ފުރިހަމަ ކާމިޔާބީއަކަށް އެދިވަޑައިގެންފިއެވެ. މީގެއިތުރުން، ފަސްޓް ލޭޑީ ސާޖިދާ މުޙައްމަދު ވެސް ވަނީ މުޅި ޤައުމު މިއަދު އޮތީ ދަރިވަރުންނާ މެދު ފޮނި އުންމީދުތަކަކާއެކު ކަން ފާހަގަކުރައްވައި ދަރިވަރުންނަށް ހެޔޮ ދުޢާ ރައްދުކުރައްވާފައެވެ.

އިމްތިޙާނު ފެށުމާ ގުޅިގެން ސޯޝަލް މީޑިއާގައި ޙިއްޞާކުރެއްވި މެސެޖެއްގައި ރައީސް ވިދާޅުވީ، އިމްތިޙާނަށް ތައްޔާރުވުމަށްޓަކައި ދަރިވަރުން ކުރި ބުރަ މަސައްކަތުގެ ފޮނިމޭވާ އިރާދަކުރެއްވިއްޔާ ލިބިގެންދާނެ ކަމަށެވެ. އަދި މާތް ﷲ ގެ ހެޔޮ ރަޙްމަތްފުޅާއެކު، އިމްތިޙާނުގައި ފަސޭހަކަމާއެކު މޮޅަށް ޖަވާބުދީ، މުޅި ޤައުމު ފަޚުރުވެރިވާ ފަދަ މޮޅު ނަތީޖާއެއް ދަރިވަރުން ހޯދައިދޭނެ ކަމަށް އުންމީދުކުރައްވާ ކަމަށްވެސް އެމަނިކުފާނު ވިދާޅުވިއެވެ.

ފަސްޓް ލޭޑީ ސާޖިދާ މުޙައްމަދު ފޮނުއްވި މެސެޖުގައި، ދަރިވަރުންގެ ހިތްތަކަށް މާތް ﷲ އަލިކަން ދެއްވައި، ވިސްނުން ތޫނުކުރައްވައި، އިމްތިޙާނުގެ ކަރުދާސްތަކަށް ފަސޭހަކަމާއެކު ޖަވާބުދިނުމުގެ ތައުފީޤު މިންވަރުކޮށްދެއްވުން އެދި ދުޢާ ދަންނަވާފައިވެއެވެ. އަދި ލިބޭ ރަނގަޅު ނަތީޖާގެ ސަބަބުން ބެލެނިވެރިންނާއި މުދައްރިސުން ފަޚުރުވެރިވެ، ޒުވާނުންގެ މުސްތަޤްބަލު އުޖާލާވެގެންދާނެ ކަމަށް އެކަމަނާ ވިދާޅުވިއެވެ.

މި އަހަރުގެ މަތީ ސާނަވީ އިމްތިޙާނު ރާއްޖޭގެ 53 މަރުކަޒެއްގައި ކުރިއަށްދާއިރު، އޭލެވެލް އިމްތިޙާނުގައި 4،973 ދަރިވަރުން އަދި އެޗް.އެސް.ސީ އިމްތިޙާނުގައި 2،263 ދަރިވަރުން ބައިވެރިވެއެވެ. މީގެތެރެއިން މާލެ ސަރަޙައްދުގެ 4 ސެންޓަރެއްގައި 3،284 ދަރިވަރުން އިމްތިޙާނު ހަދަމުންދާއިރު، އަތޮޅުތަކުގެ 49 ސެންޓަރަކުން 1،689 ދަރިވަރުން އިމްތިޙާނުގައި ބައިވެރިވެއެވެ.

މި ދުވަސްވަރަކީ ސާނަވީ (އޯލެވެލް) އަދި މަތީ ސާނަވީ އިމްތިޙާނު އެއްކޮށް ކުރިއަށްދާ ދުވަސްވަރެކެވެ. އެގޮތުން އޯލެވެލް އިމްތިޙާނު ސެޕްޓެމްބަރު 20 އިން ނޮވެމްބަރު 12 ގެ ނިޔަލަށް ކުރިއަށްދާއިރު، އޭލެވެލް އިމްތިޙާނު ކުރިއަށްދާނީ ސެޕްޓެމްބަރު 27 އިން އޮކްޓޫބަރު 30 ގެ ނިޔަލަށެވެ.