ޖޭއެސްސީގެ ނައިބު ރައީސްކަމަށް ފަނޑިޔާރު ޙުސައިން ޝަހީދު އިންތިޚާބުކޮށްފި

ޖުޑީޝަލް ސާވިސް ކޮމިޝަން (ޖޭއެސްސީ) ގެ ނައިބު ރައީސްގެ މަގާމަށް، ސުޕްރީމް ކޯޓުގެ ފަނޑިޔާރު އަލްއުސްތާޒު ޙުސައިން ޝަހީދު މިއަދު އިންތިޚާބުކޮށްފިއެވެ.

ޖޭއެސްސީގެ ނައިބު ރައީސްގެ މަގާމު ހުސްވީ، ކުރިން އެ މަގާމުގައި ހުންނެވި ޔަޒްމީދު މުޙައްމަދު މިދިޔަ މަހު މަގާމުން އިސްތިއުފާ ދެއްވުމާ ގުޅިގެންނެވެ. ޔަޒްމީދު އިސްތިއުފާ ދެއްވި ސަބަބެއް އެ ކޮމިޝަނުން ހާމަކޮށްފައެއް ނުވެއެވެ. ޔަޒްމީދަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އެ ކޮމިޝަނަށް އައްޔަންކުރެއްވި މެންބަރެކެވެ. އޭނާ އިސްތިއުފާ ދެއްވުމުން، ރައީސުލްޖުމްހޫރިއްޔާ މިހާރު ވަނީ އެ މަގާމަށް ޢަލީ ނަޞީރު ޤާސިމް އައްޔަންކުރައްވާފައެވެ.

ފަނޑިޔާރު ޙުސައިން ޝަހީދު ޖޭއެސްސީގެ ނައިބު ރައީސްކަމަށް އިންތިޚާބުވުމާ ގުޅިގެން، އެ ކޮމިޝަނުން ވަނީ އެކްސްގައި ކުރި ޕޯސްޓެއް މެދުވެރިކޮށް އޭނާއަށް މަރުހަބާ ކިޔާފައެވެ.

ފަނޑިޔާރު ޝަހީދު ސުޕްރީމް ކޯޓުގެ ފަނޑިޔާރުކަމުގެ ހުވާ ކުރެއްވީ މިދިޔަ އަހަރުގެ މާޗު މަހުގެ 19 ވަނަ ދުވަހުއެވެ. އޭނާ އެ މަގާމަށް އައްޔަންކުރެވުނީ ކުރިން އެ މަގާމުގައި ހުންނެވި ފަނޑިޔާރު ޙުސްނުއްސުޢޫދު އިސްތިއުފާ ދެއްވުމާ ގުޅިގެންނެވެ. ސުޕްރީމް ކޯޓަށް އައްޔަންކުރެއްވުމުގެ ކުރިން ފަނޑިޔާރު ޝަހީދު ވަނީ ހައިކޯޓުގެ އިސް ފަނޑިޔާރުކަމާއި ކްރިމިނަލް ކޯޓުގެ އިސް ގާޒީކަން ވެސް ކުރައްވާފައެވެ. އޭނާ ޖޭއެސްސީގެ މެންބަރުކަމަށް އައްޔަންކުރެވުނީ މިދިޔަ އަހަރުގެ އޭޕްރީލް މަހުގެ 7 ވަނަ ދުވަހުއެވެ.

ޖޭއެސްސީއަކީ ފަނޑިޔާރުން އައްޔަންކުރުމާއި، މަގާމުގެ ކުރިއެރުން ދިނުމާއި، ފަނޑިޔާރުންގެ ސުލޫކީ މައްސަލަތައް ބަލައި ފިޔަވަޅު އެޅުމުގެ އިތުރުން، ކޯޓުތަކުގެ އިދާރީ ކަންކަމުގައި ލަފާދޭ ދުސްތޫރީ މުއައްސަސާއެކެވެ. އަދި އަދުލު އިންސާފުގެ ދާއިރާގެ މިނިވަންކަން ކަށަވަރުކުރުމާއި، ފަނޑިޔާރުގެ ވަރުގަދަކުރުމަށް ސިޔާސަތުތައް އެކުލަވައިލުމަކީ ވެސް އެ ކޮމިޝަނުގެ ޒިންމާއެކެވެ.

ޖުމްލަ 10 މެންބަރުންގެ މައްޗަށް އެކުލެވޭ މި ކޮމިޝަނުގައި ހިމެނެނީ:

1. ރައީސުލްޖުމްހޫރިއްޔާ އައްޔަންކުރައްވާ މެންބަރެއް.

2. މަޖިލީހުގެ ރައީސް (ޢަބްދުއްރަޙީމް ޢަބްދުﷲ).

3. ސުޕްރީމް ކޯޓުގެ ފަނޑިޔާރެއް.

4. ހައިކޯޓުގެ ފަނޑިޔާރެއް.

5. ދަށު ކޯޓުތަކުގެ ފަނޑިޔާރުންގެ ތެރެއިން އިންތިޚާބުކުރާ ފަނޑިޔާރެއް.

6. ރައްޔިތުންގެ މަޖިލީހުގެ މެންބަރެއް.

7. އާންމުންގެ ތެރެއިން މަޖިލީހުން ކަނޑައަޅާ މެންބަރެއް.

8. ބަންޑާރަ ނައިބު.

9. ވަކީލުންގެ ތެރެއިން އިންތިޚާބުކުރާ ވަކީލެއް.

ޖޭއެސްސީ އެކުލެވިގެންވާ ގޮތް ބަދަލުކޮށް، ސިޔާސީ ނުފޫޒުން އެ ކޮމިޝަން އެއްކިބާކުރުމަކީ މި ސަރުކާރާއި ކުރީގެ އެމްޑީޕީ ސަރުކާރުން ވެސް ވެފައިވާ މުހިންމު ވައުދެކެވެ. ނަމަވެސް، މިހާތަނަށް އެއްވެސް ސަރުކާރަކަށް އެ ވައުދު ފުރިހަމައަށް ފުއްދިފައެއް ނުވެއެވެ.