ސިންގަލް-ޔޫސް ޕްލާސްޓިކު މަދުކުރުމާ ގުޅޭ ގަވާއިދު ގެޒެޓުކޮށްފި؛ އުސޫލާ ޚިލާފުވާނަމަ ބޮޑެތި ޖޫރިމަނާތަކެއް

ދިވެހިރާއްޖޭގެ ތިމާވެށި ހިމާޔަތްކުރުމަށާއި، ސިންގަލް-ޔޫސް ޕްލާސްޓިކް ނުވަތަ އެއްފަހަރު ބޭނުންކޮށްފައި އުކާލާ ޕްލާސްޓިކް ބޭނުންކުރާ މިންވަރު މަދުކުރުމަށްޓަކައި އެކުލަވާލާފައިވާ "ސިންގަލް-ޔޫސް ޕްލާސްޓިކު މަދުކުރުމާ ގުޅޭ ގަވާއިދު" (ގަވާއިދު ނަންބަރު: 51-އާރ/2026) ސަރުކާރުގެ ގެޒެޓުގައި ޝާއިޢުކޮށްފިއެވެ.

މިދިޔަ ޖޫން މަހުގެ 9 ވަނަ ދުވަހު ގެޒެޓުކުރި މި ގަވާއިދަކީ ކުނި މެނޭޖުކުރުމުގެ ޤާނޫނު (ޤާނޫނު ނަންބަރު: 24/202) ގެ 31 ވަނަ މާއްދާގެ ދަށުން ބާރުލިބިގެން އެކުލަވާލާފައިވާ ގަވާއިދެކެވެ. މި ގަވާއިދުގެ މައިގަނޑު މަޤްޞަދަކީ ތިމާވެށްޓަށް ގެއްލުންދޭ ސިންގަލް-ޔޫސް ޕްލާސްޓިކް ރާއްޖޭގައި ބޭނުންކުރާ މިންވަރު މަދުކުރުމާއި، އެފަދަ ބާވަތްތައް ރާއްޖޭގައި އުފެއްދުމާއި، އެތެރެކުރުމާއި އަދި ރާއްޖޭގެ ބާޒާރަށް ވަކި ތަރުތީބަކުން ނެރުން މަނާކުރުމެވެ.

މި ގަވާއިދު ތަންފީޒުކުރުމުގެ މައިގަނޑު ޒިންމާ މަތިކޮށްފައިވަނީ މިނިސްޓްރީ އޮފް އެންވަޔަރަންމަންޓް، ކްލައިމެޓް ޗޭންޖް އެންޑް އެނާޖީ އާއި އެންވަޔަރަންމަންޓަލް ރެގިއުލޭޓަރީ އޮތޯރިޓީ (އީ.އާރު.އޭ) އަދި މޯލްޑިވްސް ކަސްޓަމްސް ސަރވިސްއަށެވެ.

ގަވާއިދާ ޚިލާފުވާ ފަރާތްތަކަށް ފިޔަވަޅުއެޅުން

މި ގަވާއިދަށް ޢަމަލުކުރަން ފެށުމާއެކު، މަނާކޮށްފައިވާ ސިންގަލް-ޔޫސް ޕްލާސްޓިކްގެ ބާވަތްތައް ރާއްޖޭގައި އުފައްދާ، އެތެރެކޮށް ނުވަތަ ބާޒާރަށް ނެރެ ވިއްކާ ފަރާތްތަކާމެދު ހަރުކަށި ފިޔަވަޅުތަކެއް އެޅުމަށް ވަނީ ނިންމާފައެވެ. އެގޮތުން ފިޔަވަޅު އެޅޭނީ ކުނި މެނޭޖުކުރުމުގެ ޤާނޫނާއި އެކްސްޕޯޓް އިމްޕޯޓްގެ ޤާނޫނުގެ ދަށުން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މަނާކުރައްވާފައިވާ ބާވަތްތައް ގެންގުޅޭ ފަރާތްތަކަށެވެ.

ގަވާއިދުގައިވާ ގޮތުން، އުސޫލާ ޚިލާފުވާ ފަރާތްތަކާމެދު އިދާރީ ފިޔަވަޅު އެޅުމުގެ ބާރު ތަންފީޒީ އިދާރާތަކަށް ލިބިގެންވެއެވެ. ފުރަތަމަ ފަހަރު ކުށް ކުރާ ފަރާތްތަކަށް ނަސޭހަތްތެރިވީ ނަމަވެސް، ކުށް ތަކުރާރުވާނަމަ އެތެރެކުރާ، އުފައްދާ ނުވަތަ ބާޒާރަށް ނެރޭ ކޮންމެ އެއްޗަކަށް 150 (އެއްސަތޭކަ ފަންސާސް) ރުފިޔާއަށް ވުރެ ބޮޑުނޫން އަދަދަކުން ޖޫރިމަނާކުރެވޭނެއެވެ. ނަމަވެސް މިގޮތުން ކުރެވޭ ޖުމްލަ ޖޫރިމަނާ 100,000 (އެއްލައްކަ) ރުފިޔާއަށްވުރެ އިތުރުވެގެން ނުވާނެ ކަމަށް ގަވާއިދުގައި ބަޔާންކޮށްފައިވެއެވެ.

މި އައު ގަވާއިދުގެ ސަބަބުން ރާއްޖޭގެ ނާޒުކު ތިމާވެށި ހިމާޔަތްކުރުމަށް ކުރެވޭ މަސައްކަތްތަކަށް އިތުރު ކުރިއެރުމެއް ލިބިގެންދާނެ ކަމަށް ސަރުކާރުން އުއްމީދު ކުރެއެވެ.