ދިޔާނާ ސައީދު އީޔޫގެ ސަފީރުކަމަށް އައްޔަންކުރަން މަޖިލީހުގެ ކޮމިޓީން ފާސްކޮށްފި

ޔޫރަޕިއަން ޔޫނިއަން (އީޔޫ) އަދި ބެލްޖިއަމަށް ރާއްޖެއިން ކަނޑައަޅާ ސަފީރުގެ މަގާމަށް ފާތިމަތު ދިޔާނާ ސައީދު އައްޔަންކުރުމަށް ރައްޔިތުންގެ މަޖިލީހުގެ ހާރިޖީ ގުޅުންތަކުގެ ކޮމިޓީން މިއަދު ފާސްކޮށްފިއެވެ.

ރައީސުލްޖުމްހޫރިއްޔާ ޑރ. މުހައްމަދު މުއިއްޒު، ދިޔާނާގެ ނަންފުޅު މަޖިލީހަށް ފޮނުއްވީ މިދިޔަ ޖުލައި މަހުގެ 7 ވަނަ ދުވަހު ބޭއްވި މަޖިލީހުގެ ޖަލްސާއަށެވެ. އެ ދުވަހު މަޖިލީހުގެ ރައީސް އަބްދުއްރަހީމް އަބްދުﷲ ވަނީ އެ މައްސަލަ ދިރާސާކުރުމަށް ހާރިޖީ ގުޅުންތަކުގެ ކޮމިޓީއަށް ފޮނުއްވާފައެވެ.

ކޮމިޓީން ދިޔާނާގެ ތައުލީމީ ފެންވަރާއި، މަސައްކަތުގެ ތަޖުރިބާ އަދި ގާބިލުކަމަށް ބަލައި ކުރި ދިރާސާއަށްފަހު، އޭނާއަކީ އެ މަގާމަށް އެކަށީގެންވާ ބޭފުޅެއް ކަމަށް ވަނީ ކަނޑައަޅާފައެވެ. ދިޔާނާގެ ނަންފުޅު ފާސްކޮށްފައިވަނީ ކޮމިޓީގެ ބައްދަލުވުމަށް ހާޒިރުވެވަޑައިގެންނެވި މެންބަރުންގެ އިއްތިފާގުންނެވެ.

ދިޔާނާ ސައީދަކީ މީގެ ކުރިން ދައުލަތުގެ މުހިންމު މަގާމުތަކެއް ފުރުއްވާފައިވާ ބޭފުޅެކެވެ. އެގޮތުން ކުރީގެ ރައީސް މުހައްމަދު ނަޝީދުގެ ސަރުކާރުގައި ބަންޑާރަ ނައިބުކަން ކުރެއްވިއިރު، ކުރީގެ ރައީސް ޑރ. މުހައްމަދު ވަހީދުގެ ސަރުކާރުގައި ޖެންޑާ މިނިސްޓަރުކަން ވެސް ކުރެއްވިއެވެ. އީޔޫގެ ސަފީރުކަމަށް އައްޔަންކުރުމަށް ނަން ފޮނުއްވުމުގެ ކުރިން، މިދިޔަ އޭޕްރީލް މަހުން ފެށިގެން އޭނާ ހުންނެވީ ފޮރިން މިނިސްޓްރީގެ އެމްބެސެޑާ އެޓް ލާޖްގެ މަގާމުގައެވެ.

މީގެ އިތުރުން، ސައުދީ އަރަބިއްޔާގައި ހުންނަވާ ދިވެހި ސަފީރު އަހުމަދު ސަރީރު، ބަހުރޭނަށް ކަނޑައަޅާ ނޮން-ރެޒިޑެންޓް ސަފީރުގެ މަގާމަށް އައްޔަންކުރުމަށް ވެސް ކޮމިޓީން ވަނީ ރުހުން ދީފައެވެ. މި ނިންމުން ވެސް ކޮމިޓީން ފާސްކުރީ ބައިވެރިވި މެންބަރުންގެ އިއްތިފާގުންނެވެ.