އެމްޑީޕީއަކީ ފިތުނައެއް، އެ ޕާޓީގެ ފިކުރުގައި ހުރީ ނަފުރަތާއި ބަދަލުހިފުން: އަޙުމަދު ޞިއްދީޤު

އެމްއެމްޓީވީގެ "ބޮޑު ޚަބަރު" ޕްރޮގްރާމްގައި ވާހަކަދައްކަވަމުން ސްޓޭޓް މިނިސްޓަރު އަޙުމަދު ޞިއްދީޤު، ކުރީގެ ރައީސް މުޙައްމަދު ނަޝީދާއި އެމްޑީޕީގެ ސިޔާސަތުތަކަށް ވަރަށް ބޮޑަށް ފާޑުވިދާޅުވެއްޖެއެވެ.

ޞިއްދީޤު ވިދާޅުވީ ރައީސް ނަޝީދަކީ ކޮންމެ ކަމެއްގައިވެސް ބުނާ ބަހާ އިދިކޮޅަށް ޢަމަލުކުރައްވާ ބޭފުޅެއް ކަމަށެވެ. އެގޮތުން މަސްތުވާތަކެއްޗަކީ ބޯންވާނެ އެއްޗެއް ކަމަށް ދޭހަވާ މޭރުމަކުން ވާހަކަދައްކަވައި، ޒުވާނުން އެ މަގަށް ވައްދާފައިވާ ކަމަށް އޭނާ ތުޙުމަތުކުރެއްވިއެވެ.

އެމްޑީޕީގެ އުފެދުމާ ގުޅޭގޮތުން ވާހަކަދައްކަވަމުން ޞިއްދީޤު ވިދާޅުވީ، އެ ޕާޓީއަކީ ނަފުރަތާއި ބަދަލުހިފުމުގެ ތެރެއިން ބޭރުގެ ނުފޫޒާއެކު އުފެދުނު ޕާޓީއެއް ކަމަށެވެ.

އެއް ލަފުޒުން މާނަކުރާނަމަ އެމްޑީޕީއަކީ ފިތުނައެއް. މެޑިކަލް ޓާމަކުން ބުނާނަމަ މިއީ ކެންސަރެއް،

ޞިއްދީޤު ވިދާޅުވިއެވެ.

އޭނާ އިތުރަށް ފާހަގަކުރެއްވި ގޮތުގައި އެ ޕާޓީން މަސައްކަތް ކުރަނީ ވެރިންނާއި ރައްޔިތުންނާ ދެމެދު ޙަސަދަވެރިކަން އުފައްދައި އިތުބާރު ގެއްލުވާލުމަށެވެ.

ކުރީގެ ރައީސް އިބްރާހީމް މުޙައްމަދު ޞާލިޙާއި ރައީސް ނަޝީދާ ދެމެދު އޮތް ގުޅުމާ ބެހޭގޮތުން ޞިއްދީޤު ވިދާޅުވީ، އެ ދެ ބޭފުޅުން ބޭރުފުށުން ގުޅިގެން އުޅޭކަމަށް ދެއްކި ނަމަވެސް، ފުރުޞަތެއް ލިބިއްޖެނަމަ ސިޔާސީ ގޮތުން އެކަކު އަނެކަކު ނައްތާލާނެ ކަމަށެވެ. ރައީސް ޞާލިޙަކީ ބަހެއް ބުނާ ބޭފުޅެއް ނޫންކަމަށާއި މަދުން ވާހަކަދައްކާ ބޭފުޅެއްކަމަށް ވިދާޅުވެ ސިއްދީޤު ވިދާޅުވީ އެމަނިކުފާނަކީ މަޖިލީހުގައި އުޅުއްވި އިރުވެސް ބިލެއް ހުށަހެޅުއްވި ބޭފުޅެއް ނޫން ކަމަށާއި، އެމަނިކުފާނުގެ އާލާސްކަންފުޅުގެ ޒާތީ މަޢުލޫމާތުތައްވެސް ނަޝީދު އާންމުކުރެއްވީ ގާތް ރަޙުމަތްތެރިއެއްގެ ހައިސިއްޔަތުން ނޫން ކަމަށް އޭނާ ވިދާޅުވިއެވެ.

ނަޝީދަށް އަމާޒުކޮށް ދެވުނު ޙަމަލާއާ ގުޅިގެން ރައީސް ޞާލިޙަށް ތުޙުމަތުތަކެއް ކުރެވުނު ކަން ފާހަގަކުރެއްވައި ޞިއްދީޤު ވިދާޅުވީ، ދެ ފަރާތުގެ ސަޕޯޓަރުންގެ މެދުގައި އޮތީ މާފު ނުކުރެވޭ ވަރުގެ ބޮޑު މައްސަލައެއް ކަމަށެވެ. އެހެންކަމުން، ދިވެހިރާއްޖޭގެ ސިޔާސީ މައިދާނުގައި މިހާރު އެ ދެ ބޭފުޅުންނަށްވެސް ޖާގައެއް ނެތް ކަމަށް އޭނާ ވިދާޅުވިއެވެ.

މީގެ އިތުރުން، އެމްޑީޕީގައި ޒުވާން ލީޑަރަކު އުފެދިފައި ނުވާތީ ޞިއްދީޤު ކަންބޮޑުވުން ފާޅުކުރެއްވިއެވެ. އޭނާ ވިދާޅުވީ ނަޝީދު މަސައްކަތް ކުރައްވަނީ އެމްޑީޕީއަކީ އަމިއްލަ އެއްޗަކަށް ހަދައިގެން، ބޭނުންވާ ބަޔަކު ވައްދައިގެން "ބޯވައެއް" ހެން މުޅި ޕާޓީގެ ކަންކަން ހިންގުމަށް ކަމަށެވެ.