އުލިގަމު ޔޮޓް މެރީނާއާއެކު އުތުރު ވެގެންދާނީ ޔޮޓިންގގެ މުހިންމު މަރުކަޒަކަށް: މިނިސްޓަރ ސައީދު

ހއ. އުލިގަމުގައި ތަރައްޤީކުރާ ޔޮޓް މެރީނާއާއެކު ރާއްޖޭގެ އުތުރު ވެގެންދާނީ މުނިފޫހިފިލުވުމާއި ވިޔަފާރި އުސޫލުން ދަތުރުކުރާ ޔޮޓްފަހަރުގެ މުހިންމު މައި މަރުކަޒަކަށް (ހަބަކަށް) ކަމަށް އިޤްތިޞާދީ ތަރައްޤީއާއި ވިޔަފާރިއާ ބެހޭ ވަޒީރު މުޙައްމަދު ސަޢީދު ވިދާޅުވެއްޖެއެވެ.

މިނިސްޓަރު މިހެން ވިދާޅުވީ، އުލިގަމުގައި ޔޮޓް މެރީނާ ތަރައްޤީކުރުމަށްޓަކައި މޯލްޑިވްސް ޕޯޓްސް ލިމިޓެޑް (އެމްޕީއެލް) އާއި އުލިގަމު ކައުންސިލާ ދެމެދު ބިން ކުއްޔަށް ދިނުމުގެ އެއްބަސްވުމުގައި އިއްޔެ ސޮއިކުރުމާ ގުޅިގެންނެވެ. މިނިސްޓަރު ސަޢީދު ވަނީ މި މަޝްރޫޢަކީ އުތުރުގެ ސަރަޙައްދަށް ފެންވަރު ރަނގަޅު ބަނދަރުގެ ޚިދުމަތްތައް ގެނެސްދޭނެ އަގުހުރި އަދި މުހިންމު މަސައްކަތެއްގެ ގޮތުގައި ސިފަކުރައްވާފައެވެ.

މި މަޝްރޫޢުގެ ދަށުން އުލިގަމުގައި ބައިނަލްއަޤްވާމީ ފެންވަރުގެ ޔޮޓް މެރީނާއެއް ޤާއިމުކުރެވިގެންދާނެއެވެ. މީގެ ސަބަބުން ރާއްޖެއަށް ޒިޔާރަތްކުރާ ގިނަ ޢަދަދެއްގެ ޔޮޓްފަހަރަށް ޒަމާނީ ވަސީލަތްތަކާއެކު ފަސޭހަކަމާއެކު ޚިދުމަތްތައް ލިބިގަތުމުގެ މަގު ފަހިވެގެންދާނެއެވެ. އުލިގަމަކީ ޒަމާނުއްސުރެ ރާއްޖެއަށް އެތެރެވާ ބޭރުގެ ޔޮޓްފަހަރުގެ މައިގަނޑު އެންޓްރީ ޕޮއިންޓެއް ކަމަށްވާއިރު، މި އައު މެރީނާގެ ސަބަބުން އެ ރަށަށާއި މުޅި އުތުރުގެ ސަރަޙައްދުގެ އިޤްތިޞާދަށް ބޮޑެތި ފައިދާތަކެއް ލިބިގެންދާނެ ކަމަށް ބެލެވެއެވެ.

އުލިގަމުގައި ބައިނަލްއަޤްވާމީ ފެންވަރުގެ ޔޮޓް މެރީނާއެއް ޤާއިމުކުރުމަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ރިޔާސީ ވަޢުދުފުޅުތަކުގެ ތެރޭގައި ހިމެނޭ މުހިންމު އެއް ވަޢުދެވެ. ސަރުކާރުން މިހާރު މަސައްކަތް ކުރަމުން ދަނީ އުތުރުގެ އިޤްތިޞާދު ނަގާ ކޮޅަށް ޖެހުމަށް ކުރަމުންދާ ފުޅާ މަސައްކަތްތަކުގެ ތެރެއިން އެ ވަޢުދު ފުރިހަމަކޮށްދިނުމަށެވެ.