ޝަރުޢީ ދާއިރާއަށް ނުފޫޒު ފޯރުވުން ނިމުމަކަށް ގެނެސްފިން: ރައީސުލްޖުމްހޫރިއްޔާ

ދިވެހިރާއްޖޭގެ ވެރިކަން ހިންގުމުގެ ނިޒާމުގެ ތެރެއިން ޝަރުޢީ ދާއިރާއަށް ނުފޫޒު ފޯރުވުމަށް އޮތް އޮތުން ނިމުމަކަށް ގެނެސް، އެ ދާއިރާ މިނިވަންކޮށްފައިވާ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އިޢުލާނު ކުރައްވައިފިއެވެ.

ރާއްޖޭގެ 61 ވަނަ މިނިވަން ދުވަހުގެ މުނާސަބަތުގައި ބޭއްވި ރަސްމީ ޖަލްސާގައި ވާހަކަފުޅު ދައްކަވަމުން ރައީސުލްޖުމްހޫރިއްޔާ ވިދާޅުވީ، ދައުލަތް ހިންގުމުގެ ތިން ބާރު ވަކިވެފައިވާ ނިޒާމެއްގައި ޝަރުޢީ ދާއިރާއަށް އޮންނަ ނުފޫޒު ނައްތާލުމަކީ ޤައުމަށް ލިބުނު ވަރަށް މުހިންމު ކުރިއެރުމެއް ކަމަށެވެ. އަދި ޤައުމެއްގެ ސިޔާދަތީ މިނިވަންކަން ފުރިހަމަވަނީ ހުރިހާ ދާއިރާއަކުން މިނިވަންކަން ކަށަވަރުވެގެން ކަމަށާއި، ރައްޔިތުންނަށް މިނިވަންކަމުގެ އިޙްސާސް ކުރެވޭނީ މިނިވަން މުސްތަޤިއްލު ޝަރުޢީ ދާއިރާއެއް އޮވެގެން ކަމަށް އެމަނިކުފާނު ފާހަގަކުރެއްވިއެވެ.

ޝަރުޢީ ދާއިރާގެ މިނިވަންކަމަށް އޮތް އެންމެ ބޮޑު ހުރަހަކީ މާލީ މިނިވަންކަން ނެތުންކަން ފާހަގަކުރައްވައި، ރައީސް ވިދާޅުވީ ތާރީޚުގައި ފުރަތަމަ ފަހަރަށް ޝަރުޢީ ދާއިރާއަށް މިނިވަން ބަޖެޓެއް މިހާރު ކަނޑައަޅާފައިވާ ކަމަށެވެ. މިއީ ސަރުކާރުން އަދުލު އިންސާފުގެ ދާއިރާއަށް ނުފޫޒު ފޯރުވާ ކަމަށް ކުރެވޭ ތުހުމަތުތަކަށް ނިމުމެއް ގެނައުމަށް އެޅުނު މުހިންމު ފިޔަވަޅެކެވެ.

"މީގެ ކުރިން ރައީސް އޮފީހުން ކޯޓުތަކަށް އަމުރުތައް ފޮނުވާ. އަޅުގަނޑު ވާނީ އެ އާދަ ނިމުމަކަށް ގެނެސްފައި. މިހާރު އެއްވެސް ފަނޑިޔާރަކަށް އެފަދަ ވާހަކައެއް ވިދާޅެއް ނުވެވޭނެ، އަދި ވިދާޅެއްވެސް ނުވާނެ. އެއީ ވަކި ގޮތަކަށް ޙުކުމް ކުރަން ސަރުކާރުން އަންގާ ކަމަށް ބުނުމަކީ ކަނޑައެޅިގެން ދޮގެއް ކަމަށްވާތީ. ޝަރުޢީ ދާއިރާ މިހާރު ވަނީ ފުރިހަމައަށް މިނިވަންކުރެވިފައި،" ރައީސް މުޢިއްޒު ވިދާޅުވިއެވެ.

މާލީ މިނިވަންކަމުގެ އިތުރުން، ކޯޓުތަކަށް ދިމާވެފައިވާ ޖާގައިގެ ދަތިކަމާއި ވަޞީލަތްތަކުގެ ދަތިކަން ޙައްލުކުރުމަށް ސަރުކާރުން ދަނީ ޚާއްޞަ އިސްކަމެއް ދެމުންނެވެ. އެގޮތުން ކްރިމިނަލް ކޯޓާއި ޑްރަގް ކޯޓުގެ މަސައްކަތްތައް ހުއްޓިފައި އޮތް އޮތުން ނިމުމަކަށް ގެނެސް، އެ ކޯޓުތައް ބޮޑެތި ޖާގަ ތަނަވަސް ޢިމާރާތްތަކަށް ބަދަލުކުރުމުގެ މަސައްކަތް ވަނީ ފަށާފައެވެ. މީގެ ސަބަބުން މައްސަލަތައް އަވަހަށް ނިންމުމަށް ބޮޑު ބާރަކަށް ވާނެ ކަމަށް ރައީސް ވިދާޅުވިއެވެ.

ޝަރުޢީ ދާއިރާގެ ދިގު މުއްދަތުގެ ތަރައްޤީއަށްޓަކައި ހުޅުމާލޭގައި އެމް.ޓީ.ސީ.ސީ އާ ޙަވާލުކޮށްގެން ބިނާކުރާ "ސުޕީރިއާ ކޯޓު ކޮމްޕްލެކްސް" 2029 ވަނަ އަހަރަށް ނިންމުމަށް އަމާޒު ހިފާފައިވާކަންވެސް ރައީސް ފާހަގަކުރެއްވިއެވެ. މީގެ އިތުރުން، ޖުޑީޝަލް ސަރވިސް ކޮމިޝަން (ޖޭ.އެސް.ސީ) އިޞްލާޙު ކުރުމަށް ވެވަޑައިގެންފައިވާ ވަޢުދުފުޅު ފުރިހަމަކުރައްވާނެ ކަމުގެ ޔަޤީންކަންވެސް ރައީސުލްޖުމްހޫރިއްޔާ ވަނީ ދެއްވާފައެވެ.