ރާއްޖޭގެ މާލީ އިސްލާހުތައް ބައިނަލްއަޤުވާމީ މައިދާނުން ބަލައިގަނެފި: ޒަމީރު

ބައިނަލްއަޤުވާމީ ކްރެޑިޓް ރޭޓިން އެޖެންސީ، ފިޗް ރޭޓިންގްސް އިން ދިވެހިރާއްޖޭގެ ކްރެޑިޓް ރޭޓިން މަތިކުރުމާ ގުޅިގެން، އެއީ ސަރުކާރުން އަޅަމުންދާ އިޤްތިސާދީ އިސްލާހީ ފިޔަވަޅުތަކަށް ބައިނަލްއަގުވާމީ މައިދާނުގައި ލިބުނު ބޮޑު އިތުބާރެއް ކަމަށް ފިނޭންސް މިނިސްޓަރު މޫސާ ޒަމީރު ވިދާޅުވެއްޖެއެވެ.

މިކަމާ ގުޅިގެން އެކްސްގައި ކުރެއްވި ޕޯސްޓެއްގައި މިނިސްޓަރު ޒަމީރު ވިދާޅުވީ، ފިޗް އިން ރާއްޖޭގެ ރޭޓިން މަތިކޮށްފައިވަނީ މިދިޔަ އޭޕްރީލް މަހު 500 މިލިއަން ޑޮލަރުގެ ސުކޫކް ކާމިޔާބުކަމާއެކު އަނބުރާ ދެއްކުމާ ގުޅިގެން އިޤްތިސާދީ ހާލަތު ރަނގަޅުވުމުން ކަމަށެވެ. އަދި މިއީ ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ހަރުދަނާ ލީޑަޝިޕްގެ ދަށުން ތަންފީޒު ކުރަމުންދާ މާލީ އިސްލާހުތަކަށް ލިބުނު ކުރިއެރުމެއްކަން ފާހަގަކުރައްވައި، ރައީސަށް މިނިސްޓަރ ޝުކުރު އަދާކުރެއްވިއެވެ.

ބޭންކް އޮފް މޯލްޑިވްސް (ބީއެމްއެލް) އިން ހުށަހަޅާފައިވާ 300 މިލިއަން ޑޮލަރުގެ ސުކޫކާ ބެހޭގޮތުން ވާހަކަދައްކަވަމުން މިނިސްޓަރ ވިދާޅުވީ، މިއީ ސަރުކާރުގެ ބަޖެޓަށް ނުވަތަ ކޭޝްފްލޯގެ ބޭނުމަށް ހޯދާ ފައިސާއެއް ނޫން ކަމަށެވެ. މިއީ ސަރުކާރާއި ބީއެމްއެލް ގުޅިގެން، ރާއްޖޭގެ އުތުރާއި ދެކުނުގެ ފަތުރުވެރިކަން ފުޅާކޮށް، އިޤްތިސާދީ ކުރިއެރުން ހޯދުމަށް ރާވާފައިވާ މަސައްކަތެއްކަމަށް މިނިސްޓަރ ވިދާޅުވިއެވެ. އަދި މި މަޝްރޫއުގެ ސަބަބުން ސަރުކާރުގެ އާމްދަނީ އިތުރުވެ، ކުރިއަށް އޮތް އަހަރުތަކުގައި މާލީ ލަނޑުދަނޑިތަކަށް ވާސިލްވުމަށް އެހީތެރިވެދޭނެ ކަމަށް ވެސް ވިދާޅުވިއެވެ.

މިނިސްޓަރ ޒަމީރު އިތުރަށް ވިދާޅުވީ، ރައީސް ޑރ. މުޢިއްޒުގެ ސިޔާސަތަކީ އަމިއްލަ ފަރާތްތަކުގެ އިންވެސްޓްމަންޓްތައް މެދުވެރިކޮށް ދަޢުލަތުގެ މާލީ ހަމަޖެހުން ގާއިމުކުރުމާއި، ދަރަނި ދެމެހެއްޓެނިވި މިންގަނޑެއްގައި ހިފެހެއްޓުމުގެ އިތުރުން، ރައްޔިތުންނަށް ރަނގަޅު އާމްދަނީ ލިބޭނެ ވަޒީފާތައް އުފެއްދެވުން ކަމަށެވެ.

ދައުލަތުގެ މާލީ ޙާލަތު ހަމަ މަގަށް އަޅުވައި، ދަރަނި ދެއްކުމުގެ ޤާބިލްކަން ދެމެހެއްޓުމަށް ސަރުކާރުން ސާބިތުކަމާއެކު މަސައްކަތް ކުރަމުންދާނެ ކަމުގެ ޔަގީންކަން މިނިސްޓަރ ވަނީ ދެއްވާފައެވެ.