މަގާމުން އެއްފަރާތްވީ ސިއްޙީ ސަބަބުތަކަށްޓަކައި، ރައީސް މުޢިއްޒާއެކު ހުރީ ސާބިތުކަމާއެކު: ޒަމީރު

ފިނޭންސް މިނިސްޓަރުގެ މަގާމުން އިއްޔެ އިސްތިއުފާ ދެއްވި މޫސާ ޒަމީރު، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރާއި ޕީއެންސީގެ ފިކުރާއެކު ސާބިތުކަމާއެކު ހުންނެވިކަން ހާމަކުރައްވައިފިއެވެ.

ޕީއެންސީން މިރޭ ބޭއްވި ޖަގަހަ ޖަލްސާގައި ވާހަކަފުޅު ދައްކަވަމުން ޒަމީރު ވިދާޅުވީ، ވަޒީރުކަމުގެ މަގާމުން އެއްފަރާތްވެވަޑައިގަތުމަށް ނިންމެވީ ސިއްޙީ ހާލަތު ހުރިގޮތުން އެ މަގާމުގެ ބުރަ ޒިންމާތައް އުފުއްލެވުމަށް އުނދަގޫތަކެއް ހުރުމުން ކަމަށެވެ. އަދި ސިއްޙީ މައްސަލަތަކެއް ހުރެމެ މަގާމުގައި ދެމިހުރުމަކީ ޕާޓީއަށާއި ގައުމަށް އެންމެ ފައިދާހުރި ގޮތް ނޫން ކަމަށް ގަބޫލުކުރައްވާތީ، ގާބިލު އާ ބޭފުޅުންނަށް ފުރުސަތު ދެއްވުމަކީ އެންމެ ރަނގަޅު ގޮތް ކަމަށް އޭނާ ވިދާޅުވިއެވެ.

ޒަމީރު ފާހަގަކުރެއްވި ގޮތުގައި، ވޭތުވެދިޔަ ހަ މަސްދުވަހަކީ ދުނިޔޭގެ އިގްތިސާދީ މަސްރަހަށް އައި ބަދަލުތަކާއެކު، ފިނޭންސް މިނިސްޓަރުގެ ހައިސިއްޔަތުން ނުހަނު ބޮޑެތި ޒިންމާތަކެއް އުފުލަންޖެހުނު ދުވަސްތަކެކެވެ. ހާއްސަކޮށް ތެލުގެ އަގަށް އަންނަ ބަދަލުތަކާ ގުޅިގެން ކުރަންޖެހުނު މަސައްކަތްތައް އޭނާ ފާހަގަކުރެއްވިއެވެ.

ރައީސް ޑރ. މުހައްމަދު މުއިއްޒުގެ ސިޔާސަތުތަކަށް ތައުރީފު ކުރައްވަމުން ޒަމީރު ވިދާޅުވީ، ރައީސް މުއިއްޒު ގެންގުޅުއްވަނީ "މޯލްޑިވްސް ފަސްޓް" ނުވަތަ ދިވެހިރާއްޖެ އިސްކުރުމުގެ ވަރުގަދަ ޚާރިޖީ ސިޔާސަތެއް ކަމަށެވެ. އަދި އިސްލާމްދީނާއި، ގައުމިއްޔަތު ދިރުވައި، ރައްޔިތުންގެ ފުދުންތެރިކަން އިތުރުކުރުމަށް ރައީސް ކުރައްވާ މަސައްކަތްޕުޅުތަކަށް ފުރިހަމައަށް ތާއީދުކުރައްވާ ކަމަށް ވިދާޅުވިއެވެ.

ޒަމީރު ވިދާޅުވި ގޮތުގައި ޑީއާރުޕީން ފެށިގެން ޕީޕީއެމް އަދި ޕީއެންސީއާ ހަމައަށް އޮތީ އެއް ފިކުރެކެވެ. އަދި މިވަގުތު އެ ފިކުރުގެ އެންމެ އިސް ލީޑަރަކީ ރައީސް މުއިއްޒު ކަމަށްވާއިރު، މަގާމުގައި ނެތް ނަމަވެސް ޕާޓީ ކުރިއެރުވުމުގައި އެމަނިކުފާނާއެކު "ގަދަކޮށް" ހުންނަވާނެ ކަމުގެ ޔަގީންކަން ޒަމީރު ދެއްވިއެވެ.

"ޕާޓީއަށް ބޭނުންވާ ކޮންމެ ދުވަހަކު އަޅުގަނޑު ހުންނާނަން. އަޅުގަނޑު މިހުރީ ހަމަ ވަރަށް ގަދަކޮށް ރައީސް ޑރ. މުއިއްޒުއާއެކު،" ޒަމީރު ވިދާޅުވިއެވެ.

މީގެ އިތުރުން، 2018 ވަނަ އަހަރު ސަރުކާރު ބަދަލުވުމަށްފަހު ސިޔާސީ ކަންކަމާ ކުޑަކޮށް ދުރަށް ޖެހިލެއްވި ސަބަބާ ގުޅޭގޮތުން ވާހަކަދައްކަވަމުން ޒަމީރު ވިދާޅުވީ، އުމުރުން ދުވަސްވަމުންދާއިރު އާ ލީޑަޝިޕަކަށް ފުރުސަތު ދިނުމަކީ ޕާޓީގެ ކުރިމަގަށް ކޮންމެހެން މުހިންމު ކަމެއް ކަމަށް ދެކޭ ކަމަށެވެ. ނަމަވެސް ޕާޓީއަށް ޚިދުމަތް ކުރުމުގައި އަބަދުވެސް ދެމިހުންނަވާނެ ކަމަށް އޭނާ ވިދާޅުވިއެވެ.