ދިވެހިންނަށް ޚާއްޞަ ދާއިރާތަކުގައި ހަރަކާތްތެރިވި ބޭރުގެ 28 އިންވެސްޓްމަންޓް ކުންފުންޏެއް އުވާލައިފި

ދިވެހި ވިޔަފާރިވެރިންނަށް ޚާއްޞަކޮށްފައިވާ އިންވެސްޓްމަންޓް ދާއިރާތަކުގައި ހަރަކާތްތެރިވަމުން ދިޔަ ފޮރިން އިންވެސްޓްމަންޓް ކުންފުނިތަކުގެ ތެރެއިން، ކުންފުނީގެ ޤާނޫނުގެ ދަށުން ރަޖިސްޓްރާރ އޮފް ކޮމްޕެނީސް އުވާލުމަށް ކަނޑައަޅައި އިޢުލާނުކުރި ލިސްޓުގައި ހިމެނޭ 28 ކުންފުންޏެއް މިއަދު އުވާލައިފިއެވެ.

މިނިސްޓްރީ އޮފް އިކޮނޮމިކް ޑިވެލޮޕްމަންޓް އެންޑް ޓްރޭޑުން ހާމަކުރި ގޮތުގައި، މި ކުންފުނިތައް އުވާލާފައިވަނީ ޤާނޫނު ނަންބަރު 2023/7 (ކުންފުނީގެ ޤާނޫނު) ގެ 246 ވަނަ މާއްދާގެ ދަށުންނާއި، ޤަވާއިދު ނަންބަރު 2025/R-83 (ކުންފުނި އުވައިލުމަށް ރަޖިސްޓްރާރ ކަނޑައަޅާފައިވާ އިޖުރާއާތުތައް ބަޔާންކުރުމުގެ ޤަވާއިދު) ގައިވާ އެންމެހައި އިޖުރާއާތުތައް ފުރިހަމަކުރުމަށް ފަހުގައެވެ.

2024 ވަނަ އަހަރު ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ތަޞްދީޤުކުރެއްވި އައު ފޮރިން އިންވެސްޓްމަންޓް ޤާނޫނުގެ ދަށުން އެކުލަވާލެވުނު އިންވެސްޓްމަންޓް ޝަރުތުތަކުގައި، ދާއިރާތައް ވަނީ ތިން ބަޔަކަށް ބަހާލާފައެވެ. އެއީ ބޭރުގެ ފަރާތްތަކަށް ފުރިހަމަ މިލްކުވެރިކަން ލިބޭ ދާއިރާތަކާއި، ޖޮއިންޓް ވެންޗަރގެ ގޮތުގައި ހިންގޭ ދާއިރާތަކުގެ އިތުރުން ބޭރުގެ އިންވެސްޓްމަންޓްތަކަށް މުޅިން ބަންދުކޮށްފައިވާ ދާއިރާތަކެވެ. މި ކެޓަގަރީތައް ކަނޑައަޅާފައިވަނީ ކެބިނެޓުގެ މަޝްވަރާތަކާއި ސިނާޢަތްތަކުގެ މަންދޫބުންނާއެކު ބޭއްވުނު ބައްދަލުވުންތަކަށް ފަހު، ޤައުމީ ސަލާމަތާއި، ދިވެހި ވިޔަފާރިތަކުގެ ޤާބިލުކަމަށް ބެލުމަށްފަހުގައެވެ.

އިކޮނޮމިކް މިނިސްޓްރީން ފާހަގަކުރި ގޮތުގައި ދިވެހިންގެ ހުނަރާއި ތަޖުރިބާ ހުރި ދާއިރާތައް ހާއްސަކުރާނީ ދިވެހިންނަށެވެ. މީގެ ތެރޭގައި ހޯލްސޭލް އަދި ރީޓެއިލް ވިޔަފާރި، ލޮޖިސްޓިކްސް، ކަނޑުދަތުރުފަތުރުގެ ޚިދުމަތްތައް، ބަންކަރިންގ ޚިދުމަތް، 15 މިލިއަން ޑޮލަރުން ދަށުގެ ކޮންސްޓްރަކްޝަން މަޝްރޫޢުތައް އަދި 100 މިލިއަން ޑޮލަރުން ދަށުގެ ރިއަލް އެސްޓޭޓް މަޝްރޫޢުތައް ހިމެނެއެވެ.

މީގެ ކުރިން ބޭރުގެ ފަރާތްތަކަށް ހުޅުވާލެވިފައި އޮތް ދާއިރާތަކުގެ ތެރެއިން މިހާރު ގިންތި ބަދަލުކުރެވިފައިވާ ދާއިރާތަކުގައި މިހާރުވެސް ހަރަކާތްތެރިވާ އިންވެސްޓަރުންނަށް ޓްރާންސިޝަން މުއްދަތެއް ދިނުމަށް ވަނީ ނިންމާފައެވެ. މި މުއްދަތު އިންވެސްޓްމަންޓްގެ ކުޑަބޮޑުމިނަށް ބަލައި 1 އަހަރާއި 7 އަހަރާ ދެމެދުގެ މުއްދަތަކަށް ދެވޭނެ ކަމަށް އިކޮނޮމިކް މިނިސްޓްރީން ބަޔާންކުރެއެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ތަޞައްވުރާ އެއްގޮތަށް، 2040 ވަނަ އަހަރާ ހަމައަށް ރާއްޖެއަކީ ތަރައްޤީވެފައިވާ ޤައުމަކަށް ހެދުމަށް ކުރެވޭ މަސައްކަތުގެ ދަށުން، ދިވެހިންގެ ތަޖުރިބާ މަދު ދާއިރާތަކުން ބޭރުގެ އިންވެސްޓަރުންނަށް ފުރުޞަތުތައް ފަހިކޮށްދިނުން ކުރިއަށްދާނެ ކަމަށް ވެސް މިނިސްޓްރީން ވަނީ ބަޔާންކޮށްފައެވެ.