ލަންކާގެ ބާޒާރަށް "ފަސްމީރު" ބްރޭންޑް ތައާރަފް ވެގެންދިއުމުން ވިޔަފާރީގެ އައު ދޮރުތަކެއް ހުޅުވިގެންދާނެ: ވަޒީރު

ސްރީލަންކާގެ ބާޒާރަށް މިފްކޯ ގެ "ފަސްމީރު" ބްރޭންޑް ތައާރަފް ވެގެންދިއުމުން ރާއްޖޭގެ މަހުގެ އުފެއްދުންތަކުގެ އިތުރުން ވިޔަފާރީގެ އައު ދޮރުތަކެއް ހުޅުވިގެންދާނެ ކަމަށް މަސްވެރިކަމާއި، ދަނޑުވެރިކަމާ ކަނޑުގެ ވަސީލަތްތަކާ ބެހޭ ވަޒީރު އަހްމަދު ޝިޔާމް ވިދާޅުވެއްޖެއެވެ.

ވަޒީރު މިހެން ވިދާޅުވީ ރައީސުލްޖުމްހޫރިއްޔާ ޑރ.މުހައްމަދު މުއިއްޒު މިހާރު ސްރީލަންކާއަށް ކުރައްވަމުންގެންދަވާ ދަތުރުފުޅުގެ ތެރެއިން އެ ގައުމުގެ ބާޒާރަށް "ފަސްމީރު ބްރޭންޑް" ތަޢާރަފް ކުރުމަށް މިއަދު ބޭއްވި ރަސްމިއްޔާތުގައެވެ.

ވަޒީރު ވިދާޅުވީ ދިވެހިރާއްޖޭގެ މަހުގެ އުފެއްދުންތަކަކީ އަބަދުވެސް ސްރީލަންކާގެ ރައްޔިތުންގެ މެދުގައި ވަރަށް މަގުބޫލު އުފެއްދުންތަކެއް ކަމަށެވެ. އެހެންވީމާ ލަންކާގެ ބާޒާރަށް މިފްކޯގެ އުފެއްދުންތައް ތައާރަފްކުރުމުން ލަންކާގެ ރައްޔިތުންނަށާއި ލަންކާގައި ދިިއުޅޭ ދިވެހި ރައްޔިތުންނަށް ދިވެހި މަހުގެ އުފެއްދުންތައް ފަސޭހަ ކަމާއެކު ލިބިގެންދާނެ ކަމަށް ވަޒީރު ވިދާޅުވިއެވެ.

ސްރީލަންކާގެ ބާޒާރަށް މިފްކޯގެ"ފަސްމީރު ބްރޭންޑް" ތައާރަފް ވެގެންދިއުމަކީ، ލަންކާގެ ރައްޔިތުންނަށާއި، އެގައުމުގައި ދިރިއުޅޭ ދިވެހި ރައްޔިތުންނަށް، ފަސޭހަކަމާއި އިތުބާރާއިއެކު، ދިވެހި ކަނޑުމަހުގެ ބާވަތްތައް ލިބޭނެ އިންތިޒާމު ހަމަޖެއްސުމަށް ހުޅުވިގެންދިޔަ ފަހި ފުރުސަތެއްކަމަށްވެސް ވަޒީރު ވިދާޅުވިއެވެ.

ރާއްޖޭގެ މަސްވެރިކަމުގެ އުފެއްދުާންތަކަކީ، ވަކިން ޚާއްޞަކޮށް "މޯލްޑިވް ފިޝް" ނުވަތަ ހިކިމަހަކީ، ސްރީލަންކާގެ ގޭބިސީތަކުގައި ނުހަނު ބޮޑު މަޤްބޫލުކަމެއް ލިބިފައިވާ ބާވަތްތަކެއް. މިއަދު މިފްކޯއިން މި ފެށި މަސައްކަތަކީ، ސްރީލަންކާގެ ރައްޔިތުންނަށާއި އެ ޤައުމުގައި ދިރިއުޅޭ ގިނަ އަދަދެއްގެ ދިވެހިންނަށް، އިތުބާރު ހުރި ދިވެހި އުފެއްދުންތައް ފަސޭހަކަމާއެކު ލިބޭނެ މަގު ފަހިކޮށްދިނުމަށްޓަކައި އެޅުނު މުހިންމު ފިޔަވަޅެއް

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުން، ރާއްޖޭގެ މަސްވެރިކަމުގެ ސިނާޢަތް ތަރައްޤީކޮށް އިޤްތިޞާދީ ނަފާ އިތުރުކުރުމަށްޓަކައި ވަރަށް ބޮޑު އިސްކަމެއް ދެއްވާކަން ވަޒީރު ފާހަގަކުރެއްވިއެވެ. އެގޮތުން ރައީސްގެ ހަރުދަނާ އިރުޝާދުފުޅުގެ ދަށުން، މަހުގެ އުފެއްދުންތަކަށް އަގުއެއްކުރުމާ މި ސިނާޢަތަކީ ތިމާވެއްޓާ ރައްޓެހި އަދި ދެމެހެއްޓެނިވި ސިނާޢަތަކަށް ހެދުމަށް ގިނަ މަސައްކަތްތަކެއް ކުރަމުންދާކަމަށް ވިދާޅުވިއެވެ. އަދި މިއަދު މި ފާހަގަކުރާ ކުރިއެރުމަކީވެސް ރައީސްގެ ދުރުވިސްނޭ ތަޞައްވުރުގެ ފޮނި މޭވާކަމަށާއި މީގެ ސަބަބުން ދިވެހި މަހުގެ އުފެއްދުންތައް ސީދާ ލަންކާގެ ބާޒާރަށް ތަޢާރަފުވެ، ވިޔަފާރީގެ އައު ދޮރުތަކެއް ހުޅުވިގެންދާނެކަމަށް ވިދާޅުވިއެވެ.

ދިވެހިރާއްޖެއާއެކު ބާއްވާ ގާތްގުޅުމާއި، ދެއްވާ ފުރިހަމަ އެއްބާރުލުމަށްޓަކައި ސްރީލަންކާގެ ރައްޔިތުންނަށާއި، ޑިވެލޮޕްމަންޓް އިންޓަރޕްލޭން ސިލޯން ޕްރަވެޓް ލިމިޓެޑްގެ ސީ.އީ.އޯ ޒުރައިޝް ހާޝިމަށް ވަޒީރު ޝުކުރު އަދާ ކުރެއްވިއެވެ. އަދި މި ފެށުނު މަސައްކަތަކީ ދެ ޤައުމުގެ ދެމެދުގައި އޮތް ގުޅުން އިތުރަށް ބަދަހި ވެގެންދާނެ ކަމަށް އުންމީދު ކުރައްވާކަމަށް ވަޒީރު ވިދާޅުވިއެވެ.