މޫސުމީ ބަދަލުތަކުގެ ސަބަބުން ހިޖުރަކުރަންޖެހޭ މީހުންގެ ރައްކާތެރިކަން ކަށަވަރުކުރުމަށް ބައިނަލްއަގުވާމީ އެއްބާރުލުން ބޭނުންވޭ: ނައިބު ރައީސް

މޫސުމީ ބަދަލުތަކުގެ ސަބަބުން އެންމެ ބޮޑަށް އަސަރުކުރާ ގައުމުތަކަށް ކުރިމަތިވެފައިވާ ގޮންޖެހުންތަކުން އަރައިގަތުމަށް ބައިނަލްއަގުވާމީ އެއްބާރުލުން ވަރުގަދަކޮށް، މޫސުމީ މާލީ އެހީތެރިކަން (ކްލައިމެޓް ފައިނޭންސް) އިތުރުކުރުމަށް ރައީސުލްޖުމްހޫރިއްޔާގެ ނައިބު އަލްއުސްތާޛު ޙުސައިން މުޙައްމަދު ލަޠީފް ގޮވާލައްވައިފިއެވެ.

ނައިބު ރައީސް މިކަމަށް ގޮވާލެއްވީ ޖަރުމަނުވިލާތުގެ ބާލިންގައި ކުރިއަށްދާ "ބާލިން ކްލައިމެޓް މޮބިލިޓީ ފޯރަމް 2026" ގެ މަތީ ފަންތީގެ ވެރިންގެ ސެޝަންގައި ތަގުރީރު ކުރައްވަމުންނެވެ.

މި ސެޝަންގައި ވާހަކަފުޅު ދައްކަވަމުން ނައިބު ރައީސް ވަނީ، މޫސުމީ ބަދަލުތަކުގެ ސަބަބުން މީހުން އެއްތަނުން އަނެއްތަނަށް ހިޖުރަކުރަންޖެހުމުގެ މައްސަލައަކީ މިއަދު ދުނިޔެއަށް ކުރިމަތިވެފައިވާ ބޮޑު ގޮންޖެހުމެއްކަން ފާހަގަކުރައްވާފައެވެ. އަދި މިފަދަ ނާޒުކު ގައުމުތަކަށް އެހީތެރިވުމުގައި މޫސުމީ މާލީ އެހީތެރިކަން އިތުރުކުރުމަކީ ކޮންމެހެން ބޭނުންތެރި ކަމެއް ކަމަށް އެމަނިކުފާނު ވިދާޅުވިއެވެ.

ނައިބު ރައީސްގެ ތަގުރީރުގައި ބޮޑަށް އަލިއަޅުއްވާލެއްވީ، މޫސުމީ ބަދަލުތަކުގެ ސަބަބުން ދިމާވާ ހިޖުރަކުރުމުގެ މައްސަލަތަކުގައި މުޖުތަމައުތަކުގެ ފުދުންތެރިކަން (ރެސިލިއަންސް) އިތުރުކުރުމަށް އިސްކަންދިނުމުގެ މައްޗަށެވެ. އަދި މީހުން ހިޖުރަކުރަންޖެހޭ ހާލަތްތަކުގައި، އެކަމަކީ ކުރިއާލާ ރޭވުންތެރިކަމާއެކު ކުރެވޭ، އަމިއްލަ އިޚްތިޔާރުގައި ކުރެވޭ، އަދި އިންސާނީ ކަރާމާތް ހިމާޔަތްކުރެވޭ ފަދަ އިންތިޒާމެއްގެ ދަށުން ހިނގާ ކަމެއްކަން ކަށަވަރުކުރަންޖެހޭ ކަމަށް އެމަނިކުފާނު ވިދާޅުވިއެވެ.

މި ފޯރަމަކީ މޫސުމީ ބަދަލުތަކުގެ ސަބަބުން އިންސާނުން އެއްތަނުން އަނެއްތަނަށް ހިޖުރަކުރަންޖެހޭ މައްސަލައަށް ދުނިޔޭގެ ފެންވަރުގައި ހައްލު ހޯދުމަށް ބާއްވާ މުހިންމު ބައްދަލުވުމެކެވެ. މި ބައްދަލުވުމުގައި ދުނިޔޭގެ އެކި ގައުމުތަކުގެ އިސްވެރިން ބައިވެރިވެވަޑައިގަންނަވައެވެ.