ފަހި ފްލެޓުތައް ކައިރީ އުނދަގޫވާ ގޮތަށް ބަހައްޓާފައި ހުރި ކުނިތައް ނަގަން އަންގައިފި

ހުޅުމާލޭގެ ދެވަނަ ފިޔަވަހީގައި ފަހި ދިރިއުޅުން ކޯޕަރޭޝަން (އެފްޑީސީ) އިން ތަރައްޤީކޮށްފައިވާ 4000 ހައުސިންގ ޔުނިޓުތަކުގެ އާންމު ސަރަހައްދުތަކާއި ކޯރިޑޯތަކުގައި، އާންމުންނަށް ދަތިވާނޭހެން މުދަލާއި ތަކެތި ބަހައްޓާފައިވާތީ އެ ތަކެތި ނެގުމަށް އެ ކޯޕަރޭޝަނުން އަންގައިފިއެވެ.

އެފްޑީސީން ބުނީ، ޓަވަރުތަކުގެ އާންމު ސަރަހައްދުތަކުގައި އުސޫލުތަކާ ހިލާފަށް ތަކެތި ބެހެއްޓުމާއި ކުނި ޖަމާކުރުމުގެ ސަބަބުން، އެ ތަންތަނުގައި ދިރިއުޅޭ ފަރާތްތަކަށް ބޮޑެތި ދަތިތަކަކާ ކުރިމަތިވަމުންދާ ކަމުގެ ޝަކުވާ ލިބެމުންދާ ކަމަށެވެ. މިގޮތަށް ކަންތައް ކުރުމުގެ ސަބަބުން ސިއްހީ ގޮތުންނާއި ރައްކާތެރިކަމުގެ ގޮތުން ނުރައްކާތަކެއް ކުރިމަތިވެދާނެ ކަމަށްވެސް އެ ކޯޕަރޭޝަނުން ފާހަގަކުރެއެވެ.

މިގޮތަށް އާންމު ސަރަހައްދުތަކުގައި ތަކެތި ބެހެއްޓުމަކީ އެ ކޯޕަރޭޝަނުން ކަނޑައަޅާފައިވާ އިމާރާތް ބޭނުންކުރުމުގެ ގަވާއިދާ ހިލާފު ކަމެއްކަން އެފްޑީސީން ވަނީ ހަނދާންކޮށްދީފައެވެ. އެހެންކަމުން، ޓަވަރުތަކުގެ އާންމު ސަރަހައްދުތަކުގައި ގަވާއިދާ ހިލާފަށް ބަހައްޓާފައިވާ ތަކެތި، މި މަހުގެ 15 ވާ އާދީއްތަ ދުވަހުގެ ރޭގަނޑު 8:00 ގެ ކުރިން ނެގުމަށް އެ ކޯޕަރޭޝަނުން ވަނީ އިލްތިމާސްކޮށްފައެވެ.

އެފްޑީސީން އިތުރަށް ބުނީ، ކަނޑައެޅިފައިވާ ސުންގަޑިއަށް ނުނަގައި ހުންނަ ތަކެތި އެ ކޯޕަރޭޝަނުގެ ފަރާތުން ނަގައި، އެ ސަރަހައްދުތައް ސާފުކުރުމުގެ މަސައްކަތް ކުރިއަށް ގެންދާނެ ކަމަށެވެ. އަދި މި މަސައްކަތުގެ ތެރޭގައި އެއްވެސް މުދަލަކަށް ނުވަތަ ތަކެއްޗަކަށް ލިބިދާނެ ގެއްލުމަކަށް އެ ކޯޕަރޭޝަނުން ޒިންމާ ނުވާނެ ކަމަށްވެސް ބުނެފައިވެއެވެ.

މިފަދަ ކަންކަމުގައި އެފްޑީސީގެ ޓަވަރުތަކުގައި ދިރިއުޅޭ ފަރާތްތަކުން ދެއްވާ އެއްބާރުލުމަށް އެ ކޯޕަރޭޝަނުން ވަނީ ޝުކުރު އަދާކޮށްފައެވެ. އެފްޑީސީން ދަނީ ހުޅުމާލޭގެ ދެވަނަ ފިޔަވަހީގައި ތަރައްޤީކޮށްފައިވާ ފްލެޓުތަކުގެ އިންތިޒާމުތައް ހަރުދަނާކޮށް، ދިރިއުޅޭ ފަރާތްތަކަށް އަމާން މާހައުލެއް ގާއިމުކޮށްދިނުމަށް ގިނަ މަސައްކަތްތަކެއް ކުރަމުންނެވެ.