ޤައުމީ ތަރައްޤީގެ މާސްޓަރ ޕްލޭން ނިމުމަކަށް: ހުރިހާ ރަށަކަށް ހަމަހަމަ ތަރައްޤީ ގެނެސްދެއްވާނެ ކަމަށް ރައީސް ވިދާޅުވެއްޖެ

ޤައުމީ ތަރައްޤީގެ މާސްޓަރ ޕްލޭން އެކުލަވައިލުމުގެ މަސައްކަތް ގާތްގަނޑަކަށް ނިމިފައިވާ ކަމަށާއި، ސަރުކާރުގެ އަމާޒަކީ ރާއްޖޭގެ ހުރިހާ ސަރަޙައްދަކަށް ހަމަހަމަކަމާއެކު ތަރައްޤީ ގެނެސްދިނުން ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ. ރައީސް މިހެން ވިދާޅުވީ ޕީ.އެސް.އެމް ނިއުސްގެ "ނޭޝަން ޗެޓް" ޕްރޮގްރާމުގައި ވާހަކަފުޅު ދައްކަވަމުންނެވެ.

ރައީސް މުޢިއްޒު ފާހަގަކުރެއްވި ގޮތުގައި، މި ސަރުކާރުގެ ސިޔާސަތަކީ ހަމައެކަނި މާލެ ސަރަޙައްދަށް ތަރައްޤީ މަރުކަޒު ކުރުމުގެ ބަދަލުގައި، ލާމަރުކަޒީ އުޞޫލުން ހުރިހާ ރަށަކަށް ތަރައްޤީ ފޯރުކޮށްދިނުމެވެ. މިގޮތުން، މިހާތަނަށް ހިނގަމުންދާ މަޝްރޫޢުތަކުގެ ތަފާސްހިސާބުތަކަށް ބަލާއިރު، ކުރީގެ ސަރުކާރުތަކާ އަޅާބަލާއިރު މި ސަރުކާރުން ގިނަ މަސައްކަތްތަކެއް ކުރަމުންދާކަން ރައީސް ފާހަގަކުރެއްވިއެވެ.

ރައީސް ވިދާޅުވި ގޮތުގައި، މި ސަރުކާރުގެ ފުރަތަމަ ދެ އަހަރާއި އަށް މަސްދުވަހުގެ ތެރޭގައި އެކި ދާއިރާތަކުން 590 މަޝްރޫޢެއް ވަނީ ނިންމާފައެވެ. މިއީ މީގެ ކުރީގެ އެމް.ޑީ.ޕީ ސަރުކާރުން އެ މުއްދަތުގައި ނިންމި 285 މަޝްރޫޢާއި، އޭގެ ކުރީ ސަރުކާރުން ނިންމި 321 މަޝްރޫޢާ އަޅާބަލާއިރު ބޮޑު ކުރިއެރުމެކެވެ. މީގެ އިތުރުން، މިހާރުވެސް 1,635 މަޝްރޫޢެއްގެ މަސައްކަތް ކުރިއަށްދާކަމަށް އެމަނިކުފާނު ވިދާޅުވިއެވެ.

ތަރައްޤީގެ މަޝްރޫޢުތައް ކުރިއަށްދަނީ ވަރަށް ބޮޑަށް ރޭވިފައިވާ "ރޯޑްމެޕް" އެއްގެ ދަށުންކަން ފާހަގަކުރައްވަމުން، ކުރިއަށް އޮތް ދެ އަހަރުގެ ތެރޭގައި ކޭޝް ފްލޯ މެނޭޖްކުރުމާއި، ބަޖެޓް ކަނޑައެޅުމާއި، ލޯނުތައް އަދާކުރުމުގެ ކަންކަން ތަރުތީބު ކުރެވިފައިވާ ކަމަށް ރައީސް ވިދާޅުވިއެވެ.

އިޖުތިމާޢީ ވަސީލަތްތަކާ ގުޅޭގޮތުން ވާހަކަފުޅު ދައްކަވަމުން ރައީސް ވިދާޅުވީ، ރާއްޖޭގެ ހުރިހާ ރަށެއްގައި ކުޑަކުދިންގެ ޕާކުތަކާއި އައުޓްޑޯ ޖިމްތައް ގާއިމުކުރުމަކީ މީގެ ކުރިން ދުވަހަކުވެސް ހާސިލުކުރެވިފައި ނުވާ ކަމެއް ކަމަށެވެ. އަދި 26 ޖުލައި 2028 ގެ މާ ކުރިން ހުރިހާ ރަށެއްގައި ފިޓްނަސް ސެންޓަރުތަކާއި ކުނި މެނޭޖްކުރާ މަރުކަޒުތަކުގެ މަސައްކަތް ނިންމާނެ ކަމުގެ ޔަޤީންކަން އެމަނިކުފާނު ދެއްވިއެވެ.

ޤައުމީ ތަރައްޤީގެ މާސްޓަރ ޕްލޭނާ ގުޅޭގޮތުން ރައީސް ވިދާޅުވީ، ޕްލޭންގެ ފުރަތަމަ ޑްރާފްޓް މިހާރު ނިމުމަކަށް އައިސްފައިވާ ކަމަށެވެ. އަދި އަންނަ ނޮވެމްބަރު މަހު މި ޕްލޭން އާންމުކުރުމުގެ ކުރިން، ކަމާބެހޭ ފަރާތްތަކާއެކު މަޝްވަރާ ބައްދަލުވުންތަކެއް ބޭއްވުމަށް ވަނީ ރޭވިފައެވެ. ސަރުކާރުގެ އަމާޒަކީ މެނިފެސްޓޯގައިވާ ކަންކަން ތަންފީޛުކޮށް، ރާއްޖޭގެ އުފެއްދުންތެރިކަން އިތުރުކޮށް، 2040 ވަނަ އަހަރާ ހަމައަށް ރާއްޖެއަކީ ތަރައްޤީވެފައިވާ ޤައުމަކަށް ހެދުމެވެ.