މަގުބޫލު ސަބަބެއް ނެތި ސްކޫލަށް ހާޒިރުނުވާ ދަރިވަރުންނާމެދު ފިޔަވަޅު އެޅުމަށް ޕްރިންސިޕަލުންނަށް އަންގައިފި

މަގުބޫލު އުޒުރެއް ނެތި ސްކޫލަށް ހާޒިރުނުވާ ދަރިވަރުންގެ އަދަދު އިތުރުވަމުންދާތީ، އެފަދަ ދަރިވަރުންނާމެދު ފިޔަވަޅު އެޅުމަށް ސްކޫލްތަކުގެ ޕްރިންސިޕަލުންނަށް އަންގާފައިވާނޭ ކަމަށް އެޑިއުކޭޝަން މިނިސްޓަރު ޑރ. އިސްމާޢީލް ޝަފީޢު ވިދާޅުވެއްޖެއެވެ.

މިއަދު ރައްޔިތުންގެ މަޖިލީހުގައި މިލަންދޫ ދާއިރާގެ މެންބަރު ޙަސަން މުފީދު ކުރެއްވި ސުވާލަކަށް ޖަވާބު ދެއްވަމުން މިނިސްޓަރު ވިދާޅުވީ، ކުދިން ސްކޫލަށް ހާޒިރުނުވާނަމަ އެކަންކަން ވަރަށް ގާތުން ބަލަންޖެހޭނެ ކަމަށެވެ.

"މިސާލަކަށް ކުއްޖަކު ސްކޫލަށް ހާޒިރުނުވެދާނެ. އަޅުގަނޑު މި ދައްކަނީ ބަލިވެގެން ނުވަތަ ރޯގާ ޖެހިގެން ހާޒިރުނުވާ ވާހަކައެއް ނޫން. އެކަމަކު އެއްވެސް ސަބަބަކާ ނުލައި ދަރިވަރުން މެދުނުކެނޑި ސްކޫލަށް ހާޒިރުނުވުމަކީ ބަލައިގަނެވޭނެ ކަމެއް ނޫން،" މިނިސްޓަރު ވިދާޅުވިއެވެ.

މިނިސްޓަރު ޝަފީޢު ވިދާޅުވި ގޮތުގައި، މިދިޔަ ހަފުތާގައި އޭނާ ވަނީ ސްކޫލްތަކުގެ ޕްރިންސިޕަލުންނާ ބައްދަލުކުރައްވައި، ކުދިން ހާޒިރުނުވާ ސަބަބުތައް ހޯދައި އެކަންކަމަށް އެކަށީގެންވާ ފިޔަވަޅު އެޅުމަށް އިރުޝާދު ދެއްވާފައެވެ.

މިނިސްޓަރު ފާހަގަކުރެއްވި ގޮތުގައި ސްކޫލަށް ހާޒިރުނުވާ ކުދިންގެ މައްސަލައިގައި އެންމެ ވަރުގަދަ ފިޔަވަޅުތަކެއް މީގެ ކުރިން އަޅާފައިވަނީ ޕީޕީއެމްގެ ސަރުކާރުގައެވެ. އެ ދުވަސްވަރު މަގުބޫލު ސަބަބެއް ނެތި ސްކޫލަށް ނާންނަ ކުދިން ދެނެގަނެ، އެކުދިން އަނބުރާ ކްލާސްރޫމްތަކަށް ގެނައުމަށް ބޮޑެތި މަސައްކަތްތަކެއް ކުރެވުނު ނަމަވެސް، އެމްޑީޕީގެ ސަރުކާރުގައި އެ މޮނިޓަރިން ނިޒާމު ބަލިކަށިވެ، ބޮޑު ފަހަތްޖެހުމެއް އައިސްފައިވާ ކަމަށް މިނިސްޓަރު ތުހުމަތު ކުރެއްވިއެވެ.

"ހާޒިރީއާ ބެހޭ ސިޔާސަތެއް އޮވޭ. އޭގައި އޮންނަނީ ވަކި މުއްދަތަކަށް، އެބަހީ 3 ދުވަސް ނުވަތަ 10 ދުވަހަށް ކުއްޖަކު ހާޒިރުނުވެއްޖެނަމަ އެކަން ރިޕޯޓްކުރަންޖެހޭނެ ކަމަށް. ވިދިވިދިގެން ތިން ދުވަހު ކުއްޖަކު ހާޒިރުނުވާނަމަ އެ މައުލޫމާތު ވަގުތުން މިނިސްޓްރީއާ ހިއްސާކުރަންޖެހޭ،" މިނިސްޓަރު ތަފްސީލު ދެއްވިއެވެ.

މި އަހަރުގެ ޖުލައި މަހު ކުރެވުނު މަސައްކަތްތަކުން ސްކޫލަށް ހާޒިރުނުވާ ކުދިންގެ އަދަދު އިތުރުވަމުންދާކަން ފާހަގަކުރެވިފައިވާ ކަމަށާއި، ކޮންމެ ދުވަހަކުވެސް ސްކޫލްތަކުން ހާޒިރީ ރިޕޯޓްކުރަންޖެހޭނެ ކަމަށް މިނިސްޓަރު ވިދާޅުވިއެވެ. އަދި އެއްވެސް ކުއްޖަކު ސްކޫލަށް ހާޒިރުނުވެ ހުރުމުގެ ފުރުސަތު މިނިސްޓްރީން ނުދޭނެ ކަމަށްވެސް ތަކުރާރުކޮށް ވިދާޅުވިއެވެ.

މިދިޔަ ބުރާސްފަތި ދުވަހު ބޭއްވި "ކީ ސްޓޭޖް 3 ގެ 2025 ވަނަ އަހަރުގެ ނޭޝަނަލް އެސެސްމަންޓް އޮފް ލާނިންގ އައުޓްކަމްސް ރިޕޯޓް" އިފްތިތާހުކުރުމުގެ ރަސްމިއްޔާތުގައިވެސް މިނިސްޓަރު ވަނީ މިކަމާ ކަންބޮޑުވުން ފާޅުކުރައްވާފައެވެ. އެގޮތުން ވޯލްޑް ކަޕް ދުވަސްވަރު ކުދިން ހާޒިރުނުވާ މިންވަރު އިތުރުވާކަން ފާހަގަކުރައްވައި، މިހާރުވެސް ގަވާއިދުން ސްކޫލަށް ހާޒިރުނުވާ 8،000 އެއްހާ ދަރިވަރުން އެބަތިބި ކަމަށާއި، އޭގެ ތެރެއިން 40 އިންސައްތައަކީ މާލެ ސަރަހައްދުގެ ކުދިން ކަމަށް މިނިސްޓަރު ވިދާޅުވިއެވެ.