ކައުންސިލްތަކަށް ބްލޮކް ގްރާންޓުގެ ގޮތުގައި 1.5 ބިލިއަން ރުފިޔާ ދޫކޮށްފި

މިއަހަރުގެ މިހާތަނަށް ރާއްޖޭގެ ލޯކަލް ކައުންސިލްތަކަށް ބްލޮކް ގްރާންޓުގެ ގޮތުގައި ސަރުކާރުން 1.5 ބިލިއަން ރުފިޔާ ދޫކޮށްފައިވާ ކަމަށް މިނިސްޓްރީ އޮފް ފައިނޭންސް އެންޑް އެންޓަޕްރައިޒުން ހާމަކޮށްފިއެވެ.

މިނިސްޓްރީން އާންމުކޮށްފައިވާ އެންމެ ފަހުގެ 'ވީކްލީ ފިސްކަލް ޑިވެލޮޕްމަންޓް ރިޕޯޓް' ދައްކާގޮތުން، މިއީ ވޭތުވެދިޔަ އަހަރުގެ މި މުއްދަތާ އަޅާބަލާއިރު 200.5 މިލިއަން ރުފިޔާ ނުވަތަ 16 އިންސައްތައިގެ އިތުރުވުމެކެވެ. މި ރިޕޯޓުގައި ފާހަގަކޮށްފައިވާ ގޮތުގައި، މި މުއްދަތުގައި ސަރުކާރުގެ ޚަރަދުތަކުގެ ތެރެއިން އެންމެ ބޮޑު ކުރިއެރުމެއް އައިސްފައިވަނީ ކައުންސިލްތަކަށް ދޫކުރާ ބްލޮކް ގްރާންޓަށެވެ. މި ފައިސާ އަކީ ލާމަރުކަޒީ ނިޒާމުގެ ދަށުން ރަށްރަށުގެ ތަރައްގީއަށާއި އާންމު ޚިދުމަތްތައް ފޯރުކޮށްދިނުމަށް ރައީސް ޑރ. މުޙައްމަދު މުޢިއްޒުގެ ސަރުކާރުން ކައުންސިލްތަކަށް ދޫކުރާ ފައިސާއެވެ.

އިގްތިސާދީ ތަފާސްހިސާބުތަކަށް ބަލާއިރު، ސަބްސިޑީއަށް ކުރި ޚަރަދު ވަނީ 3.1 ބިލިއަން ރުފިޔާއަށް އަރާފައެވެ. މިއީ މިދިޔަ އަހަރުގެ މި މުއްދަތުގައި ހޭދަވި 1.7 ބިލިއަން ރުފިޔާއާ އަޅާބަލާއިރު 86.3 އިންސައްތައިގެ ބޮޑު އިތުރުވުމެކެވެ. ސަރުކާރުގެ ޖުމްލަ ޚަރަދު މިހާރު ވަނީ 24.5 ބިލިއަން ރުފިޔާއަށް އަރާފައެވެ. މިއީ މިދިޔަ އަހަރަށްވުރެ 21 އިންސައްތަ އިތުރު އަދަދެކެވެ. މީގެ ތެރޭގައި ހިމެނެނީ ހިނގަމުންދާ ޚަރަދުގެ ގޮތުގައި 21.4 ބިލިއަން ރުފިޔާއާއި، ކެޕިޓަލް ޚަރަދުގެ ގޮތުގައި 3.2 ބިލިއަން ރުފިޔާއެވެ.

ދައުލަތުގެ ބަޖެޓުން 1.5 ބިލިއަން ރުފިޔާގެ ޑެފިސިޓެއް މި މުއްދަތުގައި ރެކޯޑުކުރެވިފައިވީ ނަމަވެސް، ދަރަނި އަދާކުރުމާއި އިންޓަރެސްޓް ޚަރަދުތައް ނުހިމަނައި ބަލާއިރު، ދައުލަތުގެ ޕްރައިމަރީ ބެލެންސް ހުރީ 1.2 ބިލިއަން ރުފިޔާގެ ސާޕްލަސްއެއްގައެވެ.

އާމްދަނީގެ ގޮތުގައި ދައުލަތަށް އެންމެ ބޮޑު ހިއްސާއެއް ވެފައިވަނީ ޓޫރިޒަމް ޖީއެސްޓީ (TGST) އެވެ. އެގޮތުން TGST އިން 6.7 ބިލިއަން ރުފިޔާ ލިބިފައިވާއިރު، މިއީ މިދިޔަ އަހަރާ އަޅާބަލާއިރު 7.7 އިންސައްތައިގެ ކުރިއެރުމެކެވެ. ޖުމްލަ ޓެކްސް އާމްދަނީ 11.3 އިންސައްތަ އިތުރުވެ 17.6 ބިލިއަން ރުފިޔާއަށް ވަނީ އަރާފައެވެ.

ޖުމްލަ ގޮތެއްގައި ދައުލަތަށް ލިބުނު އާމްދަނީއާއި ހިލޭ އެހީ ވަނީ 23 ބިލިއަން ރުފިޔާއަށް އަރާފައެވެ. މީގެ ތެރޭގައި ހިލޭ އެހީގެ ގޮތުގައި ލިބުނު 438.8 މިލިއަން ރުފިޔާ ހިމެނޭއިރު، މިއީ މިދިޔަ އަހަރާ އަޅާބަލާއިރު ދެގުނައަށްވުރެ ބޮޑު އިތުރުވުމެކެވެ. ނަމަވެސް ޓެކްސް ނޫން އާމްދަނީ 2.9 އިންސައްތަ ދަށަށް ގޮސް، ލިބިފައިވަނީ 4.9 ބިލިއަން ރުފިޔާއެވެ.