ކޮވިޑްގެ ތެރޭގައި ކޮރަޕްޝަންގެ މައްސަލައެއްގައި އައިޖީއެމްއެޗްގެ ކުރީގެ ޕްރޮކިއުމެންޓް ހެޑް، ލެބޯޓަރީ ހެޑް އަދި ކުރީ ސީއީއޯގެ މައްޗަށް ދައުވާކުރަނީ

 ކޯވިޑުގެ ބަލިމަޑުކަން ރާއްޖޭގައި ފެތުރުނު ދުވަސްވަރު ކޮރަޕްޝަންގެ އަމަލުތަކެއް ހިންގިކަމުގެ ތުހުމަތުގައި އައިޖީއެމްއެޗް ކުރީގެ 3 ވެރިޔަކަށް ދަޢުވާކުރުމަށް ވެރިންތަކަކަށް ދަޢުވާކުރަން އެންޓި ކޮރަޕްޝަން ކޮމިޝަނުން ޕްރޮސިކިއުޓަރ ޖެނެރަލް އޮފީހަށް ހުށަހަޅުއްވައިފިއެވެ.

މިމައްސަލައަކީ ކޯވިޑު-19ގެ ބަލިމަޑުކަމުގެ ތެރޭގައި، ޕީސީއާރް ޓެސްޓު ހެދުމަށް އައިޖީއެމްއެޗްގެ ލެބޯޓަރީއަށް ބޭނުންވާ ރީއެޖެންޓްސް ހޯދުމުގައި ނާޖާއިޒް މަންފާ ހޯދާފައިވާކަމަށް ތުހުމަތުކުރެވިގެން އޭސީސީން ތަހުގީޤުކުރި މައްސަލައެކެވެ.މި މައްސަލާގައި ދައުވާކުރަނީ އައި.ޖީ.އެމް.އެޗްގެ ކުރީގެ ސީ.އީ.އޯ އިބްރާހީމް ސަލީމާއި އައި.ޖީ.އެމް.އެޗްގެ ލެބޯޓަރީގެ ވެރިޔަކަށް ކުރިން ހުންނެވި ޑރ.މިލްޒާ ޢަބްދުލްމުޙްސިންއާއި އައި.ޖީ.އެމް.އެޗްގެ ޕްރޮކިއުމަންޓް ކޮމިޓީގެ ޗެއަރއަކަށް ހުންނެވި ޑރ. ޢަލީ ޢަބްދުﷲ ލަޠީފުގެ މައްޗަށެވެ.

ޑރ. ޢަލީ ޢަބްދުﷲ ލަޠީފަކީ އައި.ޖީ.އެމް.އެޗްގެ ޕްރޮކިއުމަންޓް ކޮމިޓީގެ ޗެއަރގެ އިތުރުން ކޯވިޑްގެ ދުވަސްވަރު މެޑިކަލް އެގްޒެކެޓިވް ކޮމިޓީގެ މެމްބަރުކަމާއި، ޓެކްނިކަލް އެޑްވައިޒަރީ ކޮމިޓީގެ މެންބަރު އަދި ޓެކްނިކަލް އެޑްވައިޒަރީ ގްރޫޕްގެ މެންބަރަކަށް ހުންނެވި ބޭފުޅެކެވެ.

މި 3 މީހުންގެ މައްޗަށްވެސް ވަނީ ރަސްމީ ހައިސިއްޔަތު ނަހަމަގޮތުގައި ބޭނުންކުރުމުގެ ކުށުގެ ދައުވާ އުފުލާފައެވެ. އަދި ޑރ. އަލީ އަބްދުﷲ ލަޠީފްގެ މައްޗަށް ޓެކުހަށް މަކަރު ހެދުމާއި، އޭނާގެ މަސްލަހަތު އޮންނަ އާރު.އެމް.އެލް.އެސް ލެބް ސަރވިސަސް އިން މަނީލޯންޑަރ ކޮށްފައިވާކަމުގެ ތުހުމަތުވެސް ކުރެއެވެ. މީގެ ތެރެއިން މަނީ ލޯންޑަރިން މައްސަލަ ވަކި މައްސަލައެއްގެ ގޮތުގައި ތަހުޤީޤުކޮށް ދިނުމަށް އެދި އޭސީސީން ވަނީ ފުލުހަށްވެސް ހުށަހަޅާފައެވެ.

އަދި ޓެކުހަށް މަކަރު ހަދާފައިވާކަމަށް ތުހުމަތު ކުރެވޭތީ އެ މައްސަލަ ތަހުޤީޤުކުރުމަށް މޯލްޑިވްސް އިންލޭންޑް ރެވެނިއު އޮތޯރިޓީ (މީރާ) އަށް ފޮނުވާފައިވާކަމަށްވެސް އޭސީސީން ވިދާޅުވެއެވެ.ކޮރަޕްޝަންގެ މައްސަލަތަކުގެ އިތުރުން ޑރ. ޢަލީ އަބްދުﷲ ލަޠީފު އަދި ޑރ.މި ލްޒާގެ ޑޮކްޓަރުންގެ ކަންކަން ބެލުމުގެ ބެލެނިވެރި ފަރާތްކަމަށްވާ މޯލްޑިވްސް މެޑިކަލް ކައުންސިލްގެ ސަމާލުކަމަށްވެސް އޭސީސީން ވަނީ ގެންނަވާފައެވެ.

އަދި އެ ދެ ޑޮކްޓަރުންނާމެދު ފިޔަވަޅެއް އަޅަން ޖެހޭކަމަށްވާނަމަ އެ ފިޔަވަޅެއް އެޅުއްވުމަށްފަހު އެކަން އޭސީސީއަށް އެންގެވުމަށް އޭސީސީން މެޑިކަލް ކައުންސިލުގައި ވަނީ އެދިފައެވެ.