ފެލިދެ އަތޮޅު ކައުންސިލުތަކުގެ މި މަހުގެ ސިލްސިލާ ބައްދަލުވުން ބާއްވައިފި

ފެލިދެއަތޮޅު ކައުންސިލުތަކުގެ މެދުގައި މަހަކު އެއް ފަހަރު ބާއްވަމުން އަންނަ ސިލްސިލާ ބައްދަލުވުމުގެ ތެރެއިން މި މަހުގެ ބައްދަލުވުން ބާއްވައިފިއެވެ.

ހިނގަމުން މިދާ ހަފުތާގެ ތެރޭގައި އޮންލައިންކޮށް ބޭއްވި މި ބައްދަލުވުމުގައި އެ އަތޮޅުގެ 5 ރަށުގެ ތެރެއިން 4 ރަށަކުން ބައިވެރިވިއެވެ. އެއީ ރަކީދޫއާއި، ކެޔޮދޫއާއި، ފެލިދޫއާއި އަދި ފުލިދޫއެވެ.

ވ. އަތޮޅު ހިމެނޭ ކުލަސްޓަރއިން އިންތިޒާމުކޮށްގެން ބޭއްވި މި ބައްދަލުވުމުގައި އެ ކުލަސްޓަރގެ ފަރާތުން ބައެއް ކަންކަން ކައުންސިލުތަކަށް ހިއްސާކުރެއްވިއެވެ. އެ ގޮތުން އެލްޖީއޭއަށް ފޮނުވަންޖެހޭ ރިޕޯރޓްތައް ޤަވާޢިދުން އެ ފަރާތަށް ފޮނުވޭކަން ކަށަވަރުކުރުމަށާއި، އެލްޖީއޭއާ ގުޅިގެން ވުޒާރާއިން އިންތިޒާމުކުރަން ގަސްތުކުރާ ޓްރޭނިންގ ޕްރޮގްރާމުގައި ބައިވެރިކުރަން ބޭނުންވާ މުވައްޒަފުންގެ ނަން ލިސްޓް އެކުލަވައިލުމަށާއި، އެތެރެހަށީގެ ޑޮކްޓަރަކު ރަށްރަށަށް ފޮނުވުމާ ބެހޭ މަޢުލޫމާތު ހިއްސާކުރެއްވިއެވެ.

ފެލިދެއަތޮޅު ކައުންސިލުތަކާއެކު ބޭއްވި މި ބައްދަލުވުމުގައި ބައިވެރިވި ކޮންމެ ރަށަކުން ވެސް އެ ރަށެއްގެ ކަންބޮޑުވުންތައް ހިއްސާކުރެއްވިއެވެ. އެ ގޮތުން ބައެއް ފަރާތްތަކަށް ބައެއް ރަށްރަށުގައި ދޫކޮށްފައި ހުރި ބިންތައް ހުސްކޮށް އޮތުމުގެ ކަންބޮޑުވުމާއި، އެސްޓިއޯ ބޭސްފިހާރަތަކުން ޤަވާޢިދުން ބޭސް ނުލިބުމުގެ ކަންބޮޑުވުމާއި، ޞިއްޙީ ދާއިރާއަށް ބޭނުންވާ ޑޮކްޓަރުން ލިބުމުގައި ހުރި ދަތިތަކާއި، ފެނާއި، ކަރަންޓުގެ ޚަރަދު ބޮޑުވުމުގެ ކަންބޮޑުވުމާއި، ކުނިމެނޭޖުކުރުމުގައި ހުރި ދަތިތަކާއި، އާރުޓީއެލްގެ ޚިދުމަތް ނުފެށި އޮތުމުގެ ކަންބޮޑުވުންތައް ކައުންސިލްތަކުން ހިއްސާކުރެއްވިއެވެ.

މި ބައްދަލުވުމުގައި ކުލަސްޓަރ ހިންގެވުމާއި ޙަވާލުވެ ހުންނެވި ކުލަސްޓަރ އެގްޒެކެޓިވް އަދި ޑެޕިޔުޓީ މިނިސްޓަރ އަޙްމަދު ޙަލީމުގެ އިތުރުން އެ ކުލަސްޓަރގައި ހިމެނިލައްވާ އެންމެހައި އަތޮޅު ކޯޑިނޭޓަރުން ބައިވެރިވެލެއްވިއެވެ.