ފުވައްމުލަކުގައި "ޑްރަގް ކެފޭ" އެއްގެ ގޮތުގައި ބޭނުންކުރި ތަނެއް ބަންދުކުރުމަށް ކޯޓުން އަމުރުކޮށްފި

ފުވައްމުލަކު ސިޓީގައި "ކެފޭ" އުސޫލުން މަސްތުވާތަކެތީގެ ޚިދުމަތްދޭ ކަމަށް ތުހުމަތުކުރެވޭ ތަނެއް ބަންދުކުރުމަށް ފުވައްމުލަކު މެޖިސްޓްރޭޓް ކޯޓުން އަމުރުކޮށްފިއެވެ.

ދިވެހި ފުލުހުންގެ ޚިދުމަތުން ހާމަކޮށްފައިވާ ގޮތުގައި، ކޯޓު އަމުރުގެ ދަށުން ބަންދުކުރަން އަމުރުކޮށްފައިވަނީ ފުވައްމުލަކު ފުނާޑު އަވަށު ގުލިސްތާނުގެއިން ބައެކެވެ. އެ ތަނަކީ މަސްތުވާތަކެތި ޓްރެފިކްކޮށް ވިއްކުމުގެ އިތުރުން، އެތަނުގައި ތިބެގެން މަސްތުވާތަކެތި ބޭނުންކުރެވޭ ގޮތަށް "ކެފޭ" އުސޫލުން ހިންގަމުންދާ ތަނެއް ކަމަށް ފުލުހުން ވަނީ ތުހުމަތުކޮށްފައެވެ.

ފުލުހުން މަޢުލޫމާތު ދޭ ގޮތުގައި، މިދިޔަ ބުދަ ދުވަހުން ފެށިގެން 85 ދުވަހުގެ މުއްދަތަށް އެތަން ބަންދުކުރުމަށް ކޯޓުން ވަނީ އަމުރުކޮށްފައެވެ. މިއީ މަސްތުވާތަކެއްޗާ ބެހޭ ގާނޫނުގެ ދަށުން، މަސްތުވާތަކެތި ބޭނުންކުރުމަށް މަގުފަހިކޮށްދޭ ތަނެއް ބަންދުކުރުމަށް ފުވައްމުލަކު މެޖިސްޓްރޭޓް ކޯޓުން އަމުރެއް ނެރުނު ފުރަތަމަ ފަހަރެވެ.

ކޯޓު އަމުރުގެ މުއްދަތުގައި، ފުލުހުންގެ ހުއްދައެއް ނެތި އެ ތަނަށް ވަނުމަކީ ޖިނާއީ ކުށެކެވެ. ފުލުހުން ވިދާޅުވި ގޮތުގައި އެ އަމުރާ ޚިލާފަށް އެތަނަށް ވަންނަ ފަރާތްތަކަށާއި، އެ ތަނަށް އެއްވެސް ގެއްލުމެއްދޭ ފަރާތްތަކާ މެދު ގާނޫނީ ގޮތުން ހަރުކަށި ފިޔަވަޅު އަޅާނެއެވެ.

މަސްތުވާތަކެއްޗާ ބެހޭ ގާނޫނުން ފުލުހުންނަށް ލިބިދޭ ބާރުގެ ދަށުން، މިފަދަ ތަންތަން ދެނެގަނެ ބަންދުކުރުމުގެ މަސައްކަތް ކުރިއަށް ގެންދާނެ ކަމަށް ފުލުހުން ވަނީ ބުނެފައެވެ. މަސްތުވާތަކެތީގެ މައްސަލައަކީ ރާއްޖެއަށް ކުރިމަތިވެފައިވާ އެންމެ ބޮޑު އިޖުތިމާއީ މައްސަލަ ކަމަށްވާތީ، މިކަމަށް ހައްލު ހޯދުމަށް ގާނޫނަށް ވަނީ މުހިންމު ބަދަލުތަކެއް ގެނެސްފައެވެ. މީގެ ތެރޭގައި، ވަކި މިންވަރަކަށް މަސްތުވާތަކެތި އެތެރެކުރާ ފަރާތްތަކަށް މަރުގެ އަދަބު ދިނުމުގެ މާއްދާވެސް މިއަހަރުގެ ކުރީކޮޅުން ފެށިގެން ވަނީ އަމަލުކުރަން ފަށާފައެވެ.

ފުލުހުންގެ ތަފާސްހިސާބުތަކަށް ބަލާއިރު، މިއަހަރުގެ މިހާތަނަށް މަސްތުވާތަކެތީގެ 821 މައްސަލަ ވަނީ ރިޕޯޓުކޮށްފައެވެ. މީގެ ކުރިން މާލޭގައި ވެސް މިފަދަ "ޑްރަގް ކެފޭ" ތައް ދެނެގަނެ، ގިނަ އަދަދެއްގެ ބަޔަކު ހައްޔަރުކޮށްފައިވާކަން ފާހަގަކުރެވެއެވެ.