ސަރުކާރު ހިއްސާވާ ކުންފުނިތަކުގެ ބޯޑަށް 7 ބޭފުޅަކު އައްޔަންކޮށްފި

ސަރުކާރު ހިއްސާވާ އެކި ކުންފުނިތަކުގެ ހިންގުން ހަރުދަނާކުރުމަށްޓަކައި، އެ ކުންފުނިތަކުގެ ޑިރެކްޓަރުންގެ ބޯޑަށް އައު މެންބަރުން އައްޔަންކޮށްފިއެވެ. ޕްރައިވެޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ) އިން އިއްޔެ އާއި މިއަދު ވަނީ މި އައްޔަންކުރުންތަކުގެ ތަފްސީލު ހާމަކޮށްފައެވެ.

ބިޒްނަސް ސެންޓަރ ކޯޕަރޭޝަން (ބީސީސީ)
ބީސީސީގެ ބޯޑަށް އައްޔަންކުރައްވާފައިވަނީ ސ. ހިތަދޫ، މީނާޒް، އީނާސް ނަޞީރުއެވެ. އީނާސް އަކީ ފައިނޭންސް ދާއިރާއިން 20 އަހަރަށްވުރެ ގިނަ ދުވަހުގެ ތަޖުރިބާ ހުރި، ޔޫކޭގެ ޔުނިވަރސިޓީ އޮފް ބެޑްފޯޑްޝަޔަރއިން އެމްބީއޭ ހާސިލްކުރައްވާފައިވާ ބޭފުޅެކެވެ. އޭނާ މިހާރު ހުންނެވީ ފިޝަރީޒް މިނިސްޓްރީގެ ފައިނޭންސް ޑިރެކްޓަރުގެ މަގާމުގައެވެ.

މޯލްޑިވްސް ފަންޑް މެނޭޖްމަންޓް ކޯޕަރޭޝަން (އެމްއެފްއެމްސީ)
މި ކޯޕަރޭޝަންގެ ބޯޑަށް އައްޔަންކުރީ ހއ. ތަކަންދޫ، ރަތްވިލާގެ، ހުސައިން އަބްދުލްވާހިދުއެވެ. އެކައުންޓިން އަދި ފިނޭންސް ދާއިރާއިން 17 އަހަރުގެ ތަޖުރިބާ ހުރި ހުސައިން ވަނީ ޔޫކޭއިން އޭސީސީއޭ (ACCA) އަދި އެމްބީއޭ ހާސިލްކުރައްވާފައެވެ. އޭނާ މިހާރު މަސައްކަތް ކުރައްވަނީ ފައިނޭންސް މިނިސްޓްރީގެ އެކައުންޓެންޓެއްގެ މަގާމުގައެވެ.

މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ (މިފްކޯ)
މިފްކޯގެ ބޯޑަށް އައްޔަންކުރައްވާފައިވަނީ ސ. ފޭދޫ، އާބާދީގެ، ފާޠިމަތު ޣާޒިޔާ ފަތުޙީއެވެ. ޗައިނާގެ ބެއިޖިންގއިން އިކޮނޮމިކްސްގެ ދާއިރާއިން މާސްޓަރސް ހާސިލްކުރައްވާފައިވާ ޣާޒިޔާ އަކީ އޭސީސީއޭ މެންބަރެއްވެސް މެއެވެ. އޭނާ މިހާރު ހުންނެވީ ފައިނޭންސް މިނިސްޓްރީގެ ހެޑް އޮފް ޑެޓް މެނޭޖުމަންޓްގެ މަގާމުގައެވެ.

ފަހި ދިރިއުޅުން ކޯޕަރޭޝަން (އެފްޑީސީ)
އެފްޑީސީގެ ބޯޑަށް އައްޔަންކުރައްވާފައިވަނީ މއ. ޝާހީން، ޢަބްދުﷲ ޔާމީންއެވެ. ޔާމީން ބޯޑަށް އައްޔަންކުރެއްވީ އެކައުންޓިން އަދި ފިނޭންސްގެ ދާއިރާއިންނެވެ.

އައިލެންޑް އޭވިއޭޝަން ސަރވިސަސް (އައިއޭއެސް)
ޤައުމީ އެއާލައިން ހިންގާ ކުންފުނީގެ ބޯޑަށް އައްޔަންކުރައްވާފައިވަނީ ދ. ކުޑަހުވަދޫ، ތިކުރީތު، މަޢީޝާ އިބްރާހިމްއެވެ. މަޢީޝާ އައްޔަންކުރައްވާފައިވަނީ އެކައުންޓިން އަދި ފިނޭންސް ދާއިރާގެ މެންބަރެއްގެ ގޮތުގައެވެ.

ހައުސިންގ ޑިވެލޮޕްމެންޓް ކޯޕަރޭޝަން (އެޗްޑީސީ)
އެޗްޑީސީގެ ބޯޑަށް އައްޔަންކުރައްވާފައިވަނީ ދ. ބަނޑިދޫ، ފެހިވިނަ، ޝާހިދު މޫސާއެވެ. ޝާހިދުވެސް ބޯޑަށް އައްޔަންކުރެއްވީ އެކައުންޓިން އަދި ފިނޭންސްގެ ދާއިރާ ތަމްސީލުކުރެއްވުމަށެވެ.

މޯލްޑިވްސް ޙައްޖު ކޯޕަރޭޝަން
ޙައްޖު ކޯޕަރޭޝަންގެ ބޯޑަށް އައްޔަންކުރައްވާފައިވަނީ ގ. ބާނީ، އަޙްމަދު މާޒިންއެވެ. މާޒިން ބޯޑަށް އައްޔަންކުރެއްވީ އެކައުންޓިން އަދި ފިނޭންސްގެ ދާއިރާއިންނެވެ.

މި އައްޔަންކުރުންތަކަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުން ކުންފުނިތަކުގެ ހިންގުން ހަރުދަނާކޮށް، ފަންނީ ބޭފުޅުންގެ އެހީތެރިކަން ހޯދުމަށް ކުރަމުންދާ މަސައްކަތުގެ ބައެކެވެ. ބޯޑުތަކަށް އައްޔަންކުރެވުނު ގިނަ ބޭފުޅުންނަކީ މިހާރުވެސް ދައުލަތުގެ މުހިންމު މަގާމުތަކުގައި ތިއްބެވި، ތަޢުލީމީ ގޮތުން ގާބިލު ބޭފުޅުންނެވެ.