މާލެއެކޭ އެއްފަދަ 'ޔޫތު ހަބް' ތަކާއި ސޯޝަލް ސެންޓަރުތައް އަތޮޅުތެރޭގައިވެސް ގާއިމުކުރަނީ
ރައީސުލްޖުމްހޫރިއްޔާގެ އޮފީހުން އަލަށް ފެށި "ދަ ޕަލްސް" ޕޮޑްކާސްޓް ސިލްސިލާގައި ވާހަކަފުޅު ދައްކަވަމުން، މާލޭގައި ހުންނަ ސޯޝަލް ސެންޓަރުގެ ކޮންސެޕްޓަށް ރާއްޖޭގެ އެކި ސިޓީތަކާއި އަތޮޅުތަކުގައި ޒަމާނީ 'ޔޫތު ހަބް' ތައް ގާއިމުކުރުމުގެ މަސައްކަތް ހަލުވިކަމާއެކު ކުރިއަށްދާކަން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ހާމަކުރައްވައިފިއެވެ.
ރައްޔިތުންގެ ހުރި ކަންބޮޑުވުންތަކަށް ޖަވާބުދެއްވުމަށް ފެއްޓެވި މި ޕޮޑްކާސްޓްގައި ރައީސް ވިދާޅުވީ، މާލޭގެ އިތުރުން އެކި ސިޓީތަކުގައި މިފަދަ ޒުވާނުންގެ މަރުކަޒުތައް ހެދުމަށް މިހާރު އެގްރީމަންޓްތަކުގައި ސޮއިކޮށް، ފައިސާ ހަމަޖައްސައި، އަމަލީ މަސައްކަތް ފެށިފައިވާ ކަމަށެވެ. މީގެ އިތުރުން މާލެއެކޭ އެއްފަދައިން ހުޅުމާލޭގައިވެސް މިފަދަ މަރުކަޒެއް ގާއިމުކުރުމުގެ މަސައްކަތް ސަރުކާރުން ކުރަމުންދާކަން އެމަނިކުފާނު ފާހަގަކުރެއްވިއެވެ.
ރައީސް ވިދާޅުވި ގޮތުގައި މާލޭގެ ސޯޝަލް ސެންޓަރަކީ ގިނަ އަދަދެއްގެ ޒުވާނުން ކުޅިވަރާއި އެކި ހަރަކާތްތަކަށް ބޭނުންކުރާ މަޝްހޫރު ތަނަކަށްވާއިރު، މިފަދަ ވަސީލަތްތައް ހަމައެކަނި މާލެއަށް ބަރޯސާވެފައި އޮތް އޮތުން ބަދަލުކޮށް، އަތޮޅުތެރޭގައިވެސް މިފަދަ މަރުކަޒުތައް ހުންނަންޖެހޭނެއެވެ. މިގޮތުން މި ދައުރުގެ ތެރޭގައި އާބާދީ ބޮޑު 25 ރަށެއްގައި މިފަދަ ސޯޝަލް ސެންޓަރުގެ ކޮންސެޕްޓްގެ އިންޑޯ ސްޕޯޓްސް ކޮމްޕްލެކްސްތައް ގާއިމުކުރެވޭނެ ކަމަށް ރައީސް ވިދާޅުވިއެވެ.
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
