ވިޔަފާރިތަކުގެ ކަންބޮޑުވުންތައް ހުށަހެޅުމަށާއި، އެ ކަންކަން ކުރިއަށްދާ ގޮތް ބެލުމަށް އިކޮނޮމިކް މިނިސްޓްރީން ޕޯޓަލްއެއް ތައާރަފްކޮށްފި

ވިޔަފާރިތަކުގެ ކަންބޮޑުވުންތައް ހުށަހެޅުމަށާއި، އެ ކަންކަން ކުރިއަށްދާ ގޮތް ބެލުމަށް އިކޮނޮމިކް މިނިސްޓްރީން ޕޯޓަލްއެއް ތައާރަފްކޮށްފި އެވެ.

ވިޔަފާރިތަކަށް ދިމާވާ ކަންބޮޑުވުންތައް ހިއްސާކުރުމާއި، ސުވާލުކުރުމާއި، އަދި ހިޔާލު ހުށަހެޅުން މިހާރު ސީދާ މިނިސްޓްރީ އޮފް އިކޮނޮމިކް ޑިވެލޮޕްމަންޓް، ޓްރާންސްޕޯޓް އެންޑް ޓްރޭޑަށް އާ އޮންލައިން ޕޯޓަލްއެއް މެދުވެރިކޮށް ކުރިއަށް ގެންދެވޭނެއެވެ. އަދި މި ޕޯޓަލް މެދުވެރިކޮށް ހުށަހަޅާ ކަންކަން ފަހުން ބަލައި، ޓްރެކް ވެސް ކުރެވޭނެއެވެ.

މިނިސްޓްރީން "ބިޒްނަސް ފެސިލިޓޭޝަން ޕޯޓަލް" ތަޢާރަފްކުރީ ވިޔަފާރިތަކަށް ދިމާވާ ދަތިތަކަށް ލުއި ފަސޭހަ ނިޒާމެއްގެ ދަށުން ހައްލުކޮށްދިނުމަށެވެ. މި ޕްލެޓްފޯމަކީ ކަންބޮޑުވުންތަކާއި، ސުވާލުތަކާއި، އަދި ހިޔާލުތަކަށް ހާއްސަކުރެވިފައިވާ އޮންލައިން ޕޯޓަލްއެކެވެ.

އީމެއިލް ނުވަތަ ފޯނުން މިނިސްޓްރީއާ ގުޅުމުގެ ބަދަލުގައި، ނުވަތަ އޮފީހަށް ޒިޔާރަތްކުރުމުގެ ބަދަލުގައި، ވިޔަފާރިތަކަށް މިހާރު facilitation.trade.gov.mv ގައި ރެޖިސްޓްރީވެ، އޮންލައިންކޮށް ހުށަހެޅުންތައް ހުށަހެޅޭނެއެވެ.

މި ޕޯޓަލްއިން ކޮންމެ ހުށަހެޅުމަކަށް ހާއްސަ ރެފަރެންސް ނަންބަރެއް ދޫކުރެއެވެ. މީގެ ސަބަބުން އެ މައްސަލައެއް ކުރިއަށްދާ ގޮތް ޔޫޒަރުންނަށް މޮނިޓާ ކުރެވޭނެ އެވެ. މީގެ އިތުރުން، މައްސަލަ އޮތް މަރުހަލާ އާއި، އެ މައްސަލައަކާ ގުޅިގެން މިނިސްޓްރީން ނިންމި ނިންމުންތަކާއި ދިން ޖަވާބުތައް ވެސް މި ޕޯޓަލްއިން ފެންނަން ހުންނާނެ އެވެ.

މި ނިޒާމުގެ މަގްސަދަކީ މިނިސްޓްރީ އާއި ވިޔަފާރިވެރިންގެ މެދުގައި ގާތް އަދި ބަދަހި މަސައްކަތުގެ ގުޅުމެއް އުފެއްދުމެވެ. އަދި ވިޔަފާރިތަކުން ހުށަހަޅާ ކަންބޮޑުވުންތައް މިނިސްޓްރީން ބަލައި، ހައްލުކުރުމަށް ކުރާ މަސައްކަތްތައް އިތުރަށް ހާމަކަން ބޮޑު ގޮތެއްގައި ވިޔަފާރިތަކަށް ފެންނަން ހުރުމެވެ.

މި ޕޯޓަލްއަކީ ސަރުކާރުގެ "މޯލްޑިވްސް 2.0" ސިޔާސަތުގެ ދަށުން، އާންމު ހިދުމަތްތައް ޒަމާނީކޮށް، އޮންލައިންކޮށް ފަސޭހައިން ލިބޭނެ ގޮތް ހެދުމަށް ކުރިއަށްގެންދާ މަސައްކަތުގެ ބައެކެވެ. ސަރުކާރުން އުންމީދު ކުރަނީ މި ޑިޖިޓަލް ނިޒާމުތަކަކީ ބޭނުންކުރަން ފަސޭހަ އަދި ރައްޔިތުންނާ ގާތުން ހިދުމަތް ފޯރުކޮށްދޭ ނިޒާމުތަކަކަށް ވެގެންދިއުމެވެ.

މި މަސައްކަތްތަކުގެ ދަށުން، މިނިސްޓްރީގެ ދާއިރާގައި ހިމެނޭ ހުރިހާ ހިދުމަތްތަކެއް އޮންލައިންކޮށް، ލުއިފަސޭހަކަމާއެކު ލިބޭނެ ގޮތް ހެދުމުގެ މަސައްކަތް ދަނީ ކުރަމުންނެވެ. މިނިސްޓަރ އޮފް އިކޮނޮމިކް ޑިވެލޮޕްމަންޓް، ޓްރާންސްޕޯޓް އެންޑް ޓްރޭޑް މުހައްމަދު ސައީދު ވިދާޅުވީ، މި މަސައްކަތްތަކުގެ ސަބަބުން އެއްގަމާއި ކަނޑުގެ ދަތުރުފަތުރުގެ ހިދުމަތްތައް ފޯރުކޮށްދިނުން ވެސް އިތުރަށް ހަރުދަނާވެގެންދާނެ ކަމަށެވެ.