މާލެ ޓެކްސީގެ އެންޑްރޮއިޑް އެޕް ވެސް ތަޢާރަފުކޮށްފި

މާލެ ސަރަހައްދުގައި ދަތުރުފަތުރުގެ ހިދުމަތް ދެމުންދާ އެމްޓީސީސީގެ "މާލެ ޓެކްސީ ލައިން" މޮބައިލް އެޕްލިކޭޝަން، އެންޑްރޮއިޑް ފޯނު ބޭނުންކުރާ ފަރާތްތަކަށް މިއަދު ދޫކޮށްލައިފިއެވެ. މީގެ ކުރިން ހަމައެކަނި އައިއޯއެސް (އެޕަލް) ފޯނުތަކަށް ހާއްސަކޮށްފައިވާ މި އެޕްލިކޭޝަން، މިހާރު ގޫގުލް ޕްލޭ ސްޓޯރުން ފަސޭހަކަމާއެކު ޑައުންލޯޑް ކުރެވޭނެއެވެ.

މި އެޕްލިކޭޝަން މެދުވެރިކޮށް ޓެކްސީ ހޯދުމުގެ ހިދުމަތް މިހާރު އިތުރަށް ފުޅާވެ، ގްރޭޓަރ މާލެ ސަރަހައްދުގައި ދިރިއުޅޭ އެންޑްރޮއިޑް ފޯނު ގެންގުޅޭ ފަރާތްތަކަށްވެސް މިހާރު ފަސޭހަކަމާއެކު ޓެކްސީ ބުކްކޮށްލުމުގެ ފުރުސަތު ލިބިގެންދާނެއެވެ.

މި އެޕްލިކޭޝަން ފަރުމާކޮށްފައިވަނީ ކަސްޓަމަރުންނަށް ފަސޭހައިން ޓެކްސީ ބުކް ކުރެވޭނެ ގޮތަށެވެ. އެގޮތުން މަދު ފިއްތުމަކުން ޓެކްސީއެއް ހޯދުމުގެ އިތުރުން، ދަތުރު ކުރަން ބޭނުންވާ ގަޑީގެ މަދުވެގެން ތިން ގަޑިއިރު ކުރިން ދަތުރު ޝެޑިއުލް ކުރުމުގެ ފުރުސަތު ލިބިގެންދެއެވެ. ފައިސާ ދެއްކުމުގައިވެސް ގިނަ ފަސޭހަތަކެއް ވަނީ ހިމަނާފައެވެ. އޭގެ ތެރޭގައި އެޕްގައި ހިމެނޭ ވޮލެޓާއި، ބޭންކް ކާޑު ބޭނުންކޮށްގެން ފައިސާ ދެއްކުމުގެ އިތުރުން "ސްކޭން އެންޑް ޕޭ" ކިއުއާރް ފީޗާ ހިމެނެއެވެ. އަދި ކުރިން ކޮށްފައިވާ ދަތުރުތަކާއި ކުރަން ހުރި ދަތުރުތަކުގެ ތަފްސީލީ ލޮގްވެސް މި އެޕްލިކޭޝަނުން ފެންނަން ހުންނާނެއެވެ.

ރައްކާތެރިކަމަށް ބަލާއިރު، ކުއްލި ހާލަތްތަކުގައި ކަމާބެހޭ ފަރާތްތަކަށް ވަގުތުން އެންގުމަށް "އެމަޖެންސީ ބަޓަނެއް" އެޕްގައި ވަނީ ހިމަނާފައެވެ. އަދި އަމިއްލަ ފޯނު ނަންބަރު ހާމަނުކޮށް ޑްރައިވަރާ މުއާމަލާތް ކުރެވޭނެ އިންތިޒާމުވެސް ވަނީ ހަމަޖައްސާފައެވެ. މީގެ އިތުރުން، ޓެކްސީގައި އެއްޗެއް ބޭއްވިއްޖެ ނަމަ، އެޕް މެދުވެރިކޮށް އެކަން ރިޕޯޓްކޮށް، އެ އެއްޗެއް އަނބުރާ ހޯދުމުގެ މަގު ވަނީ ފަހިކޮށްދީފައެވެ.

އެމްޓީސީސީން ބުނީ މި ހިދުމަތުގައި ބޭނުންކުރަނީ ތިމާވެއްޓާ ރައްޓެހި އިލެކްޓްރިކް ޓެކްސީތަކެއް ކަމަށެވެ. މިއީ ރާއްޖޭގައި ދެމެހެއްޓެނިވި، އިތުބާރު ހުރި އަދި ރައްކާތެރި ދަތުރުފަތުރުގެ ނިޒާމެއް ގާއިމުކުރުމަށް އެ ކުންފުނިން ކުރާ މަސައްކަތުގެ މުހިންމު ބައެކެވެ.

ކުރިއަށް އޮތް ތަނުގައި އިތުރު ފީޗާތަކާއެކު އެޕްލިކޭޝަން އަޕްޑޭޓް ކުރަމުންދާނެ ކަމަށާއި، ދަތުރުފަތުރުގެ އުމްރާނީ ވަސީލަތްތައް ތަރައްގީކޮށް އާންމުންނަށް ލުއިފަސޭހަ ގޮތްތައް ހޯދައިދިނުމަށް ކަމާބެހޭ ފަރާތްތަކާ ގުޅިގެން މަސައްކަތް ކުރަމުންދާނެ ކަމަށްވެސް އެމްޓީސީސީން ހާމަކުރެއެވެ. މިއާއެކު، މިހާރު އެޕަލް އަދި އެންޑްރޮއިޑް ފޯނު ބޭނުންކުރާ ހުރިހާ ފަރާތްތަކަށްވެސް މި ހިދުމަތުގެ ފައިދާ ލިބިގެންދާނެއެވެ.