ދުނިޔޭގެ ދިރުންތަކާ ބެހޭ ބައްދަލުވުމުގައި ކުދި ޖަޒީރާ ގައުމުތަކުގެ ހައްގުގައި ރާއްޖެއިން ވަކާލާތުކޮށްފި

ދުނިޔޭގެ ދިރުންތަކާ ބެހޭ މުއާހަދާ (ކޮންވެންޝަން އޮން ބަޔޮލޮޖިކަލް ޑައިވާސިޓީ - ސީ.ބީ.ޑީ) ގެ ދަށުން ބާއްވާ ސައިންޓިފިކް، ޓެކްނިކަލް އަދި ޓެކްނޮލޮޖިކަލް އެޑްވައިޒް (އެސް.ބީ.އެސް.ޓީ.ޓީ.އޭ) ގެ 28 ވަނަ ބައްދަލުވުމުގައި ކުދި ޖަޒީރާ ގައުމުތަކުގެ (ސިޑްސް) މަސްލަހަތު ހިމާޔަތްކުރުމަށް ރާއްޖެއިން ބާރުއަޅަމުންދާ ކަމަށް މިނިސްޓްރީ އޮފް ކްލައިމެޓް ޗޭންޖް، އެންވަޔަރަންމަންޓް އެންޑް އެނާޖީން ހާމަކޮށްފިއެވެ.

އަންނަ އޮގަސްޓް މަހުގެ 1 ވަނަ ދުވަހުގެ ނިޔަލަށް ކުރިއަށްދާ މި ބައްދަލުވުމުގައި ރާއްޖޭގެ އެންމެ ބޮޑު އަމާޒަކީ، މި މުއާހަދާ ތަންފީޒުކުރުމަށް އެކުލަވާލާ ފަންނީ މާހިރުންގެ ގްރޫޕްތަކުގައި ކުދި ޖަޒީރާ ގައުމުތަކަށް ޚާއްސަ ގޮނޑިތަކެއް ކަށަވަރުކުރުމެވެ. މިނިސްޓްރީން ފާހަގަކުރި ގޮތުގައި، މީގެ ސަބަބުން ތިމާވެށީގެ ގޮތުން ނާޒުކު ހާލަތްތަކުގައިވާ ރާއްޖެ ފަދަ ގައުމުތަކުގެ ބައިވެރިވުން ނިންމުންތައް ނިންމާ ފެންވަރުގައި ވަރުގަދަވެގެންދާނެއެވެ.

މީގެ އިތުރުން، ދުނިޔޭގެ ދިރުންތައް ހިމާޔަތްކުރުމަށް ކުރެވޭ މަސައްކަތްތައް މުރާޖައާކުރާއިރު، ކުދި ޖަޒީރާ ގައުމުތަކުން އިސްކަންދޭ ކަންކަމާއި އެ ގައުމުތަކަށް ކުރިމަތިވާ ގޮންޖެހުންތައް ހިމެނުމަށް ރާއްޖެއިން ދަނީ ވަކާލާތު ކުރަމުންނެވެ. އަދި ތިމާވެށީގެ މައްސަލަތައް މޮނިޓަރކޮށް ރިޕޯޓްތައް ތައްޔާރުކުރުމުގައި މިފަދަ ގައުމުތަކުގެ ގާބިލުކަން އިތުރުކުރުމަށް ބޭނުންވާ އެހީތެރިކަން ހޯދުމަށްވެސް ރާއްޖެއިން ބާރުއަޅައެވެ.

ރާއްޖެއިން އިސްކަންދޭ އަނެއް މުހިންމު ކަމަކީ ސިޔާސަތުތައް އެކުލަވާލުމުގައި ސައިންޓިފިކް ހެކިތަކުގެ ބޭނުން ހިފުމާއި، ސައިންޓިފިކް މައުލޫމާތަކީ ހުރިހާ ގައުމުތަކަށް ފަސޭހައިން ލިބޭނެ އެއްޗަކަށް ހެދުމެވެ.

މިނިސްޓްރީން އިތުރަށް ބުނި ގޮތުގައި، މި ބައްދަލުވުމަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުން ބައިނަލްއަގުވާމީ ތިމާވެށީގެ މައިދާނުގައި ރާއްޖޭގެ ދައުރު ފުޅާކުރުމަށް ކުރަމުންދާ މަސައްކަތުގެ ތެރެއިން، ރާއްޖެއާއި އެހެނިހެން ކުދި ޖަޒީރާ ގައުމުތަކުގެ މަސްލަހަތު ކުރިއެރުވުމަށް ލިބޭ މުހިންމު ފުރުސަތެކެވެ.