މަސައްކަތްކުރަމުން އަންނަނީ އައްޑޫ ބްރިޖަށް ބޭނުންވާ ފައިސާ ހޯދަން: މިނިސްޓަރ
އައްޑޫ ސިޓީ ހުޅުމީދޫ އާއި ހިތަދޫ ގުޅާލުމަށް ހަމަޖެހިފައިވާ ބްރިޖު މަޝްރުއޫ ނުހުއްޓޭ ކަމަށާއި، މަސައްކަތް ކުރަމުން ދަނީ މަޝްރުއޫއަށް ބޭނުންވާ ފައިސާ ހަމަޖެއްސުމަށް ކަމަށް އިންފްރާސްޓްރަކްޗާ މިނިސްޓަރު އަބްދުﷲ މުއްތަލިބު މިއަދު ވިދާޅުވެއްޖެއެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި ވަޒީރުންނާ ސުވާލުކުރުމުގެ އެޖެންޑާގެ ދަށުން ވާހަކަދައްކަވަމުން މިނިސްޓަރު ވިދާޅުވީ އައްޑޫ ބްރިޖް މަޝްރުއޫއަކީ މި ސަރުކާރުން އެންމެ ބޮޑު އަހައްމިއްޔަތުކަމެއް ދޭ އެއް މަޝްރުއޫ ކަމަށެވެ. މި މަޝްރުއޫ ކުރިއަށް ގެންދިއުމަށް ބަޔަކާ އެކު ސޮއިކުރެވި، މަސައްކަތްތަކެއް ކުރެވެމުން ދާކަމަށެވެ.
އެމްއޯޔޫގެ ދަށުން އެބޭފުޅުންނަށް މި އިންނަނީ ފައިސާ އެރޭންޖުކޮށްދިނުން. ސަރުކާރުން ލޯނު ނަގާނީ އެހެން ނަމަވެސް އެރޭންޖުކޮށްދޭނީ އެބޭފުޅުން. އެގޮތުން އެބޭފުޅުން އެރޭންޖުކޮށް ބައެއް ފަރާތްތަކާ ވާހަކަ ދައްކާ ކުރިއަށް ވެސް އަޅުގަނޑުމެން އެބަ ދަން. ފައިސާ ހަމަޖެހޭ ހިސާބުން އިރާދަކުރެއްވިއްޔާ ޕްރޮޖެކްޓު ކުރިއަށް ގެންދެވޭނެ
މިނިސްޓަރ އަބްދުﷲ މުއްތަލިބު
މިނިސްޓަރު ވިދާޅުވީ ފައިސާ ހަމަ ނުޖެހެނިސް ކޮންޓްރެކްޓެއްގައި ސޮއި ނުކުރާނެ ކަމަށާއި، މިހާރު އޮތް އެއްބަސްވުމުގެ ދަށުން ފައިސާ ހަމަ ނުޖެއްސިއްޖެ ނަމަ އަނެއްކާވެސް އިތުރު ކުންފުންޏަކާ އެކު ކުރިއަށް ދާނެ ކަމަށެވެ. މި މަޝްރުއޫ ހަވާލުކޮށްފައި ވަނީ މިސްރު ސަރުކާރު ކުންފުންޏެއްކަމަށްވާ ދަ އަރަބް ކޮންޓްރެކްޓާސްއާ އެވެ.
އެ ކުންފުނިން ހުށަހަޅާފައި ވަނީ، މި މަޝްރުއޫގެ ސާވޭތައް ހިލޭ ކުރިއަށް ގެންދިއުމަށެވެ.
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
