މި މަސް ނިމުމުގެ ކުރިން ބީއެމްއެލް ކާޑުތަކުގެ ޑޮލަރު ލިމިޓަށް ބޮޑު ލުޔެއް ލިބޭނެ: ރައީސް މުޢިއްޒު

މި ހިނގާ މަސް ނިމުމުގެ ކުރިން ބޭންކް އޮފް މޯލްޑިވްސް (ބީއެމްއެލް) ގެ ކާޑުތަކުން ކުރާ ބޭރުގެ މުއާމަލާތްތަކަށް ކަނޑައަޅާފައިވާ ލިމިޓަށް ބޮޑު ލުޔެއްލިބޭނެ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.

ރައީސް މިހެން ވިދާޅުވީ މިއަދު ރައީސުލްޖުމްހޫރިއްޔާގެ އޮފީހުގައި ބޭއްވި ނޫސްވެރިންގެ ބައްދަލުވުމެއްގައި، ރާއްޖެއަށް ކުރިމަތިވެފައިވާ ޑޮލަރުގެ ދަތިކަން ހައްލުކުރުމަށް ކުރަމުންދާ މަސައްކަތްތަކާ ގުޅޭގޮތުން ނޫސްވެރިއަކު ކުރި ސުވާލަކަށް ޖަވާބު ދެއްވަމުންނެވެ.

ރައީސް މުޢިއްޒު ވިދާޅުވީ، ބީއެމްއެލްއަށް ކުރިމަތިވެފައިވާ ގޮންޖެހުންތަކާ ގުޅިގެން ޑޮލަރު މުއާމަލާތްތަކަށް ކޮންޓްރޯލްތަކެއް ގެނައި ނަމަވެސް، ބޭންކާއެކު ކުރެވުނު މަޝްވަރާތަކުގެ އަލީގައި މި މަސް ނިމުމުގެ ކުރިން އެ ލިމިޓްތަކަށް ބޮޑު ލުޔެއް ދެވޭނެ ކަމުގެ އިޝާރާތެއް ލިބިފައިވާ ކަމަށެވެ.

ބީއެމްއެލް އިން މީގެ ކުރިން ހާމަކޮށްފައިވާ ގޮތުގައި، ރުފިޔާ ކާޑުތަކުން ކުރާ އޮންލައިން މުއާމަލާތްތަކަށް ލިމިޓް ކަނޑައަޅަން ޖެހުނީ ރާއްޖެއަށް ވަންނަ ބޭރު ފައިސާގެ މިންވަރު މަދުވުމާ ގުޅިގެންނެވެ. މީގެ މައިގަނޑު ސަބަބުތަކުގެ ތެރޭގައި ފަތުރުވެރިކަމުގެ އޮފް-ސީޒަނާ ދިމާވުމާއި، މެދުއިރުމަތީގެ ހަމަނުޖެހުންތަކުގެ ސަބަބުން އިގްތިސާދަށް ކުރި އަސަރުތައް ހިމެނެއެވެ.

މިހާރު އަމަލުކުރަމުންދާ އުސޫލުގެ ދަށުން، ބީއެމްއެލް އިން ވަނީ އޮންލައިން ވިޔަފާރިތަކަށް ދުވާލަކު ވަކި މިންވަރެއްގެ ބޭރު ފައިސާގެ ބަޖެޓެއް ކަނޑައަޅާފައެވެ. އެ މިންވަރު ހަމަވުމުން، ޖެހިގެން އަންނަ ދުވަހާ ހަމައަށް ބައެއް ބޭރުގެ މުއާމަލާތްތައް ބޭންކުން ރިޖެކްޓް ކުރެއެވެ. ނަމަވެސް، ޑޮލަރު އެކައުންޓްތަކާ ގުޅިފައިވާ ކާޑުތަކުން ކުރާ މުއާމަލާތްތަކަށް މި ލިމިޓްތަކުގެ ސަބަބުން އެއްވެސް ހުރަހެއް ނެތް ކަމަށް ބޭންކުން މައުލޫމާތުދެއެވެ.

މި ބަދަލާއެކު އާންމު ރައްޔިތުންނަށާއި ކުދި ވިޔަފާރިތަކަށް ބޭރުގެ މުއާމަލާތްތައް ކުރުމުގައި ބޮޑެތި ފަސޭހަތަކެއް ލިބިގެންދާނެ ކަމަށް ބެލެވެއެވެ.