ދެ ދައުލަތުގެ ޙައްލާ ގުޅޭގޮތުން ބައިނަލްއަޤްވާމީ މުޖުތަމަޢުން ނެރުނު ބަޔާނަށް ދިވެހި ސަރުކާރުން މަރުޙަބާ ކިޔައިފި

ފަލަސްޠީނާއި އިސްރާއީލުގެ މައްސަލައިގައި ދެ ދައުލަތުގެ ޙައްލު ޤާއިމުކުރުމާ ގުޅޭގޮތުން ދުނިޔޭގެ 12 ޤައުމަކުން ގުޅިގެން ނެރުނު ބަޔާނަށް ދިވެހި ސަރުކާރުން މަރުޙަބާ ކިޔައިފިއެވެ.

މި މައްސަލައިގައި ގުޅިފައިވާ ބަޔާނެއް ނެރެފައިވަނީ ޔުނައިޓެޑް ކިންގްޑަމް (ޔޫކޭ)، ކެނެޑާ، ޑެންމާކް، ފިންލެންޑް، ފްރާންސް، އައިސްލެންޑް، އަޔަލެންޑް، ނޯވޭ، ޕޯލެންޑް، ޕޯޗުގަލް، ސްޕެއިން އަދި ސްވިޑަން އިންނެވެ.

މިކަމާ ގުޅިގެން ދިވެހި ސަރުކާރުން ނެރުނު ބަޔާނުގައި ފާހަގަކޮށްފައިވާ ގޮތުގައި، ފަލަސްޠީނުގެ ބިންތައް ފޭރިގަތުމާއި އެ ޤައުމުގެ ރައްޔިތުން ގަދަކަމުން ގެދޮރުން ނެރެލުމާ ދެކޮޅަށް، އެ ޤައުމުތަކުގެ ގުޅިފައިވާ ބަޔާނުގައި ފާޅުކޮށްފައިވާ އެކުވެރި ޢަޒުމް ދިވެހިރާއްޖެއިން ޚާއްޞަ ގޮތެއްގައި ބަލައިގަނެއެވެ.

ދިވެހި ސަރުކާރުން ހާމަކުރި ގޮތުގައި، މި ކުރިއެރުމަކީ މެދުއިރުމަތީގެ ސަރަޙައްދުގައި ޞުލްޙަވެރިކަމާއި ހަމަޖެހުން ޤާއިމުކުރުމަށް ބައިނަލްއަޤްވާމީ ފެންވަރުގައި އަލުން އުފެދެމުން އަންނަ ބާރެއް ދައްކުވައިދޭ ކަމެކެވެ. އަދި މިއީ ފަލަސްޠީނުގެ ރައްޔިތުންނަށް ޞުލްޙައާއި، ރައްކާތެރިކަމާއި، ކަރާމާތް ކަށަވަރުކޮށްދިނުމުގެ މުހިންމުކަމާމެދު ބައިނަލްއަޤްވާމީ ދުނިޔެ އިއްތިފާޤުވަމުން އަންނަ މިންވަރު ހާމަކޮށްދޭ އަލިގަދަ ހެއްކެއް ކަމުގައިވެސް ވަނީ ބަޔާންކޮށްފައެވެ.

މީގެއިތުރުން، އިސްރާއީލުން ވެރިވެގަނެފައިވާ ފަލަސްޠީނުގެ ބިންތަކުގައި ޤަވާޢިދާ ޚިލާފަށް ޔަހޫދީ އާބާދީތައް ފުޅާކުރުމަށް ކުރަމުންދާ މަސައްކަތްތަކާ ދެކޮޅަށް ދިވެހިރާއްޖެއިން އަބަދުވެސް ފާޅުކުރަމުންދާ ދެކޮޅުވެރިކަން މި ބަޔާނުގައިވެސް ވަނީ އަލުން ތަކުރާރުކޮށްފައެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުގެ ޚާރިޖީ ސިޔާސަތު އަލިއަޅުވާލައި ނެރުނު މި ބަޔާން ނިންމާލަމުން ދިވެހި ސަރުކާރުން ބުނެފައިވަނީ، ފަލަސްޠީނުގެ ރައްޔިތުންގެ ޙައްޤުތަކަށާއި، އެމީހުންގެ އަމިއްލަ އިޚްތިޔާރުގައި ކަންކަން ނިންމުމުގެ ޙައްޤަށް ރާއްޖެއިން އަބަދުވެސް ވަކާލާތު ކުރާނެ ކަމަށެވެ. އަދި 1967 ގެ ކުރީގެ ބޯޑަރުތަކުގެ މައްޗަށް ބިނާކޮށް، އިރުމަތީ ޤުދުސް އަކީ ވެރިރަށް ކަމުގައި ކަނޑައެޅިފައިވާ މިނިވަން، މުސްތަޤިއްލު އަދި ދެމެހެއްޓެނިވި ފަލަސްޠީނުގެ ދައުލަތެއް ޤާއިމުކުރުމަށް ކުރެވޭ އެންމެހައި މަސައްކަތްތަކަށް ދިވެހިރާއްޖެއިން އަބަދުވެސް ސާބިތުކަމާއެކު ފުރިހަމައަށް ތާއީދުކުރާނެ ކަމުގެ ޔަޤީންކަން ވަނީ ދީފައެވެ.