އިލެކްޝަންސް ކޮމިޝަނުގެ މެންބަރުކަމަށް މުޙައްމަދު ޝަކީލް އައްޔަންކުރައްވައިފި

އިލެކްޝަންސް ކޮމިޝަނުގެ މެންބަރުކަމުގެ މަޤާމަށް، މުޙައްމަދު ޝަކީލް މިއަދު ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އައްޔަންކުރައްވައިފިއެވެ.

ޝަކީލް މި މަޤާމަށް އައްޔަންކުރައްވާފައިވަނީ ރައްޔިތުންގެ މަޖިލީހުން އޭނާގެ ނަން ފާސްކުރުމާ ގުޅިގެންނެވެ. މިކަމަށްޓަކައި މިއަދު ރައީސުލްޖުމްހޫރިއްޔާގެ އޮފީހުގައި ބޭއްވި ޚާއްޞަ ރަސްމިއްޔާތެއްގައި، ޝަކީލަށް މަޤާމުގެ ފަތްކޮޅު އެރުވީ ރައީސުލްޖުމްހޫރިއްޔާ ޑރ. މުޢިއްޒެވެ. މަޤާމުގެ ހުވާލައިދެއްވީ ސުޕްރީމް ކޯޓުގެ ފަނޑިޔާރު އަލްއުސްތާޛު މުޙައްމަދު ސަލީމެވެ. ހުވާކުރެއްވުމަށްފަހު ޝަކީލް ވަނީ އިޤުރާރުގައި ސޮއިކުރައްވާފައެވެ.

އިލެކްޝަންސް ކޮމިޝަނުގެ މެންބަރުކަމުގެ ގޮނޑިއެއް ހުސްވީ، އެ ކޮމިޝަނުގެ ރައީސްކަމާއި މެންބަރުކަމުގެ މަޤާމުގައި ހުންނެވި މުޙައްމަދު ޒާހިދު އިސްތިއުފާ ދެއްވުމާ ގުޅިގެންނެވެ. އެ މަޤާމަށް ކުރިމަތިލުމަށް ހުޅުވާލި ފުރުޞަތުގައި ކުރިމަތިލެއްވި ބޭފުޅުންގެ ތެރެއިން ރައީސުލްޖުމްހޫރިއްޔާ އިސްކަންދެއްވީ ޝަކީލަށެވެ.

މުޙައްމަދު ޝަކީލަކީ މީގެ ކުރިންވެސް އިލެކްޝަންސް ކޮމިޝަނުގައި ގިނަ ދުވަސްތަކެއް ވަންދެން މަސައްކަތް ކުރައްވާފައިވާ ތަޖުރިބާކާރު ބޭފުޅެކެވެ. އެގޮތުން 3 ޑިސެމްބަރު 2014 އިން 9 މޭ 2018 އަށް އޭނާ ވަނީ އެ ކޮމިޝަނުގެ މެންބަރުކަން ކުރައްވާފައެވެ. އޭގެ ކުރިން 1 ސެޕްޓެމްބަރު 2013 އިން 3 ޑިސެމްބަރު 2014 އަށް އޭނާ ހުންނެވީ އެ ކޮމިޝަނުގެ ޑައިރެކްޓަރ ޖެނެރަލްގެ މަޤާމުގައެވެ.

މަޖިލީހުގެ މިނިވަން މުއައްސަސާތަކުގެ ކޮމިޓީގައި އިންޓަވިއު ދެއްވަމުން ޝަކީލް ވިދާޅުވީ، 2018 ވަނަ އަހަރު އޭނާ މަޤާމުން އިސްތިއުފާ ދެއްވީ މިނިވަންކަމާއެކު މަސައްކަތް ކުރެވޭނެ މާޙައުލެއް އޭރު ނެތުމުން ކަމަށެވެ. އަދި ކުރިއަށް އޮތް ތަނުގައިވެސް އެފަދަ ޙާލަތެއް މެދުވެރިވެއްޖެނަމަ، މިނިވަންކަމަށް އިސްކަންދީ އިސްތިއުފާ ދެއްވާނެ ކަމަށް އޭނާ ވިދާޅުވިއެވެ. މީގެ އިތުރުން ހުރިހާ ސިޔާސީ ޕާޓީތަކަކަށްވެސް އެބޭފުޅުންގެ ކަންބޮޑުވުންތައް ހިއްސާކޮށް، މަޝްވަރާ ކުރުމުގެ ފުރުޞަތު ހަމަހަމަކަމާއެކު ދެއްވާނެ ކަމުގެ ޔަޤީންކަން ޝަކީލް ދެއްވިއެވެ.

ޝަކީލް އައްޔަންކުރެއްވުމާއެކު، އިލެކްޝަންސް ކޮމިޝަނުގެ މެންބަރުންގެ އަދަދު މިހާރު ވަނީ ޤާނޫނުގައި ބުނާ ފަސް މެންބަރުންނަށް ހަމަވެފައެވެ. ކޮމިޝަނުގައި މިހާރު ތިއްބެވި މެންބަރުންނަކީ:

ޢަބްދުއްރަޙްމާން ޞަލާޙް ރަޝީދު (ނައިބު ރައީސް)

ޙަސަން ޒަކަރިއްޔާ

ޢަބްދުލްޙަސީބް އިސްމާޢީލް

ރިފްޢަތު ޢަބްދުﷲ

މުޙައްމަދު ޝަކީލް

ކޮމިޝަނުގެ މެންބަރުން ހަމަވި ނަމަވެސް، ކޮމިޝަނުގެ ރައީސްގެ މަޤާމު އަދިވެސް އޮތީ ހުސްކޮށެވެ. ޤާނޫނުގައިވާ ގޮތުން އިލެކްޝަންސް ކޮމިޝަނުގެ ރައީސް އައްޔަންކުރައްވާނީ، ކޮމިޝަނުގެ މެންބަރުންގެ ތެރެއިން ރައްޔިތުންގެ މަޖިލީހުގެ ރުހުމާއެކު ރައީސުލްޖުމްހޫރިއްޔާއެވެ.