ބޮޑު ޖަމާޢަތުގައި ޢީދު ނަމާދުކުރާނެ ޚަޠީބުން ކަނޑައަޅައިފި

ކުރިއަށް އޮތް ޢީދު ނަމާދު މާލެ ސަރަޙައްދުގެ ބޮޑު ޖަމާޢަތްތަކުގައި އިމާމުވެ ނަމާދުކުރައްވާނެ ޚަޠީބުން މިނިސްޓްރީ އޮފް އިސްލާމިކް އެފެއާޒުން ކަނޑައަޅައި އިޢުލާންކުރައްވައިފިއެވެ.

އިސްލާމީ އުޞޫލުތައް ކުރިއެރުވުމަށާއި، ދީނީ ކަންކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުން ދެއްވާ ޚާއްޞަ އަހައްމިއްޔަތުކަމުގެ ދަށުން، މިއަހަރުވެސް މާލެއާއި ހުޅުމާލެ އަދި ވިލިމާލޭގެ އެކި ސަރަޙައްދުތަކުގައި ބޮޑު ޖަމާޢަތުގައި ޢީދު ނަމާދު ކުރުމަށް ވަނީ ހަމަޖެހިފައެވެ. މިގޮތުން ކަނޑައެޅުނު ސަރަޙައްދުތަކާއި އެ ތަންތަނުގައި އިމާމުވެ ނަމާދުކުރައްވާނެ ބޭފުޅުންނަކީ:

މާލެ ސިޓީ (މާފަންނު ސްޓޭޑިއަމް): މި ސަރަޙައްދުގައި އިމާމުވެ ނަމާދުކުރައްވާނީ އައްޝައިޚް ޢަބްދުﷲ ސަޢުދާން އެވެ.

ހުޅުމާލެ ފޭސް 1 (ސިންތެޓިކް ޓްރެކް): މި ސަރަޙައްދުގައި އިމާމުވެ ނަމާދުކުރައްވާނީ އައްޝައިޚް ނަޞްރުﷲ ޢަލީ އެވެ.

ހުޅުމާލެ ފޭސް 2: މަސްޖިދު ޙަސަން އާދަމް އާއި ނިރޮޅުމަގާ، ހީނާމާހިނގުމާ، ފޭރުގަސްމަގާ އަދި ދުބުރިގަސް މަގާ އެއް އިންކޮށް އޮންނަ ހުސްބިމުގައި އިމާމުވެ ނަމާދުކުރައްވާނީ އަލްޙާފިޡް މުޙައްމަދު ޙަނޫން ޙުސައިން އެވެ.

ވިލިމާލެ (ފުޓްބޯޅަ ދަނޑު): މި ސަރަޙައްދުގައި އިމާމުވެ ނަމާދުކުރައްވާނީ އަލްޤާރީ އަޙްމަދު ރިޔާޟް އެވެ.

މީގެ އިތުރުން މާލޭގެ ބޮޑު ދެ މިސްކިތުގައިވެސް ޚާއްޞަ އިންތިޒާމުތަކެއް ވަނީ ހަމަޖެހިފައެވެ. އެގޮތުން މަސްޖިދުލްސުލްޠާން މުޙައްމަދު ތަކުރުފާނުލްއައުޡަމް (އިސްލާމީ މަރުކަޒު) ގައި އިމާމުވެ ނަމާދުކުރައްވާނީ އައްޝައިޚް މުޙައްމަދު ލަޠީފް އެވެ. އަދި މަސްޖިދުލްމަލިކި ސަލްމާން (ސަލްމާން މިސްކިތް) ގައި އިމާމުވެ ނަމާދުކުރައްވާނީ އައްޝައިޚް އިބްރާހިމް ރަޝީދު ޙަސަން އެވެ.

މޫސުން ގޯސްވެ ވިއްސާރައިގެ ސަބަބުން މައިދާންތަކުގައި ނަމާދުކުރުން ކެންސަލް ކުރަން ޖެހިއްޖެ ހާލަތެއްގައި، މާލެ، ވިލިމާލެ އަދި ހުޅުމާލޭގައި ހުކުރު ނަމާދު ކުރާ ހުރިހާ މިސްކިތްތަކެއްގައިވެސް ޢީދު ނަމާދު ކުރާނެ ކަމަށް މިނިސްޓްރީ އޮފް އިސްލާމިކް އެފެއާޒުން ވިދާޅުވެއެވެ.

މިއަހަރުގެ އަޟްޙާ ޢީދު ނަމާދު ކުރަން ފެށުމަށް ހަމަޖެހިފައިވަނީ ހެނދުނު 07:00 ގައެވެ. މިނސްޓްރީން އަންނަނީ ޢީދު ނަމާދަށް ބޭނުންވާ އެންމެހާ ތައްޔާރީތައް ވަމުންނެވެ.