މާލެ، ހުޅުމާލެ އަދި ވިލިމާލޭގައި “ޢީދު ހަވީރު 1447” ކުލަގަދަކޮށް ފާހަގަކުރަނީ

މި އަހަރުގެ ބަރަކާތްތެރި އަޟްޙާ ޢީދުގެ އުފަލުގައި، ޢާއިލާތައް އެކުވެރި މާޙައުލެއްގައި ޢީދު އުފާ ފާހަގަކުރުމަށް “ޢީދު ހަވީރު 1447” ގްރޭޓާ މާލެ ސަރަހައްދުގައި ކުލަގަދަކޮށް ބާއްވަން ނިންމަވައިފިއެވެ.

ދިވެހިރާއްޖޭގެ ޤައުމީ ދިފާޢީ ބާރުން ވިލަރެސްކޮށް ކުރިއަށްގެންދާ މި ހަރަކާތުގައި، ސިފައިންނާއި ފުލުހުންގެ އިތުރުން ދައުލަތުގެ 10 ކުންފުންޏެއް ބައިވެރިވާނެއެވެ.

މާލޭގައި ޢީދު ހަވީރުގެ ހަރަކާތްތައް އޮންނާނީ މޭ 27 އިން 29 އަށް ތިން ދުވަހަށް، ސަލްޓަން ޕާކާއި ޝަހީދުންގެ ބިނާ ސަރަހައްދު ހިމެނޭހެން ޖުމްހޫރީ މައިދާނާއި ރަސްމީ ބޮޑުފާލަން ސަރަހައްދުގައެވެ. މި ހަރަކާތްތަކުގައި ވޯޓަރ ފައުންޓެއިން، ފޯމް ބާތް ޕޫލް، ރެޕަލިންގ އަދި ސިފައިންގެ ޔުނިފޯމްތަކާއި ހަތިޔާރުތައް އަދި އުޅަނދުތައް ދައްކާލާނެއެވެ. އަދި އެ ތަކެއްޗާއި އެކު ފޮޓޯ ނެގުމުގެ ފުރުޞަތު ވެސް ލިބޭނެއެވެ.

މޭ 28 ވަނަ ދުވަހު، އެމްއެންޑީއެފް އެޖުޓަންޓް ޖެނެރަލްސް ކޯރގެ އާޓްސް އެންޑް ސެރެމޯނިއަލް ސަރވިސްއިން ޚާއްޞަ ޝޯތަކެއް ވެސް ހުށަހަޅާނެއެވެ. ބޭނުންފުޅުވާ ފަރާތްތަކަށް ކެންޓީނުގެ ޚިދުމަތް ވެސް ލިބޭނެއެވެ.

ހުޅުމާލޭގައި ވެސް ޢީދު ހަވީރުގެ ހަރަކާތްތައް މޭ 27 އިން 29 އަށް ބޭއްވޭނެއެވެ. ހުޅުމާލެ ސެންޓްރަލް ޕާކާއި ފޭސް 2 ގެ ހިޔާ ޕާކުގައި ރެޕަލިންގ، ވޯޓަރ ސްލައިޑިންގ، ފޯމް ބާތް ޕޫލް އަދި ފަޔަރ އިކުއިޕްމަންޓްސް ދައްކާލުން ހިމެނޭނެއެވެ. އަދި ޓޭބަލް ލެޑަރއަށް އެރުން ފަދަ ތަފާތު ހަރަކާތްތަކެއް ވެސް އޮންނާނެއެވެ.

ވިލިމާލޭ ފުޓްބޯޅަ ދަނޑުގައި މޭ 27 އިން 30 އަށް ހަތަރު ދުވަހަށް “ޢީދު ހަވީރު” ބޭއްވޭނެއެވެ. މިގޮތުން ކުޑަކުދިންނަށް އޮބްސްޓިކަލް ކޯސްތަކާއި ތަފާތު ކުޅިވަރުގެ ޙަރަކާތްތަކާއި ރެޕަލިންގ ކުރުމުގެ ފުރުޞަތު ލިބޭނެއެވެ.

ޢީދު ހަވީރުގެ ހަރަކާތްތައް ކުރިއަށް ދާނީ ކޮންމެ ދުވަހެއްގެ 16:00 އިން 18:00 އަށެވެ.

މި އަހަރުގެ ޢީދު ހަވީރުގައި ބައިވެރިވާ ދައުލަތުގެ ކުންފުނިތަކަކީ ސްޓެލްކޯ، އެމްޑަބްލިޔުއެސްއީ، ވެމްކޯ، އެމްޕީއެލް، އެމްޓީސީސީ، އެމްއޭސީއެލް، މިފްކޯ، އާރުޑީސީ، އެޗްޑީސީ އަދި އެފްޑީސީ އެވެ.