އޮފީސްތަކުގައި ރޯވި މައްސަލައިގައި ޔާމީން ދެއްކެވި ވާހަކަފުޅުތައް ބަލަން ފުލުހުންނަށާއި އެންއައިސީއަށް ހުށަހަޅައިފި

ސަރުކާރުގެ ތިން ވުޒާރާއެއް ހިންގަމުންދިޔަ އިމާރާތުގައި ހިނގި އަލިފާނުގެ ހާދިސާއާ ގުޅިގެން ކުރީގެ ރައީސް ޢަބްދުﷲ ޔާމީން ޢަބްދުލްޤައްޔޫމް ދެއްކެވި ވާހަކަފުޅުތަކާ ގުޅިގެން، އެމަނިކުފާނުގެ ކިބައިން މަޢުލޫމާތު ސާފުކުރުމަށް ފުލުހުންގެ ކިބައިން އަދި ފުލުހުންގެ މައްޗަށް ކުރެއްވި ތުހުމަތު ބަލައިދިނުމަށް ނޭޝަނަލް އިންޓެގްރިޓީ ކޮމިޝަން (އެންއައިސީ) ގައި އެދިވަޑައިގެންފައިވާ ކަމަށް ދާޚިލީ ސަލާމަތާއި ފަންނިއްޔާތާ ބެހޭ ވަޒީރު ޢަލީ އިޙްސާން ވިދާޅުވެއްޖެއެވެ.

މިނިސްޓަރ ޢަލީ އިޙްސާން މީސްމީޑިއާ ޕްލެޓްފޯމް 'އެކްސް' ގައި ކުރެއްވި ޕޯސްޓެއްގައި ވިދާޅުވީ، ސަރުކާރުގެ 3 ވުޒާރާއެއް ހިންގަމުންދިޔަ އިމާރާތްތައް އަންދައިގެން ދިޔަ ހާދިސާއާ ގުޅިގެން ދިވެހި ފުލުހުންނާއި އެކުވެރި ޤައުމުތަކުގެ ތަހުޤީޤީ މާހިރުން ގުޅިގެން ކުރިއަށްގެންދިޔަ ތަހުޤީޤުން އެނގިފައިވަނީ، އެ ހާދިސާ ހިނގަން މެދުވެރިވީ ކަރަންޓު ނަރުތަކެއްގައި ރޯވެގެން ކަމަށެވެ. އަދި މި މައްސަލައިގައި އެއްވެސް މީހެއްގެ މައްޗަށް ޖިނާއީ ތުހުމަތެއް ކުރެވޭނެ އެއްވެސް ހެއްކެއް ތަހުޤީޤަށް ލިބިފައިނުވާކަމަށް ފުލުހުން މަޢުލޫމާތު ދީފައިވާ ކަމަށްވެސް މިނިސްޓަރ ވިދާޅުވިއެވެ.

ނަމަވެސް، 5 ސެޕްޓެމްބަރ 2026 ގައި ކުރީގެ ރައީސް ޔާމީން ދެއްކެވި ވާހަކަފުޅެއްގައި، އެ އިމާރާތްތަކުގައި ރޯކޮށްލީ ކަމަށާއި އެކަން ކުރި މީހަކީ ކާކުކަން ފުލުހުންނަށް ސާފުކޮށް އެނގޭ ކަމަށް މުތުލަޤުކޮށް ވިދާޅުވެފައިވާކަން މިނިސްޓަރ ފާހަގަކުރެއްވިއެވެ.

މިކަމާ ގުޅިގެން މިނިސްޓަރ އިޙްސާން ވިދާޅުވީ، ރައީސް ޔާމީނަށް އެނގިވަޑައިގަންނަވާ މަޢުލޫމާތުތައް ސާފުކުރައްވައި، ތަހުޤީޤުގައި އިތުރަށް ބައްލަވަންޖެހޭ އެއްވެސް ކަމެއް ވާނަމަ އެކަން ބެއްލެވުމަށް ދިވެހި ފުލުހުންގެ ޚިދުމަތުގައި އެދިވަޑައިގެންފައިވާނެ ކަމަށެވެ.

މީގެއިތުރުން، އެ ހާދިސާ ހިންގި މީހާ އެނގިތިބެ ފުލުހުން އެކަން ފޮރުވަން އުޅޭކަމަށް ދޭހަވާ މޭރުމަކުން ކުރީގެ ރައީސް ޔާމީން ތުހުމަތު ކުރައްވާފައިވާތީ، ދިވެހި ފުލުހުންގެ މައްޗަށް އެމަނިކުފާނު ކުރެއްވި އެ ތުހުމަތު ތަހުޤީޤުކޮށްދެއްވުމަށް އެދި ނޭޝަނަލް އިންޓެގްރިޓީ ކޮމިޝަނަށްވެސް ހުށަހަޅުއްވާފައިވާނެ ކަމަށް މިނިސްޓަރ ޢަލީ އިޙްސާންގެ އެކްސް ޕޯސްޓުގައި ހާމަކުރައްވާފައިވެއެވެ.