މާލެ އާއި ވިލިމާލޭގެ މަގުތައް ޒަމާނީ ފެންވަރަށް ތަރައްޤީކުރުމުގެ އަމަލީ މަސައްކަތަށް ބޭނުންވާ ސާވޭތައް ފަށައިފި

މާލެ އާއި ވިލިމާލޭގެ މަގުތައް ޒަމާނީ ފެންވަރަށް ތަރައްޤީކުރުމަށް ސަރުކާރުން ކުރިއަށްގެންދާ ބޮޑު މަޝްރޫޢުގެ ތަފްޞީލީ ކުރެހުންތައް އެކުލަވައިލުމަށް ބޭނުންވާ ސާވޭތަކާއި ދިރާސާކުރުމުގެ މަސައްކަތްތައް ރަސްމީކޮށް ފަށައިފިއެވެ.

މިނިސްޓްރީ އޮފް އިންފްރާސްޓްރަކްޗަރ، ހައުސިންގ އެންޑް އާބަން ޑިވެލޮޕްމެންޓް އިން ހާމަކޮށްފައިވާ ގޮތުގައި، މިއީ ޗައިނާ ސަރުކާރުގެ ހިލޭ އެހީގެ ދަށުން ކުރިއަށްގެންދިއުމަށް ހަމަޖެހިފައިވާ މުހިންމު މަޝްރޫޢެކެވެ. މި މަޝްރޫޢުގެ ދަށުން މާލެ އާއި ވިލިމާލޭގެ މަގުތަކުގެ ހާލަތު ރަނގަޅުކޮށް، ޒަމާނީ ފެންވަރަށް ތަރައްޤީކުރުމަށް ވަނީ ރޭވިފައެވެ.

މި މަސައްކަތުގެ ތެރެއިން، މަގުތައް ތަރައްޤީކުރާނެ ގޮތުގެ ތަފްޞީލީ ކުރެހުންތައް ތައްޔާރުކުރުމަށްޓަކައި ކަމާގުޅޭ ސަރަޙައްދުތައް ސާވޭކުރުމާއި، ކަމާގުޅުންހުރި އެކި ފަރާތްތަކާއެކު ބާއްވާ މަޝްވަރާ ބައްދަލުވުންތައް މިހާރު ވަނީ ފަށާފައެވެ. މިނިސްޓްރީން މަޢުލޫމާތު ދޭ ގޮތުގައި މި ސާވޭތަކާއި ދިރާސާގެ މަސައްކަތްތައް 4 ޖުލައި 2026 ގެ ނިޔަލަށް ކުރިއަށްދާނެއެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ޗައިނާއަށް ކުރެއްވި ރަސްމީ ދަތުރުފުޅުގައި ވެވަޑައިގެންނެވި އެއްބަސްވުންތަކުގެ ދަށުން ކުރިއަށްދާ މި މަޝްރޫޢަކީ، މާލޭގެ ތޮއްޖެހުމާއި މަގުތަކުގައި ފެންބޮޑުވުން ފަދަ މައްސަލަތަކަށް ދާއިމީ ހައްލެއް ހޯދައިދިނުމަށް ސަރުކާރުން އިސްކަންދޭ މަޝްރޫޢެކެވެ. މި މަޝްރޫޢުގެ ސާވޭތައް ނިމުމުން، އަމަލީ މަސައްކަތް ފެށުމަށް ބޭނުންވާ ފަންނީ ތައްޔާރީތައް ފުރިހަމަވެގެންދާނެއެވެ.